拖實返港 甜爆互望 │阿嬌唔敢畀老公滿分…
撰文：東方新地 、Sunday Kiss│ 圖片：新傳媒圖片、鍾欣潼ig | 編輯：Sunday Kiss （原文刊於：東方新地）
拖實返港 甜爆互望 │阿嬌唔敢畀老公滿分…
阿嬌現身就話：「今次美國唔係簽字，係想大家有個好嘅回憶，同好朋友聚埋一齊。(香港幾時擺酒？)喺12月，到時會同大家講，唔係刻意隱瞞。」問到今次係咪老闆埋單？佢話：「美國唔係，香港係。」問老闆係咪送樓？她笑言：「佢講咗就算啦！」
問到去咗咩地方度蜜月？阿嬌話：「都去咗好多地方，美國之後，去咗日本，之後再去台灣。」講到會唔會喺台灣搞婚禮？阿嬌話喺台灣搞派對，而婚禮就會留喺香港搞。
問到習慣畀人叫賴太未？阿嬌話：「有啲緊張。(依家畀幾多分老公？)唔畀得滿分，怕佢驕傲！」但賴弘國就畀老婆滿分！點解花球畀阿Sa？阿嬌話：「得佢之嘛，想所有朋友都開心。」
問賴弘國會唔會唔畀阿嬌拍親熱戲？佢以普通話說：「是工作。(爸爸有冇催阿嬌生B？)有問，但一步步來。(爸爸畀阿嬌幾分？)他很喜歡她，也是滿分。(當佢係親女兒？)對，他們一見面就很喜歡她，她也常來台灣看我家人，他們也很開心，爸爸也很感動。」問到幾時BB先？阿嬌話：「一步步嚟。(有冇傾過生幾多個？)冇呀，冇傾過，生小朋友都係緣分。」
講到容祖兒因為簽證問題差啲去唔到美國，佢幸好最後能出席，阿嬌話：「佢突然彈出嚟，都好驚喜，佢真係好好彩。(佢話你對佢好有信心？)可能美國領事館睇到報道所以幫手！」兩人十指緊扣晒婚戒，而老公除咗戴婚戒外，右手仲戴咗隻金錶係阿嬌送嘅生日禮物！
最後，現場係咁起哄叫佢哋錫錫，但佢哋最後都係冇錫錫嘅！
阿嬌同老公坐七人車離開機場，直駛至阿嬌位於西環「維壹」的寓所。
阿嬌早前度蜜月穿上一件印有佢同老公着住婚紗嘅Q版公仔嘅件tee，好閃呀！
阿嬌出嫁了！
鍾欣潼（阿嬌）和台灣「醫界男神」賴弘國（Michael）上月於洛杉磯五星級酒店Millennium Biltmore Hotel Los Angeles舉行Pre wedding party，儀式中既溫馨亦感人，阿嬌身穿一襲白色大Deep V婚紗，豔壓全場！雙方在父母的見證下行禮，期間阿嬌多次喜極而泣，當中包括致詞時、好姊妹兼好拍檔蔡卓妍（阿Sa）擁抱祝賀及亦師亦友的經理人霍汶希（Mani）輕吻阿嬌面頰時，阿嬌好激動咁喊！
阿嬌：「行到今日好唔容易…」
在致詞時當阿嬌講到：「行到今日好唔容易…」時喊得最為厲害，全場嘉賓亦眼濕濕，兩個唔同地方、唔同背景的人最終修成正果走在一起，真係好難得！Michael輕吻阿嬌前額的場面充滿浪漫氣息，賴弘國更在鋼琴伴奏下向阿嬌獻上深情一曲〈愛很簡單〉，阿嬌聽完喜極而泣，幸福滿瀉！
好姊妹容祖兒在最後一刻終於成功搞好簽證，趕到洛杉磯送阿嬌出嫁，送上大大的驚喜，令她感動爆喊，「龍虎豹蛇」終於成功合體！
阿嬌契爺劉鎮偉都有出席婚禮，佢仲負責將阿嬌交喺新郎賴弘國手中，場面感人！劉鎮偉喺致詞嘅時候，除咗祝福一對新人，佢仲發揮搞笑本色：「阿嬌叫我做老竇，其實我同佢阿媽係冇關係嘅！」全場哄堂大笑！
好姐妹阿Sa微博感觸發文
「想對妳說的話太多太多⋯腦海裏浮現的畫面， 這18年的 一幕一幕的 開心的 、興奮的 、緊張的、 難過的⋯實在太多寫了又刪 ，刪了又寫無數次，怎麼寫也描述不到心裏的感覺。大概是因為我們兩個人一起經歷 、一起面對過的一切， 旁人根本不能體會，也不用一一說明，就如我們平常說的笑話， 其他人都總會無法理解，但是只有妳。」
婚宴選址來頭不小
阿嬌今次舉行婚宴的五星級酒店Millennium Biltmore Hotel Los Angeles，已有近百年歷史，處處充滿典雅文藝復興時代的氣息。酒店地位超然，除了招待過不少政要、巨星外，早年亦是多屆奧斯卡頒獎禮的舉辦場地。呢日阿嬌婚禮上，現場用上大量鮮花布置，極其奢華又浪漫。
前妻隔空發表仇恨論
不過，最近有網友就留意到賴弘國前妻趙筱葳（Ivy）喺個人社交網上載咗一段文字：「什（甚）麼是真什（甚）麼是假？哪些是浮雲哪些是永恆？」，言詞間令一眾網友猜疑Ivy，實為另有所指。
影相證明活得比你好
事實上，賴弘國喺2016年與趙筱葳結婚，但二人婚姻只維持僅僅半年就分開。而任職空姐嘅Ivy經常喺社交網上載自己周遊列國同吃喝玩樂嘅相，睇落離婚後嘅生活仍相當愉快。
