陳嘉寶誕第三胎宣布封肚 「長洲家嫂」爆老公從來無追仔
文:東方新地|圖:IG@anjaylia
陳嘉寶指誕下三女一刻相當感動:「 好感動呀,尤其係醫生將一出嚟嘅BB即刻擺喺我心口畀我抱咗好耐,之前兩個女都冇畀我抱咁耐。啱啱上一刻明明仲喺個肚入面,突然之間就出咗嚟擺喺心口上面,感覺好神奇。」
![陳嘉寶誕第三胎宣布封肚 plt 陳嘉寶公布月初誕下第三名千金,母女平安,恭喜晒﹗](https://imgs.orientalsunday.hk/wp-content/uploads/2021/12/bf11ca49-0782-4c33-a3e0-e0bb694f9388_19043461361e3ac379db91.jpeg)
陳嘉寶為女改名跟足夫家傳統
陳嘉寶又指三女的英文名是她和老公黃頌祈經過深思熟慮改的,陳嘉寶指:「 英文名『Azaliah』係喺聖經入面搵嘅,我知道實會畀人話我哋幫囡囡改嘅名都好難讀,哈哈!其實呢個係一個傳統,因為先生近五代都係基督徒,呢幾代都係會喺聖經裏面搵英文名,我哋都要跟番傳統,其實都搵咗幾個月,搞咗好耐,頭兩個女嘅名Hosanna同Eliana都係有意思嘅,Hosanna嘅意思係asking for God、Eliana嘅意思係God had answered,我想將呢個故事延續落去,Azaliah嘅意思係God has reserved,都有一系列有意思嘅,Azaliah同我個名讀音都好似,就當係送畀自己嘅禮物。而中文名就留返畀爺爺同嫲嫲改,中文名都係想向長輩致敬。」
陳嘉寶願望成真生夠三個仔女不拘
陳嘉寶指兩名女兒做姐姐有不同反應,她指:「佢哋好鍾意BB。大女完全冇呷醋,自己會同我哋講話『我好鍾意Azaliah』;細女成日想摸佢,不過有少少呷醋,有陣時見我抱BB都會埋嚟叫我抱。」陳嘉寶指成為三女之母感覺好完美,同時宣布封肚,現在會好好坐月,亦不忘為有份參與的ViuTV新劇《IT狗》宣傳:「 啱啱播緊《IT狗》,等我坐月嘅時候可以睇吓劇輕鬆吓,好開心呀!依家好好調理好身體就有動力做自己想做嘅事。對於BB嘅期望,最緊要係佢哋都健健康康、開心平安,我同先生意向一致,生仔生女都冇所謂,我已經完成一個壯舉,我同先生最大嘅目標係希望有三個小朋友、年紀近啲嘅,可以一齊成長係好開心嘅事,大女同二女一齊玩,大女會識得保護妹妹,二女學嘢都會學得好快,呢個策略成功!哈哈!」
陳嘉寶爆老公享受被女圍
陳嘉寶現育有三名千金,笑言老公最享受被女圍,陳嘉寶話:「又多一個女圍住,佢好唔得閒嘞,我冇乜事就去出先,佢搞掂晒!諗番起老公一知道係女嘅時候,就開咗支靚酒,仲請朋友食飯慶祝,依家生完三個,理想達到嘞!」陳嘉寶與老公也保留傳統,每個孩子總會訂製一張被子給女兒作禮物,Azaliah同樣擁有父母送給她的這份傳統小心意,希望女兒平安健康就好!
![陳嘉寶誕第三胎宣布封肚 plt 陳嘉寶再做媽媽﹗](https://imgs.orientalsunday.hk/wp-content/uploads/2021/12/anjayborn_210143344961e3ad592b7af-683x1024.jpeg)
陳嘉寶神奇穿搭零孕味晒終極巨肚孕照
陳嘉寶(Anjaylia)三年抱三,2017年跟丈夫黃頌祈(Epaphras)婚後先後誕下大女Hosanna與二女Eliana,第三胎預產期在去年尾出生了!陳嘉寶揚言誕下第三胎後封肚,正因為這個原因,她決定趁產前拍攝一輯絕美的懷孕照來留下美好回憶,之前她到影樓拍攝,當然少不了老公與兩位小寶貝,更首晒全家福﹗
陳嘉寶懷第三胎首拍孕照
兩女之母陳嘉寶陀第三胎才首次正式拍攝懷孕照,得天獨厚的陳嘉寶懷胎九個月,四肢仍然纖幼,當日以bra top 配襯多套時尚服飾,型格中帶有自由赤裸的感覺,baby bump猶如赤裸的生命在母親的體內孕育出來,做慣模特兒的陳嘉寶竟然不太習慣,大嗌感覺赤裸裸的!
陳嘉寶預告封肚
陳嘉寶對懷第三胎才拍孕照時預告封肚:「呢次應該係最後一次大肚啦,應該唔再有﹗另外大家成日問我個肚喺邊?過去兩胎成日問我點解唔影?今次就影嘞,做個紀念,同埋滿足大家嘅好奇心,其實我係有肚㗎!之前曾經有人懷疑過大女Hosanna唔係我生,話我係搵代母,所以真係想話畀大家聽,我真係有個肚㗎!哈哈…今次就攞出嚟畀大家睇吓啦!呢個感覺好赤裸、太性感嘞!就算冇BB嘅時候都好少露腰,所以拍攝時會覺得自己好似豬八戒有個大肚腩,哈哈哈﹗」
![陳嘉寶誕第三胎宣布封肚 plt 陳嘉寶懷胎九個月零孕味 聖誕卸貨晒巨肚孕照](https://imgs.orientalsunday.hk/wp-content/uploads/2021/12/anjaylia_1121_2687_145440634661af127957364-683x1024.jpg)
陳嘉寶自嘲似豬八戒
陳嘉寶找來了專業團隊合力製作,服裝指導、化妝、髮型跟攝影師,但拍攝時卻被囡囡「考起」了,大女Hosanna與二女Eliana相當活躍,不時跑來跑去,場面難以控制,Anjay無奈說:「同老公影結婚相,到依家都會好掛住嗰種感覺,但係做咗人父母,同小朋友一齊影相嘅感覺係好忙亂、忙亂同忙亂,目標只係想快啲影到有就得嘞,感覺係變咗任務。」不過當看到一家五口拍出來的效果,陳嘉寶就覺得辛苦也值得!
![陳嘉寶誕第三胎宣布封肚 plt 陳嘉寶自嘲似豬八戒﹗](https://imgs.orientalsunday.hk/wp-content/uploads/2021/12/anjaylia_1121_2778_46444853361af12c5a09d6-683x1024.jpg)
陳嘉寶希望延續影全家福傳統
提到拍攝全家福,原來陳嘉寶婆婆家族在上世紀二、三十年代是經營照相館的,當看到家中懷舊的全家福,陳嘉寶特別感觸,她說:「婆婆培養咗鍾意影相嘅興趣,亦鍾意影全家福,婆婆亦會將以前嘅故事同我媽咪分享,所以我哋屋企都鍾意影相,有一種情意結。睇返以前婆婆喺照相館嘅相、爸爸媽媽同公公婆婆影嘅傳統全家福,已經發黃或者黑白照,都好期待將來會可以影一輯,我哋呢三代計埋都有十三人,等小朋友長大,唔係太難控制嘅時候,我都想book一啲香港舊式嘅影相鋪,希望喺呢個文化消失前重有機會影到,佢哋嘅年代真係會手畫一啲畫做佈景,希望等小朋友長大可以等佢哋畫一幅佈景,一齊影全家福。」
預產期在聖誕期間,Anjay陀第三胎心情輕鬆,不過接近臨盆開始有點緊張,她同時又希望待節日後才「卸貨」,她笑說:「仲未準備走佬袋,不過BB用品已經齊備,所以都唔會擔心。因為BB預產期啱啱係聖誔節同元旦嘅節日,希望畀我過晒啲party先出嚟就可以安心地坐月,因為如果坐月嘅時候party,好多嘢都唔食得,所以等我enjoy埋先啦!」
![陳嘉寶誕第三胎宣布封肚 plt 陳嘉寶懷胎九個月零孕味 聖誕卸貨晒巨肚孕照](https://imgs.orientalsunday.hk/wp-content/uploads/2021/12/-2021-12-07-2.59.05_159157211661af146dc707c-910x1024.jpg)
陳嘉寶最想坐完月即開工
但陳嘉寶當想到能夠早點擁抱Hosanna與Eliana,突然又期待快點生B,為何心情如此忐忑矛盾呢?她笑說:「想快啲生出嚟嘅一個原因係之後可以抱返大女二女,因為依家個肚太大關係頂住,完全抱唔到佢哋,等我卸貨之後就可以畀返多啲時間佢哋,瘋狂地抱返佢哋,對大家要公平嘛。」陳嘉寶強調坐月保養好身體後,便盡快繼續工作:「之後會好好學習分配時間,除咗可以喺屋企同工作上,再要喺屋企裏面分返開幾份,另外我發現,除咗下一代,我哋嘅上一輩都需要陪伴,要好好珍惜。」
![陳嘉寶誕第三胎宣布封肚 plt 陳嘉寶日前與老公staycation慶祝結婚四周年,一起到泳池暢泳﹗](https://imgs.orientalsunday.hk/wp-content/uploads/2021/12/-2021-12-07-3.22.55_19446117961af18a1e6d83-838x1024.jpg)