33歲天王嫂方媛力谷網紅事業懶湊女要父母經理人出手

Sep 3 2020

33歲方媛（Moka）是為人熟悉的「天王嫂」，一直獲54歲老公郭富城錫到燶，不過近日傳出方媛已不甘心只做幸福少奶奶，自去年開Vlog做網紅勁吸過百萬粉絲，心雄野心膨脹，為再衝事業連湊女都沒有時間，兩個寶貝女經常交給父母照顧，甚至連城城經理人小美都化身保母，幫手勁氹兩個寶貝小公主。郭富城自從兩個女兒出世後，變身愛妻號好爸爸，連性格亦180度轉變，以往低調極少談及私生活，近期卻愛將太太和兩個女兒掛在嘴邊。近日寵妻再升級，十分罕有地讓老婆方媛晒出一家四口溫馨合照，又同老婆頭貼頭砌心心手勢放閃。

原文刊於：東方新地

方媛母憑女貴躋身上流圈晒闊太生活

有「天王嫂」光環加持，加上為城城誕下兩個女兒母憑女貴，方媛（Moka）地位再度飆升，有老公做強大後盾，不但周身名牌躋身上流社會，更得城城御准繼續做模特重建事業。一向活躍玩微博的她去年八月在微博開 Vlog，每隔一陣子便會放片大晒「天王嫂」生活，不但教人扮靚及化身廚神，又經常將闊太及湊女日常公開，坐遊艇出海、去友人豪宅野餐，日前再「土豪式」豪晒價值15萬的 CHANEL滑浪板，引起網民熱論。據知情者透露：「話就話做Model出身啫！但以前都係影吓淘寶硬照，做極都唔起眼，點似得依家做咗城城老婆咁多人關注，好多人都會好奇天王嫂嘅生活係點，佢不知幾享受，成日拍片自娛，就連大女 Chantelle身影都成日過鏡，網民梗係日日追住睇有乜新嘢再 po出嚟！」

同33歲 Moka 結婚三年，郭富城完全被老婆及兩女融化，一洗以前低調作風，日前更激罕同老婆方媛做心形手勢公開放閃。

有老公郭富城錫住，Moka可以經常名牌上身，日前她在微博豪晒價值15萬的CHANEL滑浪板，著住同牌子黑色單邊露肩晚裝加全身飾物的她，打扮花枝招展，亦唔及她一身名牌貨搶眼！

拍片狂晒天王嫂生活，方媛還寫意坐遊艇出海，早前又去上海友人的家下廚，晒廚藝前先去超市買餸。 — 早前去上海友人的家下廚，晒廚藝前先去超市買餸。

郭富城33歲嫩妻方媛懶湊女挾天皇之名做網紅玩上癮 — 拍片狂晒天王嫂生活，方媛還寫意坐遊艇出海。

有城嫂光環，Moka除咗成名牌寵兒，又不時被邀出席Evert，早前便同梁洛施一齊出席品牌活動。

方媛唔想只做師奶湊女渴望闖一番事業

有得亦有失，網紅成癮的方媛為拍片 keep住網絡人氣，已經冇時間湊女，近期一對寶貝女（3歲 Chantelle及1歲半 Charlotte），便經常交給父母幫忙照顧，兩老愛弄孫為樂，自然冇托手踭，令方媛可以變甩繩馬騮。據知情者透露：「根本Moka就好鍾意做焦點，有時為咗扮靚，佢仲專登搵造型師幫佢打扮，見咁多粉絲支持，又有名牌贊助，已經心雄，成日掛住扮靚引網民注意，一日得廿四小時點夠用吖！佢咪攞湊女啲時間補貼，近期更加野心澎湃，唔想再做師奶只係湊女，仲話好想闖一番事業！幸好城城愛屋及烏，一早安排老婆居於內地的父母搬埋入大坑寓所樓下嘅單位，依家兩老幫Moka湊女好方便，Moka一句話做嘢！兩個女就交低畀兩老。」

方媛近月網紅成癮忙於發展個人事業，不過之前事業心仍未咁膨脹的她，在疫情前仍孖實媽媽貼身帶大女兒去天后返興趣班。

出名係 CHANEL 控的 Moka，自拍的其中一條片中，便大晒大堆 CHANEL 太陽眼鏡，更逐款試戴。

開 Vlog 一年多的 Moka，挾城嫂之名粉絲高達百多萬，更成名牌寵兒，她在社交網豪氣同網民互動大送名牌包包，未知是否有名牌贊助。

大忙人小美幫城城睇女

方媛除搵父母幫拖，原來還多得城城萬能經理人小美協助。據知情者透露：「話晒係公司 CEO，小美本身已經好忙，不過點忙都好，佢向來照顧得城城好周到，連老婆同兩個女都顧及埋，城城娶Moka之後，小美同Moka父母都熟咗，依家Moka掛住發展個人事業懶得湊女，小美得閒就會去城城屋企探兩老，順便幫城城睇女！」日前，本刊就拍到小美現身郭富城寓所，同城城岳母一齊在寓所露台湊外孫女，只見城城岳母抱住三歲外孫女 Chantelle在露台睇風景，身旁的小美入到屋仍戴上口罩，防疫相當謹慎，只見她一時同城城岳母好好傾，一時又慈母上身逗 Chantelle玩樂，眼仔碌碌、紮住兩條牛角鬢辮的 Chantelle，表情更似足爸爸城城，不過當日就未見城城細女Charlotte在露台出現。曾經答應幫老公追仔的方媛，現時事業心膨脹，睇怕54歲城城想圓夢仍要繼續等！