梁思浩辯稱翁美玲冥婚做騷「身不由己」 相隔11年公開向湯鎮業道歉

直播靈距離梁思浩重提與翁美玲冥婚事件

節目甫開始，梁思浩重提2013年與翁美玲冥婚的事件，他說：「今次唔係我第一次做冥婚主題，以前喺友台（有線電視）都做過，友台為咗要搞啲噱頭，同記者講我會同一個已故藝人冥婚，搞到好大件事。」

梁思浩相隔 11 年鄭重澄清：「由此至終都冇呢件事，係（友台）當時高層度出嚟搞噱頭，等大家留意個節目。」梁思浩續指自己被該已故藝人的前男友（湯鎮業）鬧爆，更他在節目公開道歉：

「好希望有機會同你講唔好意思，我亦想將呢件事真相話畀你聽，湯鎮業先生，我欠你一個道歉，對唔住，知道你當時好嬲，我只可以講當時人在江湖身不由己。」

網民唔收貨：超厚面皮！擺明推卸責任

對於梁思浩忽重提舊事致歉，網民明顯唔收貨，在官方的YouTube頻道下，留言狠批：

「收啦你!!!添食完之後又拎番11年前單野出嚟黎炒冷飯…你話由此至終都冇呢件事，係（友台）高層度出嚟嘩眾取寵，咁即係成件事都唔關你事啦…咁你道咩歉呀???」

「做咗又話唔關你事。 傷害咗幾多人？ 依家又攞返出嚟炒作。 又要勾起人哋啲傷感。 講完句唔好意思轉頭就嘻嘻哈哈。 隔離嗰兩位主持叫你『唔好內疚』⋯⋯讀稿？」

「有心道歉要10後？真好笑。不知所謂」

「受人錢財替人消災？人地俾錢你殺人都得啦？」

直播靈距離陳道長連環公開冥婚儀式

陳理一道長為大家講解冥婚的歷史和習俗，陳道長分享一單冥婚案例：「有一對情侶搵我，男方話自己畀鬼搞，晚晚冇得瞓，被捏頸同推落床，後尾查出嚟原來係佢上世嘅女朋友，戰亂時男方死咗之後投咗胎，但女方就繼續停留喺度。」

後來陳道長幫男事主和女鬼進行冥婚儀式，但事件仍未解決，他說：「原來佢（女鬼）覺得冇正式娶佢入門，最後男事主要拎個神主牌返屋企，擺床頭櫃陪神主牌瞓三日三夜。」

原來死後亦有搞「離婚」，陳道長分享一單案例，他說：「有個壞男人成日打老婆，又成日拎自殺要脅攞錢，有次真係玩大咗自殺死咗，之後佢不斷搞女事主，最後要搞分梳儀式先Settle咗件事。」陳道長還公開分梳儀式當日的靈異照片，在燒祭品時明顯見到火中有男事主的嬲爆樣，非常嚇人！

直播靈距離江美儀送《地藏經》畀撞鬼觀眾

此外，上周家庭觀眾Sandy疑被鬼搞而Phone In求助，由於節目時長關係，江美儀和「裸泳」羅泳嫻在節目後透過視像為Sandy解困，豈料過程中發生靈異事件。昨晚一集公開相關片段，江美儀、「裸泳」羅泳嫻在提出解決辦法時，突然與Sandy失聯，之後製作組多次打電話都仍未能聯絡上 Sandy，最後美儀姐只好透過工作人員為Sandy送上地藏經，Sandy翌日收到地藏經後便開始念經，情況亦開始有好轉，但最弔詭的是裸泳幫助完Sandy之後，竟失聲了好幾天！