好勝親戚由BB出世每事鬥 終因1句說話惹怒新手爸爸 事後竟如此發展
老婆早弟婦幾日誕B 好勝弟婦竟然宣戰比較
近日一名新手爸爸在Facebook專頁「生仔要考牌系列」投稿數落喜歡比較的弟婦,很多網民為他抱不平,紛紛留言建議建設方法。事緣他老婆與弟婦剛巧同一時間懷孕,他老婆的女兒先出生,重7.3磅。幾天後,弟婦兒子出世,重6磅多,同樣精靈健康。怎料性格好勝的弟婦竟然不忿氣,在家庭通訊群組中公開向他女兒宣戰:「我個仔好快會超越你個女嘅重量,你哋睇住嚟。」
初時他以為只是弟婦搞笑,但原來她是認真,不出三個月已經谷到兒子很肥,衝出生長線外,她當時很開心,覺得光宗耀祖。去到加固時,她兒子的體重稍微回落,雖然仍在生長線範圍偏高那點,惟她仍很擔心,還不忘將她兒子與新手爸爸的女兒比較:「好驚我個仔會瘦到好似你個女咁陰功。」新手爸爸聽罷很介意,心想他女兒一直在生長線中位,能吃、能睡、排洩正常,一點也不「陰功」。
弟婦谷肥BB誓要贏返次 將兒子一言一行錄低「挑機」事主女兒
後來 ,到BB長牙齒、轉身、學行、學說話,他弟婦都一直將兩個小朋友公開比較。例如她曾主動問他女兒長了幾多隻牙齒,之後表示:「我仔多過你女兩隻,又贏!」又例如她兒子四、五個月大,剛剛懂得轉身時,她已急不及待捉住兒子腋下,強逼他學行,還將學行短片上載到家庭群組「挑機」:「你個女幾時追到我個仔?」
一直以來,新手爸爸沒有理會弟婦,沒有將女兒放在她自製出來的起跑線上比賽,任由她愛說甚麼就說甚麼,而他老婆也沒有被逼到患有產後抑鬱。因為他們都好明白每個BB都有其成長節奏,不能心急,總之身體健康就沒有問題。
出席聚會被嘲冇用 新手爸爆seed鬧親戚
前幾天,他帶女兒出席男家家庭聚會,當時弟婦抱住著兒子一入到家門就不停喊,怎樣哄也沒有效,然後他女兒拿著公仔哄弟弟,誰知弟婦見到「有位入」,又語帶嘲諷地說:「你睇,弟弟學咗你上次喊咁『冇用』呀…… 弟弟你平時好叻叻豬㗎,周圍同人say hello,好大膽㗎喎,點解你今日會好似姐姐上次咁『失禮』㗎?」
作為爸爸,他聽到女兒突然被人當面指罵「冇用」,馬上怒火中燒,衝出家門抱起女兒,為妻女護航,鬧爆弟婦:「咩叫冇用?唔該你唔好喺我女面前亂講嘢!」原來早前聚會時,他女兒扭眼瞓,哭了一會兒,所以他隨即向女兒解釋,叫她不要自責,他覺得兩個小朋友只得一歲半,用喊去表達情感好正常:「上次喊,唔代表你冇用,同樣弟弟喊,都唔等如佢失禮,而係因為弟弟呢刻可能感到唔開心、唔舒服,所以先會喊。」
罵戰後弟婦仍未識驚繼續鬥叻 新手媽努力解釋無效
可是弟婦還不知道自己有甚麼問題,最後將手機遞給兒子,兒子終於收聲,她很得戚地說:「弟弟,快啲表演畀大家睇點撳個YouTube出嚟….. 你教姐姐點撳個Baby Shark出嚟啦,佢唔識啊……」由於新手爸爸與老婆都主張BB兩歲前不會給小朋友太多電子奶嘴,所以他們女兒不太懂用手機。
當時他老婆很有禮貌地讚賞弟弟,之後就叫女兒分享自己帶來的圖書給弟弟,但弟婦馬上指責:「你哋呢啲咪怪獸家長囉,呢個年代點可能仲睇書,唔畀YouTube BB睇㗎!你知唔知你女學少咗幾多嘢,落後咗幾多呀?你覺得考N班嗰陣,人哋校長會揀個成嚿飯咁乜都唔識嘅,定揀個醒目,識唱歌跳舞吖?」他老婆很努力地解釋電子產品怎樣影響BB專注力與學習能力,無奈弟婦一心只想講贏,她心目中覺得百厭坐不定即是聰明大膽;聽話坐定定即是愚蠢驚青。
最後他直言弟婦是「刁婦」,雖然他很享受三代同堂的時間,也很痛錫姪仔,但他接受不到每個星期都要聽弟婦「亂噏當秘笈」,語言欺凌其女兒。
![親戚繼續比較 新手媽努力解釋無效(非當事人)](https://imgs.sundaykiss.com/wp-content/uploads/2021/06/screen-shot-2021-06-07-at-4.35.07-pm_18093480360bdda46e62bf.png)
網民讚新手爸媽EQ高
網民紛紛留言大讚新手爸爸媽媽EQ高,竟然可以容忍這些多口親戚:「你老婆最勁,你有你解釋畀小朋友聽,佢有佢當聽唔到,等弟婦無癮收聲」。他們又指該親戚心理有問題,沒有家教:「要幾自卑嘅人先要拎個bb同人鬥」、「越自卑的人越自大,越要踩低別人抬高自己。呢類人少接觸為上策,回應佢都嘥氣」、「今次唔係老公失蹤系列,係細佬失蹤」。
![親戚 比較 網民讚新手爸媽EQ高(Facebook截圖)](https://imgs.sundaykiss.com/wp-content/uploads/2021/06/070ad5b6-e72b-4c1f-9c30-e541265b02d5_85296014160bddc66ec318-507x1024.jpg)
資料授權:「生仔要考牌系列」