放閃! 吳岱融 為太太慶生 高呼I Love You
Hugo最近回巢無綫且被重用，在過去的台慶頒獎禮呼聲好高，雖然失落獎項，但拍攝《巨輪II》後，不但人氣大增，連工作都接踵而來！近年以銀髮型男姿態 視人的他更被外間稱為男神、美魔男等，早前他接受《東方新地》訪問，更直言多咗女士同佢影相，唔知老婆鍾淑慧(Lily)有無吃醋呢？
人氣高人哋會搵你
當年入行冇耐就做咗當紅小生，吳岱融自覺發展都算順利，更大談自己的拍劇史。「我係新加坡人，細個嚟咗香港，廿一歲返新加坡服兵役，入咗表演團體，跳舞、芭蕾舞、一字馬都係嗰時學番嚟，同時間喺酒廊唱歌，識咗一啲製作人，入咗訓練班，演咗6部電視劇，《人在旅途》、《盜日英雄傳》、《怒海萍蹤》⋯⋯呢啲戲當時喺大陸都幾好，最尾套劇我斷咗腳，返咗嚟香港，因為爹哋媽咪喺香港，之前識嘅製作人引薦咗我入TVB，好快拍咗《絕代雙驕》。到之後離開TVB出嚟搞電影，90年代結婚，之後返咗星馬搞製作，生埋小朋友，hea咗8、9年，去大陸住，喺大陸演出，有一段時間人氣係冇咗，我亦都唔mind，因為我都係一個幕後人，好清楚呢行嘅規則，人氣高人哋會搵你，人氣普通咪慢慢重頭做起，我初入行係好好彩，升到第一位，人氣冇咗之後，我重頭做起，好多客串角色，低微嘅酬勞，甚至酒店房可能唔係人住，我都唔mind，重頭嚟囉！絕對明白遊戲規則，呢行好現實，演員係被動嘅，佢搵你，你有價值，你自己去敲門，你一定係冇價值。」
拍攝《巨輪II》過足戲癮 監製大讚
問到對於啱啱過去嘅台慶頒獎禮，對於自己呼聲好高，點睇獎項？Hugo笑說：「有梗係好啦，係鼓勵嚟，對任何演員都想有，但演嗰陣完全冇諗呢樣嘢，好似拍《巨輪II》，唔夠兩、三個禮拜我已經入咗戲，係好過癮，例如監製棟隻手指公讚，我覺得已經係鼓勵，但真心話我認同曹永廉係值得攞(最佳男配角)，因為我睇過佢套劇，同埋從另一個角度，呢個(指頒獎禮)都係一個騷嚟啫，或者我自我安慰，佢攞獎牌，我攞獎金，的而且確《巨》之後四、五個月，出面多咗好多嘢做，呢個係真嘅，價錢亦都好咗好多。」
22年婚姻 互相扶持
吳岱融與鍾淑慧1994年結婚，卻依然十分甜蜜。早前跟太太同上無淺《1+1的幸福》分享夫妻情，笑言猶如再宣誓，因所講的全是真心話：「我同太太接近三十年，兩個人一齊真係一種心，錫對方，咪多啲關心對方，人去到一個階段，真係會得番半個人，有時想搵個人真係撐你、支持你、信得過，慢慢變咗係另外一半嘅自己，好微妙，我知道佢好錫我，我係好唔想佢唔開心。佢有時做啲嘢可能令我唔開心，但原因都係錫我。」
太太嚴防 有女埋身
原來早前Hugo在《巨輪II》內飾演奸角出位，吸引到一眾女士跟她合照，太太因而變得緊張，但他亦十分體諒，完全沒有怪責老婆：「譬如有第二啲女仔埋嚟，佢好快有啲感應，覺得呢個人有侵犯，我就feel唔到，但佢嘅目的就係緊張你、唔想冇咗你，佢冇錯㗎喎！」夫妻相處難免會有爭執，Hugo和太太也不例外，但吳岱融也會主動和好：「有時鬧交，我哋會自動停咗、唔再嘈，第日通常係我講番嘢先，其實已經算係say sorry。」
不忍心見太太辛苦
Hugo近年密密接job，原來太太嚟緊亦會再演戲：「嚟緊都會有，我唔方便公布住。」但大男人性格的吳岱融卻直言比較自私，不想太太辛苦：「我自私啲，唔想佢太辛苦，始終拍劇太多嘢要兼顧，但佢都鍾意玩下。」
除了Hugo和太太，吳岱融笑言囝囝亦有演戲潛質：「肯定有啦，我成日俾佢呃㗎，哈哈，我本身都係大細路搞搞震，佢又有佢冇喱正經嘅一套，但佢喺出面唔會咁，我同佢講尊重人好緊要，諗清楚嗰個人玩得先好玩。」
新加坡 香港兩邊走 為一家團聚
Hugo稱囝囝在吉隆坡出世，期後在香港和新加坡也居住了幾年，隨後在大陸番禺居住十多年，笑言成個過程遊牧民族：「其實喺佢讀書過程要佢走嚟走去，我都有啲對佢唔住，最主要我想屋企人一齊。」他寄語兒子不用追求富裕，最緊要活得開心：「我又唔係想佢飛黃騰達，照顧到自己、開心最緊要，好似我咁，唔一定要賺好多錢。我都58歲，仲有兩年登六，嚟緊都諗住可能TVB一部、國內或者其他一部就夠，唔想搞到太辛苦，做餐死突然間死咗點？」
新加坡、香港兩邊走
太太和仔仔在新加坡生活，這位100分丈夫和爸爸不介意新加坡、香港兩邊走，不用工作便會回去與家人團聚：「我好想盡可能一家人一齊，唔好分開，我 唔使開工就返去。」他認為新加坡較適合太太和仔仔居住，：「我覺得我個仔比較適合喺新加坡生活，人與人之間嘅壓力冇咁大，太太又比較怕凍，新加坡可能適合 佢多啲。」
太太不在身邊，又曾被拍到他自己去茶餐廳食飯，但吳岱融亦沒有覺得寂寞，表示太太陪住仔仔令他更放心：「佢陪個仔我又放心啲，佢返去十日八點，返嚟十零廿日，佢辛苦啲，湊緊兩個仔，有時我去第二度做嘢佢又會飛過嚟。」
