香港人在北京|吳業坤三段攻擊喪窒拍檔 戴祖儀台下失控流淚又喊又笑
吳業坤台上連環喪窒唔收口 三次攻擊戴祖儀
吳業坤同戴祖儀早前為劇集宣傳時,兩人由戲裡鬥到戲外,經常公開鬥嘴,在台上坤哥已經火力全開連窒對方身高同身材,戴祖儀先是讚坤哥最近勤力操肌,瘦咗好多,練得一身鋼條身形。豈料坤哥反窒一句:「點解你唔瘦嘅?」於是戴祖儀即無奈苦笑,隨即惹全場起哄!在旁的蔡潔亦幫口說:「點解人哋讚你你要咁樣嘅?」坤哥自知「出事」後即補鑊:「佢唔瘦身都靚呀!」戴祖儀亦扮嬲豬返回後台,場面勁搞笑!
![香港人在北京 吳業坤 戴祖儀 吳業坤 坤哥反窒一句:「點解你唔瘦嘅?」於是戴祖儀即無奈苦笑,隨即惹全場起哄!](https://imgs.weekendhk.com/wp-content/uploads/2023/10/2ce434b2-b8a9-472d-b790-f4899d3add45_210374855652f657c727c8-768x1024.jpg)
吳業坤連環篤中戴祖儀死穴 台下訪問搞喊拍檔
完成活動後,二人一同接受傳媒訪問期間出現一段小插曲!吳業坤預告二人在劇中往後發展成情人,不過要多啲火花,戴祖儀即說:「好有(火花)呀,每次活動、台前台後、幕前幕後都不停咁攻擊我,你唔攰咩?」再講返剛才被指肥一事,祖儀鬧坤哥過份:
「係呀,我真係好唔開心,因為我已經好努力減肥,你又話我肥!」
戴祖儀爆喊當場灑淚
不過唔夠5秒,祖儀突然淚崩眼濕濕,仲背向鏡頭爆喊!坤哥反應唔到,自知激嬲女神,即刻說:「痴線,你一啲都唔肥!死啦,呢條片肯定瘋傳,吳業坤侮辱女藝人,當場灑淚⋯⋯」事後,祖儀表示無事,更澄清坤哥是好人,「我都覺得成件事好好笑,突然間take it serious咗,我哋私底下都成日講笑,本來係好小事,但可能今日係女性週期,比較情緒化,我好玩得㗎!」坤哥笑指:「今次死梗,肯定畀人炎上啦。」
![香港人在北京 吳業坤 戴祖儀 吳業坤 事後,祖儀表示無事,更澄清坤哥是好人,更解釋可能是女性週期問題,比較情緒化。](https://imgs.weekendhk.com/wp-content/uploads/2023/10/e69526e5-b74f-4da5-a554-b5d48926a79b_2131552520652f671ee7e8a-1024x1024.jpg)
網友為戴祖儀平反:有啲肉地好可愛
戴祖儀唔小心真情流露,不少網友紛紛留言:「睇得出佢兩個係好朋友⋯ 只係真情流露啫」、「坤哥誤踩地雷了!不覺得戴祖儀肥啊!有點肉而已」、「Joey其實越嚟越靚,坤哥好想讚佢,不過可能驚老婆炸型」、「JOEY 有D 肉地, 好可愛」
戴祖儀吳業坤老友鬼鬼
事實上,二人私下老友鬼鬼!戴祖儀飾演的港仁妹妹寶怡同吳業坤飾演的石磊會有感情線,戴祖儀早前亦在IG晒出二人合照宣傳:「鬥嬌俏!石磊終於出場啦」不少網友大讚兩位:「你同坤哥好登對」、「有坤哥有喜感,你哋今晚好搞笑好正」、「你兩個做得好好!套劇好好睇」
![香港人在北京 吳業坤 戴祖儀 吳業坤 事實上,二人私下老友鬼鬼!戴祖儀飾演的港仁妹妹寶怡同吳業坤飾演的石磊會有感情線,戴祖儀早前亦在IG晒出二人合照宣傳](https://imgs.weekendhk.com/wp-content/uploads/2023/10/391610293_18426775402062213_1447441191834595000_n_926125843652f67929ba76-819x1024.jpg)
坤哥「石磊」成功搶焦!大讚戴祖儀好勤力
至於早前坤哥一出場便成功搶焦,皆因其飾演的石磊講廣東話有口音,相當惹笑。石磊是在深圳長大的安徽人,為了角色坤哥事前苦練有口音廣東話,坤哥說:「拍攝前同監製傾過呢個角色有咩可以玩吓,喺隔離(拍攝時正值疫情)嘅時間準備,每日都有十幾個鐘練習。」
講到與Joey有不少對手戲,坤哥說:「佢係一個好勤力嘅小妹妹,同埋好有音樂才華,係對自己冇乜自信,希望佢可以繼續發光發亮,我哋都合作寫咗一隻歌(插曲《想跟你好好道別我怕來不及》),希望大家都鍾意!」
![香港人在北京 吳業坤 戴祖儀 吳業坤 早前坤哥一出場便成功搶焦,皆因其飾演的石磊講廣東話有口音,相當惹笑。](https://imgs.weekendhk.com/wp-content/uploads/2023/10/33_2141081242652f6bb0e2bf5-1024x576.jpg)
石磊角色撞名「食女」 練聲「床戲」勁爆笑!
吳業坤角色個名「石磊」同食女的讀音非常相似!有網友誤會坤哥呢個角色會係花花公子,之前一場坤哥教戴祖儀在床上用丹田發聲,被洪永城以為他們在親熱,非常搞笑!二人難得有「床戲」,吳業坤笑指:「都突破咗我嘅尺度,床戲喎!」
![香港人在北京 吳業坤 戴祖儀 吳業坤 之前一場坤哥教戴祖儀在床上用丹田發聲,被洪永城以為他們在親熱,非常搞笑!](https://imgs.weekendhk.com/wp-content/uploads/2023/10/1a5b83eb-2968-44d3-ac29-1c79e642a21d_435982724652f6b5472f99-729x1024.jpg)