薛家燕囝囝6月結婚 過大禮勁大陣仗
原文：東方新地｜圖片：王梓軒微博，石耀庭IG，Zoe IG
薛家燕囝囝6月結婚 今日過大禮
今早家燕姐嘅未來新抱Zoe喺IG貼出過大禮嘅相，留言話”I think all those golden piggies are hinting something”，過咗大禮，家燕姐開始忙派帖。見枱面放滿海味、嫁女餅、利是、果籃，最搶眼仲係巨型龍鳳鈪、大金豬牌頸鏈、名錶、金器，真係跟足傳統，而且仲係「豪華版」㖭！
家燕姐母兼父職，十多年不眠不休咬緊牙關養大三名子女，子女均長大有成，現在兒子還幫她娶個好新抱，家燕姐一定感到開心欣慰。早前Zoe生日，Zoe居住英國的父母專程回港，雙方家人約食飯為Zoe慶祝，壽星女事後話覺得自己好幸福，相信兩家人都相處得好融洽！
未來奶奶要通氣
33歲嫁為人婦，家燕姐結婚第13年，丈夫石保慶突然消失毫無音訊，直至三年後家燕姐通過律師提出離婚才再次蒲頭。雖然此段婚姻是失敗收場，家燕姐依然有肺腑之言要跟將為人夫的兒子說：「婚姻係兩個人組成一個家，未必所有嘢都啱啱好、夾得到，但一定要互相有溝通。」
「我教個仔，最緊要做一個負責任嘅男人，娶得人哋返嚟、生得仔女出嚟，一定要對老婆、仔女負責任，呢種丈夫就肯定唔會衰得去邊。我老公當年一走了之係為咗第二個女人同金錢，仲有一個原因，始終離唔開屋企教育。」
「佢屋企四兄弟，四個都離婚，我唔敢話係父母嘅錯，但影響一定有。正常人，見到後生仔嗌交係唔係會勸交，話一人少句唔好傷感情呢？邊有人見到我同老公嗌交，就攞鋪床鋪出嚟叫我老公不如出廳瞓呢？我好畀心機煮完餐飯，問佢幾點返嚟，奶奶竟然捉咗佢出街食飯……有啲人就係咁，鍾意虐待人嚟證明自己嘅優越。我第時做奶奶，一定唔會做搞破壞嗰個人，兩公婆嘅事，都係畀人哋兩公婆自己解決。」
兒子求婚成功薛家燕 榮升奶奶
家燕姐的30歲兒子石耀庭（Jackson）在家姐石祐珊及好友王梓軒協助下，向圈外女友求婚。從事幕後製作的石耀庭去年向圈外女友Zoe表示，要去看好友王梓軒的綵排，抵達九展後突然由石耀庭換上歌手位置向女友自彈自唱《愛很簡單》，接著更跳出電影《星聲夢裡人》的舞，最後更以99枝玫瑰及戒指跪地求婚，令女友Zoe十分感動並應承求婚。
