黃子華 金句惹火 媽媽呻焗請工人
撰文︰Pan
圖片來源：新傳媒資料相片
網友留言︰生活迫人被迫請姐姐
黃子華︰最好同菲傭生埋仔
其實子華啲金句一向有深度，字裏行間中點會冇暗示？而呢句女句，其實想講當今某些家長湊仔時，的確有些情況過份依賴工人的怪誕現況，目的明顯想喚起大家反思，而不是想大家對號入座呢！黃子華︰「香港有幾多菲傭？你睇吓香港有幾多人生仔就知。因為而家啲人生仔，一定要有菲傭到一個地步……就係生仔冇老婆唔緊要，但係冇菲傭就唔得。所以有啲人覺得，同個菲傭生一個，咁就最一舉兩得。」
其他惹火金句
子華其實過去講過唔少金句，都關於家庭生活，唔知大家睇完有冇共嗚呢？你會會心微笑？定係眼火爆呢？
「我讀咁多年書，從來冇一個老師話過俾我聽，讀書係為乜。 但係我自己識諗，我終於想通：『讀書係為左升班。』 但係後來有個阿Sir同我地班同學講左句野，又令我再諗過。有一日，佢同我地講：『你地成班都唔掂，不如你地成班申請留班讀好Ｄ書啦！』我讀書係為左升班，依家留班係為左讀好啲書？」
「啲人生仔就放前四後六，放幾個月假，死老竇就放1日，點解？因為所有嘢都係講生產力，你個仔生出嚟將來有生產力，你阿爸冇將來。屈原個仔死老竇有幾多日 放？咪得端午節1日，佢重要包粽去賣，有生產力添！你諗清楚，生產力好緊要。耶穌出世有聖誕節，因為有生產力，咪放假囉！耶穌死係冇假放，然後耶穌復活又 去放假，即係復活節。然後耶穌升天又冇假，升天係咩意思？退休移民，邊有生產力，佢重要唔買機票就退休，唔搭飛機都搭程的士去機場吖！咁就走咗，幾蚊雞生 意都唔俾人做，邊有生產力。」
「最近睇到報紙介紹二百零呎樓，適合四人小家庭合用。」
「我唔係一個唔負責任嘅人，為我爸爸媽媽嗰短短一剎嘅快感，我已經負責負咗廿幾年。你估做我好易做啊？」
「而家香港嘅問題，係所謂嘅婆媳糾紛，係一種必然瀨嘢嘅關係，係咪？除非你個新抱可以喺第一日入門，就全心全意同奶奶講:『奶奶，我愛你!』」
「愛情同股票一樣，未入之前係不停咁升。但當一擁有，你就問：『點解會咁㗎？』所以世上有100分男孩、100分女孩，但就冇100分伴侶。如果重有人唔肯承認，相處就代表開始扣分，我有個例子：2人相愛，當然唔想有第三者，但點解你想生仔？『仔點會係第三者呀？』仔唔係人呀！喂，呢個第三者佔你哋好多時間㗎喎！呢個第三者，1日食6餐，隨時食埋你嗰份，『咁1男1女就梗係要生仔㗎啦！』係囉！點解呢？因為當世界只剩下1男1女，得番你同我，你就feel到，呢個遊戲係唔玩得耐。」
