【小創夢家】協恩羽壇新星 奪青奧混雙金牌

升學路途極順
好多家長都知道，「一體一藝」係香港學生的必然裝備，而Yoyo在運動方面就較有天分，自K2開始學打羽毛球，已經有不錯的成績，在教練的引薦下，升讀有「羽毛球兵工廠」之稱的馬頭涌官立小學（紅磡灣），代表過學校參加小學學界田徑及羽毛球比賽，賽績絕對見得人。到升中時，因仰慕協恩的校風純樸，又有完善的體育資源，所以就參加了協恩專為運動員而設的面試。「當時學校仲未轉直資，為運動員而設嘅面試會遲自行分配少少，不過內容係一樣嘅，見校長，問吓家庭背景、小學嘅練習時間係點，屋企人支唔支持做運動員等等。」最後Yoyo當然如願入到心儀中學，她除了為學校橫掃學界羽毛球賽的錦標外，亦曾代表學校參加過學界越野賽，「協恩嘅學生都團結，只要係為咗學校，大家都好肯去衝。」

讀完中五想停學
雖然一直升學路途極為順暢，不過Yoyo亦坦承因為自己大部分時間都放在練習上，學業成績一向都「麻麻地」，有時甚至會追不上進度，所以她正考慮完成中五之後停學，轉做全職運動員。「因為10月中就係亞洲青少年賽，所以嚟緊嘅訓練只會更加密集，我同父母商量過，與其兩邊兼顧，但係兩邊都做得唔好，不如先把握時間，專注打波。」在Yoyo的考慮過程中，其實亦參考過不少師姐的親身經歷，如現今香港羽壇的領軍人物黑妹葉姵延，當年亦是在完成中四後停學，轉為全職運動員，至2012獲得香港教育學院取錄，以兼讀形式修讀為期兩年的健康教育榮譽學士課程。「讀書幾時都可以，我想趁自己狀態好嘅時候打好啲波，將來去打亞運，甚至2020年嘅奧運。到退役，先再用運動員嘅身分，去報一啲同體育有關嘅大學課程，相信都唔會遲。」

首戰青奧 盼贏混雙
2014年夏季青年運動會正在南京進行得如火如荼，今屆港隊派出18名運動員參加8個運動項目，當中羽毛球及高爾夫球更是首次派代表參加，Yoyo身為女子組代表，將出戰單打及混雙兩個項目，由於對手都是來自世界各地的強敵，故心情亦甚緊張，加上今屆賽事有全新規則，對她來說更是一大挑戰。「單打啲人太勁，日本、中國同泰國實力都好強，所以唔敢諗會贏。反而混雙一向成績好啲，所以信心大啲。不過今年大會玩新制，會以抽籤形式決定拍擋嘅球手，我抽到同馬來西亞嘅選手一team，佢係世青排名第四，而我就排60幾，雖然之前又未夾過，不過我本身擅長為對手製造機會，所以混雙會有信心啲。」其實早在2012年倫敦奧運後，奧運金牌球手李雪芮曾隨國家隊來港參加表演賽，當時被安排與她對戰的正是Yoyo，不過當時Yoyo並無怯場，與李雪芮球來球往，最後僅輸4比5，雖敗猶榮，實力亦得到對手及觀眾的認同。「其實我覺得佢係就住我嚟打嘅，不過可以同國家級運動員砌磋，真係好難得！佢之後送咗個羽毛球袋俾我，可惜冇機會同佢傾偈。」

吳芷柔(Yoyo)
年齡：16歲
就讀學校：協恩中學(升中五)

重要獎項：
2013-14年度全港學界精英羽毛球比賽 – 女子單打冠軍
2014 Yonex荷蘭青少年賽 – 混合雙打冠軍
2013中銀香港全港青少年羽毛球錦標賽(98-00年組) – 單打及雙打冠軍
2013-14年度中銀香港紫荊盃傑出運動員(羽毛球組)

撰文：Joanne
攝影：Simpson(部分相片由受訪者提供)