造星3｜季軍Ansonbean被爆中學勁曳 曾撼傷頭搞到上港聞

文：東方新地｜圖：Ansonbean及母親林佩佩IG圖片

Ansonbean 簽入古天樂旗下

現年20歲的Ansonbean（陳毅燊）在《全民造星3》總決賽前已是花姐新寵兼大熱，雖然最後只奪得季軍，但日前仍得以簽入由寰亞傳媒集團及天下一集團合組的Cool Style，成為古天樂及Angelababy（楊穎）新公司旗下首名藝人。

母親圈中人脈廣

Ansonbean參加《全民造星3》以來一直被指貌似韓星Rain，舞技更一樣咁精湛，原來其母林佩佩（Kelley）是三間舞蹈學校的創辦人，與圈中人包括曾志偉都有密切私交，並做過李珊珊和歐陽妙芝參選港姐時的提名人，其公司更曾幫無綫藝人張彥博舉辦過演唱會。

曾做「逃學威龍」

前途被一致看好的Ansonbean，日前被爆出中學時期原來勁曳，14歲時曾因為貪玩於赤柱大街的排檔簷篷上演一幕「飛簷走壁」，結果墮地撼傷頭要送院治理，因此登上港聞版新聞報道。在中五時又試過爆開學校鎖跳出圍欄做「逃學威龍」，而遭校方停學兩星期。

據知Ansonbean在老師眼中是個「超級問題少年」，曾因為髮型不及格而被老師要求剃光頭。雖然和同學關係不俗，但同學都懷疑他有過度活躍症，因為他試過將一條麻繩擲上開著的風扇葉上扮泰山，最終連人帶扇跌落地，幸好最後無受傷。

拍過多次散拖

另外Ansonbean又被爆是情場高手，年紀輕輕已拍過多次拖，最長一次戀情亦只有一年，最短的則僅有數星期。雖然Ansonbean母親曾禁止他拍拖，但由於他住在校舍，因此禁都禁唔住。

Ansonbean初中時期就讀於名校聖士提反書院，之後到中六時曾轉到英國讀了兩年QE，現在他正於科大工商管理學系就讀市場學Year 2。去年Ansonbean為了參加《全民造星3》曾停學三個月，直到本月他才開始重返大學校園，一邊求學一邊繼續演藝工作。

Ansonbean：大家唔好學

Ansonbean回應時直認細個比較奀皮：「大家唔好學呀，哈哈！依家唔會㗎啦，依家我將啲精力用咗去練習唱歌跳舞！」而他的經理人Kim Chou亦表示：「佢細個係比較頑皮，小朋友整親都好平常啦，大個咗就定番啲成熟啲㗎啦！依家佢好乖㗎喇！」