拒絕催谷學業 林嘉欣低科技湊女
撰文：Ling
攝影：Clay Lam （部分相片由受訪者提供）
從大銀幕上，能欣賞嘉欣更成熟的演出；在鏡頭下，她同時發布兒童繪本，分享她與女兒的相處點滴，逛逛美術館、去公園玩耍。她謝絕一切電視及電子產品，實行「低科技教育」，一家人回歸生活基本學習，「我要keep住個女對學習嘅興趣，太早要佢哋練寫功課，學習九萬樣嘢，會令小朋友對學習反感。」
為女兒走入平民
「有咗小朋友之後，我覺得自己勇敢咗好多，令我敢於體驗生活、跳出artists框框，我會同小朋友搭巴士、小巴，普通家庭做嘅嘢，我哋都會做。」嘉欣為了女兒暫別幕前，當上全職媽媽，只間中出席品牌活動及配音工作，這五年的家庭生活，她最感動是女兒的純真及對媽媽最直接的愛。「小朋友係好直接，唔會好似大人諗嘢諗餐懵，佢哋一感覺到你唔開心，一個擁抱就會化解晒所有問題，所以有咗小朋友之後，無論工作上有幾困擾，一返屋企開門佢哋大叫：媽咪！你已經忘記晒嗰日嘅煩惱。」
五年前，嘉欣未婚懷孕，一切工作突然叫停，遠赴加拿大與廣告導演袁劍偉舉行簡單婚禮，並在當地誕下女兒Kayla，開始全職湊女。一向喜歡小朋友的嘉欣，前年再添細女Sofie，組成幸福四口之家。一講起兩個女，嘉欣就笑逐顏開，「我兩個女，大女就好sporty，見到樹就爬，見到沙灘就會除鞋，喺遊樂場都除鞋，佢好鍾意爬來爬去，好活躍；妹妹就比較文靜，所以好得意，兩個差別都好唔同。」
姊妹爭執不介入
嘉欣坦言兩個女不易湊，孩子在不同階段皆有不同難題，重點是要從難題之中，輔助孩子建立正確價值觀。「唔同階段都有好同唔好，遇到唔好嘅時候，要俾佢哋知道父母嘅愛，不在於佢哋乖唔乖，無論點父母都會愛佢哋，但做錯事點都有後果，要學識尊重自己、尊重別人、對人有禮，一路建立屬於佢哋嘅價值觀，一齊向好方面發展。」
姊妹爭嘢玩在所難免，嘉欣選擇退後一步觀察，不會介入造成「三個女人一個墟」，「我一向由得佢哋，兩姊妹有時會打交、爭嘢，之後又喊，我就忍住唔衝入房，慢慢佢哋就會化解個問題，好似家姐話『好啦，我借呢個俾你啦。』如果我一聽到喊就衝入去，佢哋就永遠唔會自己解決問題。」
謝絕電子產品學習
社會教育議題近日聚焦TSA，太多功課及溫習令孩子負上沉重壓力，嘉欣覺得現今教育太着重學術方面，應把焦點放回小朋友的品格上，「一個人好成功，但你冇品格，就唔係真正成功。」關掉電視及電子產品，能撥出更多時間做益智活動，嘉欣深信生活就是最好的老師，小朋友毋須上playgroup，在家做做手作、繪畫、閱讀，出街逛美術館、行沙灘、去遊樂場玩，已經有足夠的學習空間。「我本身都好少睇電視，淨係入戲院睇戲，等啲女瞓晒我先開電視睇戲。睇電視學習太被動喇，小朋友智力發展未完善時，成日睇電視會扼殺想像空間，而書本描述一個太陽，可以係黃色、粉紅色、紫色，好多幻想空間，但電視播出嘅太陽，只係一個結果。」
去美術館學情感發洩
醉心藝術的嘉欣，經常帶女兒到不同美術館學習，今次推出的其中一本繪本《和妹妹去美術館》，就寫了母女睇畫展的有趣經歷。「小朋友嘅直覺好準確，有佢哋自己角度去睇畫，我喺佢哋身上都學習到好多。書中其中一頁講我哋睇美國著名畫家Jackson Pollock（以獨特滴畫成名，性格暴躁及酗酒）嘅作品，我同個女講下次你發脾氣時候，記得將你嬲嘅情緒畫出嚟，我覺得咁樣幾好，令佢學識用呢個channel宣洩情緒，對佢又好，對我又好。」嘉欣在家亦喜歡做手工藝，感染女兒一齊搞手作、玩陶瓷，「通常都係我想做先，例如我哋喺沙灘執咗貝殼，拎返屋企我開始填顏色，我個女就問：『媽咪你做緊咩呀？我又做！』於是營造到個氣氛。」
四歲前不執筆寫字
女兒在香港長大，始終都要面對現實，嘉欣為女兒找學校時，難以尋找與其教育理念相近的學校，最終Kayla入了一間好少功課、活動教學的本地幼稚園。「佢依家間學校話四歲前唔會揸筆寫字，你可以迫佢、訓練佢，但始終佢肌肉未發展完善，咁早揸筆其實都好影響日後寫字同姿勢，我覺得唔同年紀應該學番合適嘅嘢，要按能力出發，千祈唔好心急。」
老師對Kayla的評價是學習專注、愛閱讀，嘉欣自女兒六個月大即展開親子閱讀，習慣是需要時間培養，「首先屋企要有個氛圍，小朋友自小先透過模仿去認識世界，如果父母都成日攞書睇，小朋友都會模仿，所以細細個開始我就同佢哋共讀，每晚瞓覺前都keep住睇故事書，唔係我讀就爸爸讀。」
港教育制度商業化
嘉欣教女重視身教、學習氛圍，語文方面因為她有台日血統，所以用國語和女兒溝通，丈夫講廣東話，婆婆都講國語，好自然學起中文雙語。「以前都係爸爸同我講廣東話，媽媽講國語。我外公係日本人，我都識少少日文，但冇教佢哋日文，始終我只識啲好基本，我唔應該勉強佢哋去學。」大女Kayla已經五歲大，準備要報考小學，令嘉欣覺得好頭痛，「香港教育制度比較商業化，好難搵到一間符合我哋價值觀嘅學校，依家偏向想揀着重中文嘅學校，喺香港唔學中文係好可惜，而且中文難學好多，希望可以搵到一間好嘅中文學校。」
與曱甴對話
一見到曱甴爬出來，父母必立即殺個片甲不留！林嘉欣教女崇尚生活化學習，即使曱甴都是生活教材，有次大女Kayla見到曱甴不但沒驚慌，還好似電視劇《男親女愛》黃子華與小強般做了好朋友，嘉欣在旁觀察沒阻止，反而覺得有趣，還尋回自己失去了的童真，即刻去片看看她的分享。
