反思「射精論」 麥明詩 媽媽：要贏在平衡發展
人生需有挫折不要怕輸
在《沒有起跑線？》一集中，有位奪獎無數的小女孩視Louisa為偶像，更到她家中拜訪，Louisa分享道，人生不一定要常勝，有挫折更能豐富閱歷，而近日為了拍劇，她多閱了演技進修的書，指一位出色的演員，多從複雜的人生經歷磨練出來，才有今天的成就，所以她鼓勵小妹妹，不要怕輸。 Silvia也認為，孩子根本毋須學十八般武藝，適可而止就算了，「參加太多課外活動，小朋友可能會覺得生活太大壓力，產生負面情緒。嚴重者可引致不喜歡上學、焦慮，甚至覺得沮喪，效果反而唔好。」 她指Louisa小時候，一起商量過後，不希望女兒花太多時間學十八般武藝，於是她選了兩至三樣喜歡的參加。學業也一樣，不可以只集中書本上的學習，簡而言之，就是要平衡生活，學業、課外活動和一家人的天倫之樂，三方面平衡發展。
觀察力比時間更重要
麥明詩 和哥哥麥明山生於小康之家，爸爸麥卓生是中學副校長，媽媽是資深職業治療師兼教育碩士。除了Louisa出世頭三個月，Silvia請了產假之外，她一直擔任在職媽媽，工作家庭兩邊兼顧。能在珍貴的家庭時間中，教出兩名出色的孩子，兒子畢業於中大醫學院，現為見習醫生；女兒更取得會考十優、畢業於劍橋法律系，再成為港姐冠軍。究竟這位在職媽咪如何育成出色的孩子？ 「我同意我個女所講，我嘅觀察力好強，識針對小朋友嘅問題同長處，觀察力嘅準確度比用幾多時間喺小朋友身上更重要，例如我留意到Louisa細個缺乏自信，於是我就針對並復修佢嘅不足，好似將兩兄妹放於不同學校，減少兄妹比較。當佢增強番自信，佢就可以增強番能力。」
平衡自由與權力
子女出世後，她進修過許多幼兒發展深造課程，而修讀教育碩士和資優教育的課程時，也閱讀了許多外國文獻及研究。她從研究中，發現了所有育兒問題包括提升專注力、記憶力、創造力、抗逆力、自信心等根基，都來自「自由與權力的博奕」，即家長應按孩子的年齡，去衡量給予幾多權力與自由，過緊大壓力，過鬆則放肆、被溺愛，將來不能適應社會，影響自信心及抗逆力。那應該如何平衡兩者？Silvia給予一些參考：「 自由與權力的博奕是一門藝術，幾時俾權力、自由，點拿捏準確係唔容易，亦冇標準答案，但呢種藝術做得好，教個小朋友就易好多。外國有研究過兩批小朋友，一批喺有適量規範下成長，一批就任由小朋友自由發展，結果發現有規範嘅小朋友，將來嘅學業、快樂指數同人生成就，都比冇規範嘅小朋友高。」
0至12歲的玩具教育
年幼時期除了在規範下學習，Louisa曾講過，與哥哥由細到大玩好多玩具，媽咪從不吝嗇買玩具，件件皆有益，Silvia解釋道：「小朋友零至12歲腦部生長得好快，所以一定要把握。我從來唔會加額外功課俾佢哋，亦唔會喺側邊陪佢哋溫書、check功課，我只着重透過玩具、遊戲同生活經驗三方面，去刺激仔女嘅腦部發展。」 腦部發展好，就自然有智力處理學業。只要按年齡選取合適的玩具，就能事半功倍，「細個仔女未識玩玩具，我已經會搵Visual tracking toys（視覺追蹤玩具）俾佢哋，好似有啲馬騮玩具，隻馬騮自動走上頂，再沿瀡滑梯落嚟，佢哋眼球會跟住馬騮郁。仲有一啲日常物品可以玩，例如兩個月大隻手未識揸嘢，我就將聖誕裝飾彩條放喺佢哋手上，手一郁，彩條就郁，佢哋對眼跟住望，係早期視覺認知訓練。」三歲前可以玩積木，一塊塊疊高，放得歪就會跌，從而學識空間概念。
不求結果享受過程
兩兄妹小時候經常出街玩，到海灘玩泥沙、種植、玩波波池都有，Silvia每日都會安排遊戲時間，不會一味死讀書，返學補習做功課直落。「玩泥沙、跳繩、去公園玩等活動可以刺激唔同感官，感覺處理能力先會健康成長，如果呢啲能力有障礙，都會影響學習。」 第三是生活經驗，學習不能紙上談兵，必須實地觀察，「例如分辨速度同質量，一隻大船同一個細波比較，大船行得慢，波就飛得快，但隻船撞埋碼頭都好有衝力，呢啲要帶佢哋出去觀察先感受到。而我教佢哋認字都唔係用本書，而係出街指住exit、restaurant去教佢哋點串。」 Louisa多年來透過這些學習方法，在無壓力下培養了自學、發掘知識的精神，能考到10A，主要都是靠自己，媽咪只有從旁輔導，因為她已夠成熟去處理自己學業。Louisa自言有今天的成就，絕對源於媽咪的培育，「媽咪從細培養我態度就係，有經歷已經贏咗，要識欣賞每一樣嘢嘅過程同學習機會。人生好多時唔係睇結果，結果只係一刻，但過程好長，如果只為一刻結果係唔值得，所以媽咪着重教我享受過程，尋找得着。」
●撰文：Ling
●攝影：Clay Lam (部分相片由受訪者提供)
●化妝：King Yip@KINGS MAKEUP
●髮型：Jamie Lee@HAiR
●造型：王碧姬
●服裝提供：Gianvito Rossi, Melissa, REDValentino, Ted Baker, The 9th Muse
●場地： comma party (tel: 9735 6464)
