陸永扮Do姐超神似 Do姐爆笑拍爛手掌
廣告
適逢50周年台慶，昨晚無綫《萬千星輝賀台慶》有全台藝人大晒冷，50位男藝人及50位女藝人載歌載舞，這類大堆頭表演已經司空見慣，反而搞笑趣劇環節令人驚喜，當中農夫的陸永和C君分別模仿鄭裕玲(Do姐)及曾志偉，一出場已叫人忍俊不禁，陸永更將Do姐的外型、語氣及口頭襌完美演繹，難怪Do本人都拍爛手掌！
撰文：Sunday Kiss
圖片：TVB《萬千星輝賀台慶》
陸永扮Do姐超神似
今年台慶的趣劇「50周年藝員訓練班面試日」為主題，由一眾藝人模仿多位明星，其中分別模仿Do姐及曾志偉，一出場已經全場爆笑！陸永穿上白色套裝裙加上一頭長曲髮，儼如Do姐在《男親女愛》中的造型，出場時一句「哎呀快快趣啦！好鬼眼瞓」舉手投足及語氣都跟Do姐似到不得了，坐在場邊的Do姐都唔知好嬲定好笑！
陸永扮Do姐：「低級！」
之後志偉哥都加入搞氣氛，對陸永說：「我唔係好知你扮邊個，但你個身形同身材好似Do姐喎！」陸永即時回應一句：「低級！」神複製Do姐的反應，又引來全場爆笑！
Do姐爆笑拍爛手掌
陸永與Do姐在《Do姐去Shopping》等節目多次合作，Do姐的小動作、口頭襌等早已牢記腦中，難怪今次表演發揮得淋漓盡致！陸永臨走前都要加多句：「好鬼低級架你幾隻嘢﹗」確實係唯俏唯妙，本尊Do姐都拍爛手掌！
C君扮曾志偉：「打和！」
陸永扮Do姐精彩，拍檔C君亦唔差，見佢頭戴啡色帽及身穿灰色馬甲，明顯係向志偉哥某月餅廣告的造型致敬，然後佢再以高八度的米奇老鼠聲線講一句：「打和！」寸爆對方在《獎門人》中經常以打和作結，站在旁的志偉本人都忍唔住要教訓佢！
Do姐大讚陸永扮得似
今日Do姐、陸永、C君及黃翠如等人，到尖沙嘴出席《Do姐再Shopping》記者會，提到昨晚陸永反串自己唯肖唯妙，Do姐大讚對方演出搞笑，相當驚喜，因為自己事前並不知道內容；佢又稱C君扮志偉同樣神似，「『打和』兩個字搞掂！」昨晚節目後，更令人期待《Do姐再Shopping》中，Do姐和農夫兩子會擦出甚麼火花！
