1歲BB疑遭菲傭報復致半身二級燒傷 港爸痛心交代事發經過 網民鬧爆菲傭解釋

一歲男嬰二級燒傷或需植皮 港爸痛心交代事發經過

一名港爸在社交平台發文交代一歲兒子受傷經過。事發在星期一（3日）早上沙田一名菲律賓籍菲傭帶著一歲大的男嬰進入廚房煲粥。不久後，廚房傳來了男嬰的哭喊聲，「喊得好大聲，瘋狂咁喊」，迅速引起媽媽的注意。

媽媽看到菲傭抱著BB在洗手間內沖水，孩子的右手和身體均又紅又腫，手部更不停甩皮，情況相當嚴重，「我太太入去嘅時候見到工人姐姐抱住BB喺廁所度沖水，見到BB隻手不停甩皮」； 夫婦二人馬上報警並把BB送往沙田威爾斯親王醫院。

港爸交代了一歲兒子的傷勢，有可能需要植皮，「救護員嚟到嘅時候剪開BB件衫，發現佢半身都喺度甩緊皮，嚴重灼傷，醫生話可能要植皮」， 其後證實為二級燒傷。

僱主懷疑菲傭出於報復

男嬰爸爸在網上發帖公開事件，期間透露在事發前曾指責菲傭偷懶，「琴日早上清潔時發覺佢偷懶，冇清潔乾淨，我哋問佢佢仲要講大話，我哋講咗佢幾句」，質疑菲傭出於報復，報復在其一歲男嬰身上，也認為菲傭有嚴重疏忽照顧之嫌。最後，港爸向網民求助，查詢解僱這位菲傭的程序，「我如何去解僱呢位姐姐，同埋我到底仲需唔需要賠償一個月嘅人工俾佢呢？」

警方拘捕43歲菲律賓籍女子

警方指，昨日（5日）接獲一名女子的報案，指其一歲兒子的手部及身體被燙傷，懷疑曾被人予以不恰當對待。警方接報到場後，於同日在馬鞍山拘捕一名43歲菲律賓籍女子，她暫時被控一項「對所看管兒童或少年人虐待或忽略」罪，此案將於明天（7日）上午在沙田裁判法院提堂。

菲傭的解釋

報導指該名一歲男嬰當時清醒被送往威爾斯親王醫院治理，其後已出院。消息指菲傭聲稱，事發時因男嬰用手拉扯電熱水壺的電線，結果遭溢出的熱水燙傷。

家長網民鬧爆菲傭：唔係解僱咁簡單

事件曝光後即引起網民關注及鬧爆，不少覺得菲傭解釋牽強，「睇粥會搞到半身 肯定整落bb到啦 報警拉佢啦 痴線嫁」、「疑問：粥倒瀉左，只有BB淥親，佢冇事？」、「刑事黎，唔係解僱咁簡單。」、「唔係解雇（僱）甘（咁）簡單！佢宜家係虐兒加疏忽照顧兒童！！」、「佢何止要被解僱，佢直頭要坐監！」

很多人都給予港爸建議，「你需要做以下步驟：1.驗傷，2.報警，3.告工人虐兒.唔好放過個工人. 等警方去調查個case. 如果證據足夠一經入罪僱主唔需要賠償工人一個月代通知金.你仲要去入境處投訴工人虐兒.」、「有冇搞錯？你已經報了警、落了檔案，再報上入境處及勞工處。先看警方怎樣處理，暫不用補錢解僱她。準備出律師信。另外通知 agent。至於疏忽照顧， 你廚房有cam就會有證據。如果冇，你要看事發時，是如何煲粥？是否整㷛倒瀉了才令BB受傷，純粹意外？若真是意外，相信你工人都有傷，因為佢抱住 bb, 佢有冇傷？佢冇傷、BB卻會傷成咁，好可疑喎！抑或個煲還是安好放在爐頭，但BB就被灼傷成這樣，這樣就存有疑點。」

有家長也分享自身經歷，並建議事主「真係好痛，我bb七個月個陣都係被熱米線淥傷，二級燒傷，同你bb一樣都係生水泡同甩皮，以後有疤痕，幸好不明顯，夏天曬黑就很明顯了。希望你不要放過工人，一定報警留案底，打給agent，必須要告佢！千萬不可以心軟！祝 BB早日康復！」

有人質疑：點解要俾菲傭抱BB入廚房？

期間， 也有人質疑為何會容許菲傭抱男嬰到廚房，「點解要俾佢抱bb入廚房，本身廚房就係BB嚴禁進入嘅地方，你應該教工人入去都唔應該抱埋BB入去，佢哋有時抱BB出露台睇風景，都唔好俾，因為真係一個唔小心就會跌咗出去，做父母嘅呢啲細節位係自己要諗得多個工人，當然要告個工人，唔係為咗使唔使賠一個月人工俾佢，而係為BB討回公道！」

此外，有網民呼籲「麻煩你開埋你個工人名，等其他僱主注意！謝謝」。