【小創夢家】「世界跳繩王」 何柱霆 多得媽咪放養
撰文：Ling
攝影：Clay Lam
何柱霆 Profile
綽號︰勁量
年齡︰21歲
威水史︰
世界跳繩錦標賽2次個人總成績冠軍
世界跳繩錦標賽連續3屆團體賽總成績冠軍
世界跳繩錦標賽2016男子組4×45秒交互繩速度接力賽冠軍兼破世蹟
首位於世界跳繩錦標賽奪得男子總冠軍的亞洲代表
亞洲跳繩錦標賽2次個人總成績冠軍
全港跳繩精英賽7次個人總成績冠軍
個人三分鐘耐力賽世界紀錄保持者
無書緣就是無書緣
何柱霆 來自普通四口之家，父親出外打拼，母親做全職主婦照顧兩兒，後來一家人搬上居屋，生活穩定，六年前終於全家第一次旅行。柱霆是細仔，在大埔區傳統學校讀書，成績不及哥哥，甚至可用差來形容。媽媽文美嫦曾擔心兒子升中，試過鞭策兒子讀書，但無書緣就是無書緣。小二時，柱霆開始接觸跳繩，一跳欲罷不能，更從此跳上國際舞台。何太笑言兒子沒有因為跳繩發奮讀書，但她早已放開，明白讀書重要，但發展專長更為重要。說話耳熟能詳，但有幾多父母真的看得開？
哥哥細佬資質大不同
何氏一家紮根大埔多年，柱霆出世時租住林村木屋，2003年沙士期間趁低吸納購入區內居屋單位，一家四口有個安樂窩。大仔升小一時，何太決定轉做全職媽 媽，翌年細仔柱霆出世，更加難抽身去工作。兩名兒子年紀相差七年，資質亦大不同，大仔讀書處於中上游，學業毋須父母操心；相反細仔讀書無心機，長期考最後 一批，幸好操行不俗，算聽教聽話。
柱霆小學就讀津貼學校港九街坊婦女會孫方中小學，在區內口碑不俗，學校亦積極推廣運動發展，小一他加入羽毛球隊，被教練要求以跳繩作協調性活動，發覺自己 比其他同學快完成。「我都唔知跳繩係咩嚟，淨係知跳繩練體能，直到小二我喺學校借咗條繩，喺學校後花園跳一跳，有老師見到覺得我跳得幾好，教咗我一啲最基 本花式，我都學得好快，佢就邀請我參加學校嘅跳繩興趣班，原來跳繩都有得學！」
小五首次參賽 勇奪冠軍寶座
學了約兩年，小四的柱霆開始代表學校出賽，「當時我都未完全知道咩一回事，淨係知要跳一套花式，嘗試做好自己。」學校最後奪得優異獎，柱霆初嘗得獎滋味，加上教練鼓勵，「唔緊要，我哋下年加油，嘗試打入頭三名。」
小五柱霆首次參加公開賽「全港跳繩分齡賽」11歲或以下組別，一跳就跳上冠軍寶座！「教練幫我編排咗一套花式，入面加埋30秒速度跳、3分鐘耐力跳，同埋連續三重跳嘅項目，最尾仲有個人花式，就係四個項目入面爭取個人總成績。第一年出去比賽當然緊張，無諗過有冇獎，但最後我攞到11歲或以下總成績冠軍。」這份意外收獲令柱霆驚覺，原來跳繩都有成功感，可以從這方向作長遠發展。
小五生正值升中關口，柱霆興奮過後，不得不面對學業壓力，何太緊張兒子的成績不佳，升了band 3中學就弊傢伙。在學業與興趣之間，何太選擇了學業，「阿媽雖然口話唔理，但個心都會少少擔心，大埔有啲band 3學校真係特別精彩，聽聞個個星期都有警車入去。當時孫方中書院係新校，應該band 2尾，同小學又未結龍，唔係個個孫方中小學生都收，你成績太差點收你？」
何太從閱讀入手，知兒子從不看書，就買漫畫多圖少字，兒子一拿上手就睡着；溫習完英文Grammar，到考試腦海一團糟，「第一題佢記得，之後就記錯晒，唔知佢大頭蝦定無記性。」這段時間母子關係僵着，尤其考試期間特別勞氣，「我知佢成績係呢個位，但都唔想佢再跌落去，升唔到都唔好跌囉。」
幸好柱霆能原校升中，對何太來說已經滿意。對於兩個兒子的要求，她用兩把尺量度，令大仔一度呷醋，為甚麼總是對他嚴厲一點，何太解釋︰「阿哥讀到書，成績中上，有次阿哥問點解自己攞88分我都鬧，細佬攞70分就話去鋸扒。我話因為細佬一向無論點溫都係60幾分，今次70分有進步，但你正常應該有90幾分，以你能力係唔應該。」
兩種資質 要用兩把尺
不同資質要有不同教育方式，亦要做好溝通平衡關係，何太經多番解釋後，大仔也明白事理，自己努力讀書之餘，亦十分疼錫細佬。不過，何太笑言大仔都不能教細佬讀書，「阿哥教佢嘢佢消化唔到，阿哥就會好忟憎，兩兄弟會嘈起上嚟。」
上到中學，柱霆的成績稍稍有改善，何太也放手不理會，關係亦
有好轉，「冇俾老師投訴就得。」直到中五他自己要求補習全科，但補了一年又放棄，最終DSE攞15分，兩母子已經收貨。
失敗再起身 成世界冠軍
讀書不是成材的唯一方法，柱霆相信跳繩才是自己的世界，最喜歡當中的團隊精神，互相支持、互相遷就。2009年中二時，實力已是亞洲頭三名的他重重跌了一跤，第一次參加亞洲賽個人項目連翻失手，自信心跌至最低點。「本身我對自己有信心，因為教練話以我當時水平參加亞洲賽，有少量失手都應該入到頭三名，好似30秒單車步，平時我跳92下，比賽前一日我仲跳到96下，所以我對呢個項目特別有信心，點知比賽我失手過多得番70幾下。」
賽後柱霆哭了一個鐘，直到第二個項目召集仍在痛哭中，「教練叫我放鬆啲，3分鐘耐力賽你kick 10次繩都有頭三名。」因放不下心情，第二項亦連番失手，最少kick了20次繩，只跳到399下得梗頸四，「原來第三名只係400下，我kick少一次已經頭三名，都係衰我過分緊張，完咗呢個項目我又喊，之後三重跳項目又失手冇咗獎牌，我夾埋足足喊咗三個鐘，第二日對眼都未消腫。」
參加了四個項目的柱霆，最後一項個人花式在另一日出戰，教練鼓勵他忘記一切，在個人花式重新開始，「我係時候要學習控制情緒，我攝高枕頭諗咗好耐，比賽當日我嘅水平完全改變晒，我喺個人花式以零失手攞咗冠軍，跳完嗰刻真係超級興奮，我終於做好自己！」
賺不到大錢 仍充滿希望
挫敗只是一個學習過程，只要學識企番身，將來就能跳得愈高，經此一役柱霆成為半精英運動員，當中少不了家人的支持。「每次當有香港跳繩精英選拔賽，爹哋媽咪都會嚟睇我比賽，爹哋喺將軍澳返工，如果我喺將軍澳比賽，佢都會lunch time過嚟睇一陣。」
父母是忠實粉絲
父母除了身體力行撐兒子，上網更會睇盡兒子的比賽片段，甚至比阿仔更清楚，柱霆說︰「父母支持我嘅程度好似fans咁o架，有啲片我都唔知擺咗上網，靠爹哋搵到。每當上網有世界賽、亞洲賽直播，香港凌晨三四點屋企人都會起身睇，佢哋真係超級勁。」
21歲的柱霆，中學畢業後入讀IVE運動教練學高級文憑，比賽以外開始當上全職教練，主要教導小朋友及女生，希望將花式跳繩一代傳一代。面對現今社會價值觀︰運動搵唔到食，柱霆坦言沒有想過，只想趁後生做喜歡的事，「21歲都算細個，我唔想咁快搵份工困住自己，可能到27、28歲開始諗結婚，先搵番份穩定嘅工，不過都會同體育有關。」兒子已長大成人，做媽媽想管也管不了︰「趁後生做佢想做嘅嘢先啦，將來佢自己會識諗，阿媽唔擔心得咁多。」
