愛回家｜黎彼得做手術陷經濟困難 黃宗澤出手相救 揭賣報紙到頂級詞神之路 自爆虧久前妻仔

因《我的野蠻奶奶》與黃宗澤結緣

黎彼得於大約於三個月前因眼腫漲而去找醫生並接受檢查，就發現自己血管收窄，做心臟掃描時發現有兩條血管堵塞，醫生的建議是他立即進行「通波仔」手術，否則可能會有生命危險。經過停工休息後，現時已經康復痊癒。他已向公司報告請假做手術，未獲得任何工作安排，私家醫院的十萬元檢查費用，再加上做手術的廿萬費用，龐大的支出令他十分傍偟，在手停口停下的經濟頓時出現困難。幸好多得「契仔」黃宗澤（Bosco）伸出援手，提供經濟上的幫助，令到他感到人間有愛、患難見真情。原來他們是在2004年拍攝《我的野蠻奶奶》時結緣，黃宗澤知道其健康狀況後主動資助醫療費用。

才子詞神曾製作多首名作

黎彼得現年71歲，在《愛回家之開心速遞》中飾演豹哥，演出非常生鬼，但其實他是一代頂級填詞人。他活躍於70至90年代粵流行曲詞壇，創作過不少為人熱播的作品，如早期和歌神許冠傑合填的《加價熱潮》、《賣身契》，後來有譚詠麟的經典情歌如《愛人‧女神》、《天邊一隻雁》，梅艷芳的《將冰山劈開》及張國榮的《Monica》等，每一首都是琅琅上口，是巨星的名作。他曾接受香港電台節目《舊日的足跡》訪問，大談他當年被發掘的經過：「第一首歌係二次創作叫《傷心淚》，我將《相思淚》改詞，估唔到譚炳文喺《歡樂今宵》演繹出嚟，大受歡迎，隨後第二隻真正創作的就係溫拿嘅《玩吓啦》。」許冠傑透過朋友主動結識黎彼得，兩人一見如故，黎彼得說：「當時好似乞衣見王子咁，佢已經好紅，無諗過原來佢有睇我專欄，叫我寫啲詞畀佢作歌，就推出《浪子心聲》呢隻歌，佢係我恩師。後來佢認為我唔應該做司機，介紹我去嘉禾同TVB做編劇，於是正式入行。」

而由他所填詞的《Monica》原來其實是講述對自己與初戀情人分手之後的感覺，更直言這個女友是一生最愛，他在訪問中就說：「呢個女友好欣賞我才華，我亦好愛佢，一齊三年之後，佢屋企人覺得我無前途，於是和平分手。直至39歲我太忙得到肝炎入醫院，出院費用20多萬，同年稅局又追我10多萬罰款，我無錢到要賣樓。當時失業又冇錢，所以冇啦啦走去結婚，係唔相愛呀，不過叫做有緣喺埋一齊。」

因一個女人跟許冠傑兄弟情不再

黎彼得跟許冠傑「兩為一體」在歌詞上的合作，產生了不少化學作用，成就了不少好作品。曾經被問到為何合作七年後就停產，他解釋：「大家總係覺得Sam總係掛名行頭，我黎彼得行後，其實我唔介意，難得有人畀我出名喎，其實佢無必要出我名呀！不過佢覺得唔太好，於是分開寫，最後一隻合作係《紙船》。當然，唔多唔少會影響到友誼，事隔廿幾三十年都無見面，連通電話都冇。」他表示當時其老婆不滿二人行得太埋，形容跟Sam的關係就像分手情侶：「佢老婆都唔想我出現，我次次上佢屋企傾通宵，佢老婆都要獨守空幃，次次Sam都話老婆投訴，加上佢原本唔煙唔酒，同我一齊就學食雪茄、飲香檳，我算係少少損友啦，不過只係教佢享受人生啫！」

自幼家中清貧 曾歷失婚

黎彼得人生經歷生高低跌宕，自幼喪父家貧，與母親相依為命，年紀小小在12歲就出外打工養家，只有小五教育程度，曾做過送信、洗廁所、打雜、油站入油員、的士司機、私人司機等等的職業。

其情路更是坎坷，與前妻育有一子，卻因為工作關係繁重，與家庭關係疏離，而導致對方決定離家，兒子就交由工人照顧。他試過因工作半年沒有回家，對兒子感到虧欠：「要搵食，我同個仔有個共通點，就係又係一條友，同佢冇乜父子情，無仇不成父子，我同佢在心中。18歲時佢阿媽曾經想帶佢返去一齊生活，但相處一陣又頂唔住返我度。」他表示現在兒子已經30歲，在南京讀畢中西醫，但父子緣薄。據知兒子因身處南京工作，也不便聯絡，但他亦感到人生無悔，指曾經帶過歡樂給歌迷和觀眾，已是人生一大樂事：「佢至今都未搵過一亳子返屋企呀。正所謂：『家貧出孝子』，你想要家貧定要孝子？人生既然咁矛盾，就唔好諗咁多，坦白講，我今生無悔，小學未讀完就寫到咁多歌詞，最重要係將歡樂帶畀大家。」