囡囡出世啦! 張繼聰 肉赤老婆生B痛 自願代生
太太同囡囡都好叻
今日下午5點左右，戴眼鏡、身穿黑色外套的阿聰終於在醫院門外現身，佢先企定定、笑容滿面俾在場傳媒影相，其後又向在場人士送上曲奇餅及飲品。阿聰透露女兒在下午三時多出生，重7磅半，係開刀出世。佢剛才陪太太入手術室，讚太太同囡囡都好叻，好快就順利出生，好快聽到喊聲。
估唔到臍帶原來係咁粗
今次阿聰亦有幫手剪臍帶，佢記得上一次望到臍帶時嚇到個心離一離，因為估唔到臍帶原來係咁粗，而今次亦剪咗三吓先成功！阿聰指自己今次盡量表現得堅強，而醫生亦叫佢講講笑令太太放鬆，但嗰一刻腦袋一片空白，只係不停講「加油啊，加油啊」！
肉赤老婆生B痛，希望代生！
「成個過程好感動，太太好叻，囡囡都好叻，好快就出咗嚟！醫生有叫我同太太講多啲嘢，但嗰一刻我唔知講咩好，只係好似小學雞咁同囡囡講加油！」阿聰仲話見到個手術過程，好戥太太心痛！「女士係好偉大，我哋2個就夠晒數啦！除非可以由男士代生啦！」果然係愛妻號啊！
囡囡報夢揀名叫Karina！
囡囡中文名叫張靖，英文名Karina，其實呢兩個名都有意思㗎！「中文名係我同太太都鍾意呢個靖字，有恬靜，安靜的意思，英文名Karina就係嚟自一個夢，當時太太懷孕一個月左右，我發夢見到有個好可愛的小妹妹，佢話自己想叫Karina，同埋想同媽咪一樣有KA開頭！嗰陣都未知係仔定女，可能係個女報夢俾我啦！」
停工2年湊囡？
太太幾日後先出得院，不過阿聰就要繼續拍劇。「其實劇組好好，會特登幫我調時間，我除咗拍劇，其餘時間都會陪住太太。」問到太太是否會停工湊女？阿聰就話：「我見佢望住囡囡嘅眼神，可能要停工2年先得啦！」
被問到大仔張瞻見過妹妹未，阿聰表示囝囝朝早問可唔可以唔返學，一齊等待妹妹出生。不過阿聰認為女兒出生都係兒子放學後的事，所以張瞻都係乖乖返學啦！阿聰稱兒子稍後時間會由家人接送到醫院，佢亦好期待兩個小朋友見面的一刻。
阿Kay去年完成出道十年「拾回謝安琪數愛世界巡迴演唱會」後，便宣布暫別樂壇，努力造人。上星期更有消息傳出佢已入院生B，原來只係虛驚一場。近日仲見到阿Kay同朋友飯局，本以為離生B仲有一段日子，估唔到B女今日已搶閘出世啦！
