中年好聲音3｜張與辰姚焯菲奪最高分失落MVP 樂小姐台下伴唱成焦點
樂小姐現身伴唱張與辰Chantel獲最高分
張與辰與「甜美小公主」姚焯菲Chantel雖然年齡差了一大截，但二人唱出來的《許願》卻異常地有愛情感及火花，配以Chantel近乎無敵的甜美笑容，二人獲得近乎一致好評，肥媽開心到搞爛gag：「好好聽，佢哋係牛油果油溝橄欖油。」張佳添「我feel到有啲真愛喺裏面。」
張與辰姚焯菲獲一致好評 飲恨MVP 觀眾睇唔明
說回評審對張與辰演出的評分，綜藝感十足的森美笑言「投入到一度忘了身邊坐的是肥媽」，故回過神來看清事實後一度「嚇醒」，笑爆全場，至於出名手緊的周國豐，亦難得給予高度評價：「淨係聽聲，一路令我信服你哋係一對戀人。你哋每人都要處理好多和音部分，但你哋兩個都處理得好好，暫時為止係今晚表現最好嘅一對！」車婉婉聞言即忍不住寸嘴：「喺周國豐老師冷血嘅世界，係好少咁樣讚人！」
觀眾盛讚「辰采菲揚」情歌演繹超越原唱
姚焯菲（Chantel）與張與辰在《中年好聲音3》合唱《許願》，以初戀般的和音奪得本集最高95分，獲主持森美盛讚「我投入咗你哋嘅愛情」。網民反應熱烈，紛紛表示被兩人的表演深深打動。有樂迷驚嘆「原來《許願》已經係26年前嘅作品，作為呢個世代嘅樂迷，呢個版本真心超越原唱，好聽到癲」，認為他們的演繹為經典注入新生命。粉絲對Chantel的成長尤為感動，稱「由聲夢《戀愛預告》支持到依家《許願》，見證著小公主Chantel不斷成長，不斷進步，身為小菲象嘅我真係好安慰好感動」。網民更讚揚兩人細膩的舞台表現，「Chantel實力一直被低估，她一直是很強的story teller，今次又展示乜嘢係用歌聲說故事，加上二表情，走位，幾時對望所有嘢加埋令到觀眾投入歌詞意境」，張與辰的編曲才華亦獲肯定，「與辰，一直都好欣賞你的才華，每次你都重新編曲，有技巧有感情，好棒呀」。
MVP獎項爭議 網民質疑評判決定
儘管姚焯菲與張與辰的表演贏得滿堂彩，MVP獎項最終卻由以Rap表現勝出的陳芷盈奪得，引發網民強烈不滿。不少觀眾認為「全晚最好！應該攞埋MVP，佢哋拎唔到我都想喊！」，更有網友直言「今晚好失望😢我心目中嘅MVP應該是與辰+Chantel」。對於陳芷盈的得獎，部分網民表示難以接受，批評「森美冇眼光，亂比MVP，垃圾評判」，並認為「我心目中今晚MVP應該係張與辰或黃博，芷盈嗰段rap都係唔識欣賞」。
張與辰現身答謝支持
張與辰則在個人回應中感謝支持，表示「好多謝大家鍾意我地『辰采菲揚』版本的『許願』❤」，並透露選歌過程的挑戰，「想搵返首主音同和音都好有發揮空間的歌黎唱，最終我地一致揀左《許願》」，期待未來能再次與Chantel合作。
森美感動至眼泛淚光
自封表演是「輕飄飄的歌劇」的黃博及Felix，一開場便各自以超靚聲大玩和音，噱頭十足，Felix出賽前更直指希望可以為「高分王」黃博爭取首個100分。對於二人演出，森美一度被觸動至眼泛淚光，他給予評語時說：「你第一句嘅時候我眼淚爭啲流喇」，至於肥媽亦肯定了二人的靚聲度：「兩個獨自把聲係好靚嘅。」
善玥澄彭家賢妖冶辣身舞搶焦
本集另一值得推介的，是充滿視覺刺激的善玥澄／彭家賢的《芳華絕代》，化上濃妝的二人，七情上面地又唱又跳，更一度埋身熱舞，極盡妖冶之能事，車婉婉笑言看表演時恍如置身 「殭屍嘅堡壘」。
「聲夢合唱」歌單公佈
《中年好聲音 3》本周日（20日）本回合主題是「聲夢合唱」，10 位參賽者將各自與一名「聲夢」畢業生合唱。演出歌單如下：
| 參賽者組合 | 歌曲名稱 | 原唱者 | 發行年份 |
|---|---|---|---|
| 劉洋（42歲）／黃洛妍（27歲） | 你那麼愛她 | 李聖傑 & 林隆璇 | 2005 |
| 陳芷盈（38歲）／何晉樂（28歲） | 誰明浪子心 | 王傑 | 1989 |
| 王鄭浚仁（38歲）／趙小婷（24歲） | 美麗的神話 | 孫楠 & 韓紅 | 2005 |
| 李金凱（38歲）／冼靖峰（26歲） | 甲乙丙丁 | 許志安、張學友、鄭中基 | 1998 |
| 占士丁丁（39歲）／劉芷君（17歲） | Endless Love | Lionel Richie & Diana Ross | 1981 |
| 曹越（37歲）／詹天文（19歲） | 我不離開 | 戴愛玲 | 2015 |
| 趙浚承（38歲）／潘靜文（27歲） | 你最珍貴 | 張學友 & 高慧君 | 1998 |
| 張與辰（39歲）／姚焯菲（18歲） | 許願 | 古巨基 & 梁詠琪 | 1999 |
| 黃博（36歲）／林智樂（21歲） | 來夜方長 | 蘇永康 &陳潔儀 | 1999 |
| 善玥澄（35歲）／彭家賢（28歲） | 芳華絕代 | 梅艷芳 & 張國榮 | 2002 |
