DSE狀元 摘星秘笈

港同爆冷誕兩狀元

今年11位狀元除了來自傳統名校外，也有地區名校及新派直資學校跑出。皇仁書院繼續稱霸狀元榜，今年再添兩名男狀元，四屆DSE共誕生7位狀元，至於表現平穩的嘉諾撒聖瑪利書院亦再誕兩名女狀元。聖保羅男女中學去年氣勢如虹出3名狀元，今年則未有蹤影。神級女校拔萃女書院首誕女狀元，最驚喜是創校僅9年的直資龍校港大同學會書院，亦首次誕生兩名狀元，可謂雙喜臨門。另外3間地區名校分別出產狀元，包括藍田聖保祿中學的黃海旋、北區香港道教聯合會鄧顯紀念中學的鍾易，以及屯門順德聯誼總會梁銶琚中學的高梓諾。其中來自皇仁書院的林銘端及英皇書院的陳樂邦，在數學延伸部分中取得5**的成績，晉升為「超級狀元」。

皇仁狀元 寫筆記對付中文科

「狀元王者」皇仁書院向來是傳媒的焦點，每年都被「貼中」必出狀元，今年依然沒令大家失望，再接再厲誕生兩名狀元，其中一位更是超級狀元。狀元之一的張滌豐獲15*，成績相當彪炳。滌豐在學校的模擬考試中預計成績沒實際成績高，不過模擬考試令他知道自己的弱點，可以在DSE前再作針對性改善。他屬於勤力型學生，坦言想考好成績從來沒捷徑，只有勤力溫書和做練習。「我會重複溫syllabus，溫一次只係短暫記憶，如果要化為長期記憶就要不斷翻睇。中文、英文同通識科都會寫筆記，抄低一啲名句、佳句睇吓作文時用唔用得着，另外記低一啲有爭議性或者有價值嘅新聞，對通識考卷有幫助。」理科出身的滌豐認為文科較難掌握，曾為穩定自己軍心而補習中文科一兩個月，後來靠自己克服對中文的恐懼。他中四、五參加學校安排的社會服務，性格樂於助人又喜歡與人溝通，過去曾參加港大、中大舉辦的醫科活動，令他看到醫生們的熱誠，因此想以醫治疾病去助人，並已選定港大醫科為首志願。

港同女狀元 操廿年past paper

位於黃竹坑的直資英中港大同學會書院（下稱港同）於2006年創校，短短9年至今屆DSE成績相當優異，其中11人考獲最佳5科28分或以上的成績，並誕生一男一女狀元。該校與位於柴灣的直資名校港大同學會小學結龍，提供12年中小學課程，兩名狀元均是由小學部直升上中學部的同學。女狀元譚樂敏（Melody）預期自己考獲2至3科5**，最終成為7科5**狀元完全是意料之外。Melody溫書除了寫筆記，更狂操20年past paper！「我最後一年溫書衝得最勁，中五上學期開始做past paper，學校有俾past paper我哋做，不過同學未必期望咁高，可能諗住攞4就得，只操10年左右。我自己期望高啲，會操多啲，問師姐攞多啲past paper做，做成20年，每年做足五、六次。」她覺得「死亡之卷」中文科最難，「中文校內外出題可以差好遠，尤其作文題目變化大，考口語又有好多估唔到嘅情況，有時會遇到對手壟斷發言，可能校內可以講到四次，出面講得兩次。」

谷通識日日睇報紙

面對通識科，Melody曾試過100分考得50分，她認為如能掌握每種題型的答法，比看教科書更有幫助。「我會睇多啲新聞，本身只係鍾意睇報紙或者我有興趣嘅topic，政治人物關係好亂我通常會『飛』，但因為通識科會留意多咗，養成每日睇報紙嘅習慣，多啲關心時事。」她也有補習，不過都是短期性質，中文科在DSE考前半年參加補習班，主要改作文，英文科於考前二至三個月報讀精讀班，通識科則以一對一形式集中補題型。Melody首選港大工商管理學學士及法學士雙學位課程，將來有意投身法律界。她感激小學母校的栽培，「小學對我影響好大，我幼稚園接受填鴨式教學，小學相對冇咁催谷，鼓勵我哋睇書，令我睇咗好多課外書，英文基礎打得好，反而鍾意咗讀書。」上年她參加港大的暑期工商管理課程，很多名校生參加如St. Paul Co-edu（聖保羅男女中學），她感嘆當時沒人認識港同，相信現在港同名氣應該急升。

睇名人事跡 豐富寫作

港同另一位男狀元郭俊勤（James）認為今次考獲佳績，除了努力外，是臨場發揮加上運氣搭夠，試題都是他掌握到的。James謙稱成績一向在中上水平，至中四升中五成績才開始較突出，與掌握到溫書竅門大有關係。「我養成寫筆記嘅習慣，除咗英文同數學科老師會俾筆記，其他科我都會自己做筆記，尤其係理科，消化完內容再做筆記，記憶會深刻啲。點都要做past paper熟習題型，做咗十幾年。」港同英語水平高，英文科是他們的強項，學生最怕的多為中文科，「中文題型變化多，老師教過嘅既定答法，評論題有邊幾個必有部件，我都會嘗試用番。考DSE前嘅study leave我每日做一至兩篇文言文，將篇文譯番白話文，對番睇吓有冇錯，記低啲常用字詞。我擅長寫議論文，會search名人事跡睇，作為議論文嘅例子，同埋口語嘅實證。」

聖瑪利狀元 組溫習小組

四屆DSE之中，嘉諾撒聖瑪利書院三屆都登上狀元榜，今屆兩位女狀元之一的黃沚堯共獲15*。「我一日做一至兩份past paper，過程中最重要係對答案，知道錯喺邊，唔係做十幾年就得。」有考生試前盡最後努力開夜車，沚堯在放假溫書期間則作息定時，一日瞓足8個鐘，「休息好重要，如果嗰日進度唔錯，就可以做吓運動。學校支援已經好夠，唔使科科都補習，放學後仲要補習好大壓力。我通識科表現唔係咁穩定，所以有參加mock卷班。」她與同學組成通識溫習小組，揀選各自擅長的單元及議題一起討論，互相激發思考。今次接受訪問的四位狀元都選擇在本地大學升學，沚堯參考過很多留學資訊，最終決定留在香港讀書，「我對香港嘅大學有信心，會入咗本地大學先，再慢慢探索係咪去海外進修。」她對心理學有興趣，中四參加科大的心理學課程，令她想做心理學家的志向更堅定，現時首選港大社會科學系，打算主修心理學。

●撰文：Irene Lok
●攝影：Paul Choi、新傳媒資料室 （部分相片由受訪者提供）