忘年戀開花結果 28歲青年與65歲大媽結婚
撰文：叮叮｜圖片：騰訊視頻截圖
柱子經歷兩次愛情失敗
嚟自河南28歲嘅柱子，樣子頗為俊俏，但係喺愛情路上就兩次跌倒。第一次，柱子原本同女朋友已經去到談婚論嫁嘅階段，但對方家長居然好似賣女咁，獅子開大口，要求柱子俾110幾萬嘅禮金。110萬對於柱子一個年輕人嚟講根本係遙不可及嘅數字，所以柱子同第一人女友嘅愛情就因為過唔到禮金一關而結束。
而柱子第二任女朋友就因為出軌，導致到兩人嘅愛情就此結束。面對兩次愛情失敗，同女友嘅背叛，柱子傷心欲絕，仲走咗去海邊打算跳海。
芹大媽巧遇欲跳海的柱子
正當柱子打算跳落海一了百了嘅時候，命運就為柱子做咗一個奇妙嘅安排，就係安排咗芹大媽做柱子嘅救命恩人。芹大媽見到柱子咁傷心，仲諗住尋死，於是大媽就好溫柔咁安撫同開解柱子。
正因為芹大媽好溫柔，令當時非常脆弱嘅柱子似乎尋找到一點生命嘅希望，柱子覺得年輕嘅姑娘都會傷害自己，但係反而呢個大媽就咁關心我，自此柱子就對芹大媽展開猛烈追求。相信芹大媽點都估唔到，自己只係一時善心諗住救返個垂死邊緣嘅年輕人，居然會令個年輕人鍾意自己。
芹大媽本打算拒絕柱子
雖然芹大媽嘅老公已經去世，但芹大媽好清楚自己同柱子嘅年齡差距好大，柱子都只係比自己嘅孫大少少，所以認為自己同柱子係無可能。但係喺柱子嘅猛烈追求下，芹大媽唔知係唔敢直接拒絕柱子，定覺得呢個後生仔點極都唔明，所以就決定聽柱子話跟柱子返屋企一趟，希望靠柱子嘅屋企人開導柱子，令柱子認清事實，知道自己同芹大媽係無可能發展落去。
點知返到柱子屋企，柱子媽又好開明喎，知道柱子話想同芹大媽一齊，柱子媽直情走去用嚟俾個仔結婚后住嘅新房準備。第二朝，芹大媽一早就走去同柱子媽道別，仲叫柱子媽開導柱子，等柱子明白二人係無可能。
柱子打動芹大媽
柱子知道芹大媽不辭而別之後好傷心，一起身就四處去搵芹大媽。命運再次安排安排芹大媽同柱子一齊，命運令柱子喺茫茫人海中搵返芹大媽。柱子同芹大媽講：「我這輩子認定你了，不管他們怎麼說」，柱子呢句說話感動到芹大媽，令芹大媽答應嘗試同柱子交往。
芹大媽四次出走
雖然芹大媽答應同柱子交往，但係始終二人嘅年齡差距太大，少不免惹來旁人嘅閒言閒語，同埋芹大媽自己都會胡思亂想。芹大媽認為自己老，不但無辦法為年輕嘅柱子生兒育女，等自己走后能夠有兒女陪伴柱子，而且自己身體又多毛病，擔心日後自己嘅醫療費用會成為柱子嘅龐大負擔。
柱子上節目向芹大媽表白 欲挽回芹大媽
即使芹大媽四次出走，不過四次都俾柱子搵返，相信係命運早已將芹大媽同柱子綁得好實，所以先令二人離合多次仍然能夠喺返埋一齊。芹大媽最後一次出走係喺九月影完婚紗相之後，其實最初芹大媽係唔答應同柱子結婚，同二人仍然去咗影婚紗相。
芹大媽第四次出走之後，柱子更染咗一頭白髮，為嘅係同芹大媽更相襯，之後更上大陸節目「現在就告白」挽回芹大媽，並且再一次求婚。
柱子喺節目度就同芹大媽講：「如果沒有你，我今天不會站在這裡，感謝你挽救過我的生命。今天我送妳的一份小小的禮物，是我親手製作的，是一段視頻。如果我求婚成功的話，這就是我們永遠的小家。如果不成功的話這也是我們倆永遠的家。」節目中雖然芹大媽口頭上話唔想嫁俾柱子，但就拖住柱子嘅手講：「走一步，算一步吧。走吧！小伙子！」最近二人仲宣佈會喺2019年新年過後正式結婚，芹大媽仲話：「倘若他想要個孩子，我願意去做試管嬰兒。」
