《載得有情人》望仔 童星鄭耀軒 最冧Celine

Celine 多人追
耀B與哥哥浚隆同時間入行，耀B幾個月大拍攝了一輯造型照， 放上網後獲模特兒公司賞識，邀請他拍攝奶粉廣告，到兩歲多拍另一廣告時，認識了一位擔任臨時演員的媽媽，邀請了耀B兩兄弟拍戲，哥哥當時年約七歲，Irene說：「哥哥多數客串，但有幾位監製賞識耀B，俾佢參與幾套劇嘅大結局，我最記得第一套係《當旺爸爸》，之後做《雷霆掃毒》，做林峯個義子，今年仲有《愛我請留言》，大結局做Celine小男友。」

現實中，耀B都想做Celine小男友，Irene大讚Celine人見人愛，好多男仔追，包括他的兒子，「佢哋好好朋友，鍾意一齊玩，佢好鍾意Celine，佢都承認㗎！唔肯定係咪puppy love，但係非常有好感。」耀B好曳，四圍走坐不定，拍攝當日也玩到癲，在場地跑跑跳跳，一坐低拍攝就沒耐性；相反Celine好乖巧，兩人一起工作時好大對比，Irene此時出絕招，「你睇吓Celine幾乖，你幾曳？你再唔合作Celine唔同你拍㗎喇！佢就即刻嗌『唔好呀！唔好呀！』佢會跟住Celine做好件事，希望同佢一樣做得咁好。」

與黎耀祥玩咀嘴
在劇集中，耀B飾演的望仔有食物敏感症，不能吃牛奶、朱古力，現實中剛剛相反，他見到朱古力就雙眼發光，「我最鍾意食朱古力、薯片，我咩都鍾意食，唔覺得自己愈來愈肥。」拍劇要忍口、背稿，難免有情緒，貴為三屆視帝的祥仔，都大嘆與耀B拍戲難度高，比其他童星曳曳，要經常遷就，夜晚拍到累會扭計，要媽媽幫手哄他，耀B更試過衰為食冧廠，Irene不好意思說：「佢有晚入廠飲咗兩杯果汁，一路拍一路飲，搞到肚痛冧廠，大約夜晚九點幾放佢走，好彩第二日冇事，繼續開工。」耀B回想拍劇時有很多開心回憶，最記得祥仔與他玩咀嘴，「佢會縮開嘅，嘻嘻。仲有蘇玉華姐姐同我玩捉衣因，因為可以同小King一齊玩，係一隻白色嘅狗，佢好可愛、好得意。」

下頁：耀B哥哥也是童星出身

童星哥哥讚喊戲勁
Irene感謝祥仔和眾演員對兒子的忍耐，「祥仔見佢攰、冇mood，會陪佢玩同傾偈，等佢精神番。好彩祥仔、其他演員同監
製都讚佢做得好，冇因為佢拖慢個進度。呢套劇對佢嚟講好有挑戰性，所有演員都好資深，好似佢阿爸（祥仔）、蘇玉華、KK（張國強）等等，初初知道要同呢班演員做對手戲，我都好擔心，驚佢做得唔好拖累大家。」Irene讚囝囝記對白能力不錯，「佢背稿能力OK嘅，我會教佢記熟自己對白先，我再做阿爸角色同佢對，我盡量加啲表情同語氣入對白度，基本上入到廠佢可以完整講番對白出來。」耀B的哥哥浚隆同樣做童星拍劇出身，他謂哥哥無幫手背稿，Irene即反擊：「無？你哥哥不知幾鍾意同你對稿呀！我同你背緊，哥哥會爭住對。」浚隆讚弟弟的演出不俗，尤其是喊戲，「佢喊得好逼真，好投入個角色，有一幕講佢要同阿爸分開，佢可以喊到好真實，好似融入咗望仔咁。」

升小一讀油塘基法
九月剛剛開學，兩兄弟就讀媽媽的母校中華基督教會基法小學（油塘），浚隆升小六，耀B同以世襲生身份升讀小一。基法小學於2005年，由觀塘舊址搬遷至油塘，校舍更大，設備更完善，所以Irene也不加思索，沒考慮其他學校，直接報回她的母校，「學校好重視發展學生長處，老師知道浚隆數理同科學較好，一有關於科學嘅course，或者數學比賽，就會推薦佢參加。」至於耀B可能拍戲和拍廣告多，多與不同人士相處，令他性格大膽、不怕醜，兼培養出表演慾，喜歡唱歌跳舞，Irene說：「佢音樂科最好！最近教佢打鋼片琴，佢第一次接觸，三個鐘就學識打生日歌。」屬資優生的浚隆今年要專心讀書，準備升中事宜，將會淡出童星界，他表示有意報讀男拔、九龍華仁等傳統名校，「我想挑戰自己，都有信心嘅。」至於耀B有時間仍會繼續接job，「我哋一直當係遊戲性質，唔係睇重結果。」Irene透露多年來耀B賺了六位數字，儲備作為教育基金，「我開

咗個銀行戶口俾佢，一直冇郁過，等佢大個讀書用，呢筆錢都係俾佢將來用，始終係佢努力經營番嚟嘅。」她笑言囝囝知道工作有錢收，但從無過問，「呢一刻佢只係着重食同玩，有零食、有機打就得，哈哈。」

撰文：Ling
攝影：黃大立（部分相片由受訪者提供）
服裝：ELLE Kids、Benetton Kids
場地：Play House E Cube Club@iSQUARE（tel: 2151 1306）