蜘蛛女鄭麗莎 要生夠半打！

28歲的Lisa一直保持健美身形， 自懷孕後， 腹部肌肉變大肚髧，她笑言花了好長時間接受身形改變，感覺肌肉已變成脂肪，但為了胎兒.想，她不能再做劇烈運動，要改做平心靜氣的瑜伽和步行，盡量保持健康體態。

兩屆搶包山后
在運動界百足多爪的「蜘蛛女」，最擅長速度攀登和健美，12歲至今，奪得30多項個人冠軍，更衝出香港登上世界第一，但該兩項運動並非香港主流，未受大眾關注，直至2011年到長洲搶包山封后，全港市民收看電視直播，才令她一舉成名。

「搶包山係無心插柳參加，以前都唔知有呢個比賽，諗住去玩吓，一玩5、6年，近幾年先開始有女子冠軍誕生，所以比較矚目。」搶包山2005年復辦，Lisa兩年後開始參加，與一班男將你爭我奪。2010年增設女子組，之後她連續兩年封后，2012年更以939高分，超越男子組冠軍66分，絕對巾幗不讓鬚眉。不過，Lisa今年懷孕，要暫時放下比賽，不排除下年捲土重來。

壞女孩變攀石冠軍
運動可以扶起讀書不成，甚至誤入歧途的青少年，Lisa是一個絕佳的借鏡。她出身自基層家庭，在屋邨長大，11歲剛踏入青春期，接觸了不良分子，成為暴風少女。「父母終日忙於工作，所以我自由度好大，喺屋邨誤交損友，本身讀書又唔叻，受朋友影響聯群結黨，成日落D、食煙，處於反叛期咩都想做。」幸好「暴風期」只維持一年左右，12歲一次攀石運動，令暴風少女走回正途，「我喺學校冇成功感，12歲喺社區中心參加攀石活動，發揮到自己天性，我係唯一一個女仔爬到上頂，落到嚟有好多人鼓掌，嗰一刻有好大成功感，運動係可以令一個人轉向。」巧合的是，Lisa的啟蒙教練正在附近，發掘了她的潛能，開始正式系統訓練，之後加入港隊，南征北討爭奪獎牌，一攀十多年，成就了今日的她。

三料健美小姐
Lisa攀過高峰後，慢慢轉型玩健美，從頭開始，先在本地參賽，慢慢擴展到亞洲，甚至世界舞台。「就讀運動管理及訓練學高級文憑時，老師係健美總會委員，佢發掘咗幾個有muscle嘅女仔參加健體小姐比賽，以前對健美運動認知好含糊，原來鬥fit之餘要鬥靚，覺得自己有得發展，就慢慢由攀石轉型到健美。」2006年她摘下香港健體小姐冠軍，之後連續6年封后，2010年她更一舉奪得世界、亞洲及香港健體小姐三料冠軍，登上健美生涯高峰。

從壞女孩變世界冠軍，Lisa以過來人身份建議父母，必須多與子女溝通，並讓他們多嘗試不同運動，取得成功感，自己教仔亦一樣，「我諗番以前經歷，都係同父母缺乏溝通所致，我都唔想阿仔學壞，我行過呢條路，知道咩應該做唔應該做，會同佢多啲溝通，希望佢喺安全情況下嘗試新事物，如果佢投入到運動，就會識得選擇。」

懷孕多做瑜珈步行
未來三個月，Lisa的喜事接二連三，首先她有份開辦兼任導師的健身中心，八月開設第二間分店，同時她的首本自傳面世；她亦不斷進修學習新領域，現就讀香港演藝學院戲劇教育碩士，九月開學升讀二年級；十月初更三喜臨門，將與丈夫Calvin迎接首個小生命。「成個懷孕過程我都好開心同好興奮，依家期待倒數三個月，希望BB快啲出世！」

Lisa已懷孕七個多月，但肚皮未算好大，可能與fit爆身形有關，背面看來都不似大肚婆，她笑稱肌肉已變成脂肪，尤其手手腳腳，因為首胎要謹慎，需暫時放下最愛的劇烈運動，改以步行來保持運動量。「我一星期大概行三至四晚，夜晚食完飯坐一陣就同丈夫落公園行路，行到運動場時，丈夫去跑步，我就喺花園兜圈行，成個過程大約個半鐘，返到屋企覺得唔太，又出到少少汗，呢個運動強度幾適合自己。」每晚睡前，她會做瑜伽放鬆身心，「瞓覺前15分鐘拉吓筋，紓緩關節，並提升柔韌度，做完心情好輕鬆，瞓覺舒服啲。」

老公緊張100倍
懷孕期間，丈夫Calvin貼身照顧，比她緊張一百倍，Lisa笑說：「我性格比較粗心大意，好隨和，咩都冇所謂；而老公係好細心，佢追我嗰陣已經係咁，哈哈！所以佢成日驚我照顧唔到BB，又驚我行得太快、要我着健康鞋、坐得好啲、驚我凍親……不過我係鍾意佢夠細心，先同佢一齊，佢係一個好爸爸，咩都未雨綢繆。」

從事飲食生意的Calvin與Lisa結緣，亦始於運動，在健身室相識，起初Calvin不知道她的運動員身份，只覺得她與眾不同，拍拖期間常結伴做運動，「佢係跆拳道黑帶，我哋好多運動知識上嘅交流，佢能文能武，喺外國返嚟讀書好叻，做過翻譯，我覺得佢好有才華。」Lisa提起丈夫甜絲絲，眼前的烈女已被愛融化。

想BB學全能武術
看着肚子一日比一日大，Lisa和Calvin對將來已抱很大期望，不是一個，而是六個B的期望，「依家只係第一步，我哋想生夠六個，已經幻想緊將來有男有女，一齊生活一齊玩，好多人話要開始諗學校、讀書方面，以前未入呢個圈子，唔知箇中感受，依家開始為將來感到愈來愈忙，但係好開心。」

Lisa作為運動員，都寄望BB接棒，最好有一身好武功！「我想俾BB玩中國武術，我細個冇做到，冇乜機會接觸，所以想俾BB試吓。武術可以培養小朋友武德，而且可以喺舞台上任意發揮，我希望佢全能發展，刀槍劍棍都要識，自己嘅套拳亦能打出來。」Lisa打算讓囝囝三、四歲便接觸武術，長大一點再教攀石和健美，看看他想接班做蜘蛛仔、小包山王、小健身先生，還是新一代宇宙最強？

運動戰績
2011-2012 長洲搶包山后
2004-2011 香港女子速度攀登第一
2006-2011 香港健體小姐冠軍
2010 世界健體小姐冠軍
2010 亞洲健體小姐冠軍

撰文：Ling
攝影：黃大立
（部分相片由受訪者提供）
服裝：Liujo、Hayabusa
場地：Hayabusa Martial Arts & Fitness Center（tel: 2511 2110）