十大中文金曲音樂會｜港台轉錯IG自嘲係「十大廢老中文金曲」網友齊選十大

十大中文金曲｜十大優秀流行歌手大獎得主

4月25日更新：港台在5月6日紅磡體育館「十大中文金曲 頒獎禮音樂會」前一星期，率先公布「十大優秀流行歌手大獎」得主，早前在入圍名單上的譚詠麟未有獲選，而林家謙、陳柏宇及陳蕾等熱門歌手，因為無份入圍而未能獲選：

1. 馮允謙
2. JW王灝兒
3. 鄭欣宜
4. 姜濤
5. MC張天賦
6. 泳兒
7. Jer 柳應廷
8. Gin Lee 李幸倪
9. 衛蘭
10. Gigi 炎明熹

十大中文金曲｜港台官方IG轉發錯奚落帖文 慘成自嘲淪笑話

電台主辦嘅《十大中文金曲》未開始就屢次被插，網民先質疑點解多位大熱歌手如林家謙、陳蕾、謝安琪、方皓玟、Serrini、岑寧兒、許廷鏗等都無得入圍，但前輩譚詠麟、劉德華均有入圍，搞到港台高層係記者會要特別解話，料知一波未平一波又起…

有網友疑不滿港台嘅處理手法，IG story分享咗有關頒獎禮譚詠麟、劉德華入圍嘅帖文，仲留言：「十大廢老中文金曲，連加拿大至HIT中文歌曲排行榜都無咁廢！」點知此story竟獲港台RTHK官方IG轉載至限時動態，變相「自己踩自己」，自然引起網民譁然：「港台小編食咗誠實豆沙包！」！但可能係港台小編撳錯掣，好快就刪咗帖。

十大中文金曲｜網民普遍感失望 留言圍插頒獎禮無公信力

網民眼見港台《十大中文金曲》候選名單星光暗淡，多位大熱歌手榜上無名，無得支持自己偶像，就喺討論區度留言狂插港台：「搞黎為乜? 冇公信力」、「估唔到之前叫有啲公信力嘅音樂頒獎禮，而家竟然會變成咁，到底而家邊個頒獎禮能夠代表香港樂壇呢？」、「而家係1993年定2023年？」、「以前假假地都算係四台之中最有公信力，最冇商業考慮既頒獎禮！」、「以前十大中文金曲都算正路，呢兩年好多歌手冇派歌去RTHK ，唔只之前傳禁播嗰啲，睇條毛？」睇網民嘅留言，似乎網民普遍對《十大》感失望喎！

林家謙未能入圍 港台高層現身解畫：「唔存在封殺」

林家謙、陳柏宇及陳蕾等熱門歌手，齊齊無份入圍引起外界嘩然，港台助理廣播處長（電台及節目策劃）李慶華以及《十大中文金曲》大會總監李錦明尋日（8日）喺記者會釐清外界質疑，又強調全部都是按照港台自己的機制去挑選：

我哋唔存在封殺嘅，大家都明啦，每個台都有自己嘅一啲標準，我哋都歷史悠久，我哋有播歌嘅標準，又有我哋選舉嘅標準，所以都冇存在係唔係封殺嘅問題。

李錦明續回應林家謙點解出局：「因為佢（林家謙）嘅歌未有上到三甲，所以就未能夠成為候選名單。」

COLLAR屬「上屆新人」無得玩

《十大中文金曲》大會總監李錦明指按港台機制，COLLAR屬上屆新人。根據港台投票網站顯示，本屆選舉期為2022年2月5日至今年的2月10日。COLLAR因為係1月出道，喺港台的機制便成為「上屆新人」。

十大中文金曲｜港台堅稱自己同無綫關係良好

去年港台與TVB合體搞《香港金曲頒獎典禮》，今年突然分道揚鑣，李慶華強調港台與TVB關係良好：「今年係我哋95周年，所以有特別嘅意義，好多人都問點解同TVB停咗（合作），咁冇理由搵第二個機構去幫你慶祝95周年生日㗎！所以我哋一早安排好今年自己搞返《十大中文金曲》。」至於下年會否再同TVB合體，他表示：

「我哋同TVB嘅合作一向都好好，亦唔只係喺音樂方面嘅合作，並不存在不和。」

大把歌手齊齊被消失譚詠麟、魏浚笙並列爭獎　

登入港台嘅投票網站，見到有6個獎項可以投票：「十大中文金曲獎」、「優秀流行歌手大獎」、「優秀流行華語歌曲獎」、「最有前途男新人獎」、「最有前途女新人獎」及「全球華人至尊金曲獎」。

但有眼利網民發現被傳遭港台「封殺」嘅謝安琪、許廷鏗、Serrini、方皓玟同樣消失投票名單上，連橫掃多個嘅頒獎禮威風八面的林家謙、近日開騷人氣急升嘅陳柏宇、陳蕾、岑寧兒都齊齊消失，無法角逐「優秀流行歌手大獎」，反而「四大天王」嘅郭富城、劉德華，仲有年過七十嘅譚詠麟都有份入圍，重量級前輩齊齊同後生爭獎咁話！