【低見12度】8位女星實用冬日保暖貼士

撰文：東方新地 | 編輯：Chloe | 原文刊於：東方新地

1.養生飲薑茶 Angelababy

經常返國內工作嘅Baby，曾於零下十幾度天氣下工作，表示保暖最重要多飲薑茶，再着多幾條褲，笑言：「最誇張一次我試過着咗七條褲保溫，因為實在太凍！」

2.經痛暖貼 陳嘉桓

用經痛暖貼係最好，因為保暖嘅時間長啲，有啲最多可保暖18個鐘，啱晒拍外景時用！

3.Leg warmer 周秀娜

着咗leg warmer不但保暖更可作襯衫，一舉兩得！之後將暖貼貼喺大髀內側係最有效嘅！因為嗰度有動脈，所以全身都會好暖！

4.暖貼貼全身伍詠薇

伍姑娘平時好貪靚，所以冬天時衣衫單薄去開工，以為佢唔怕凍，其實怕凍怕到死。所以佢每日開工都會帶定30個暖包加暖貼，貼勻全身。「基本上貼得嘅地方已經貼滿晒，你知錄影廠幾凍，啲戲服通常又薄切切，所以一晚就可以KO晒所有貼！」

5.戴冷帽諸葛紫岐

最簡單係飲熱嘢，一係戴住頂冷帽，應該都唔會點凍。紫岐講得無錯，有研究顯示，人處於愈凍地方，頭部散熱量愈大，所以若戴帽，冬天能起保暖作用！

6.隨身暖手器 樂瞳

冬天開工總會帶住四大法寶，包括暖水袋、手提暖手器、冷襪同暖胃生薑茶。「拍民初劇成日喺古裝街外景，有時半夜三更真係好凍！寧願辛苦少少帶多啲保暖物品都唔好凍親，又可以借俾人用，幾好。」

7.穿保暖內衣 衞詩雅

詩雅同好多人一樣，冬天都會着防寒內衣，皆因貪其夠slim唔覺臃腫，不過有時因工作唔着得嘅時候點算？佢說：「咁我會將暖貼貼喺腳趾，真係會暖好多！」

8.晒命 陳茵媺

最後一位陳茵媺保暖方法十分奇特，因為佢早前上載了一張自拍照，見佢着住羽絨戴晒帽，但佢留言話仲覺得好凍，仲笑言凍到離譜嘅天氣下做一個足球媽媽，連手指都僵硬埋！不過，留意返佢手指，似乎好不經意咁晒咗兩隻鑽石戒指，其中一隻仲鑲嵌咗一粒好大嘅鑽石！唔少網民搞笑留意：「咁大隻嘅鑽戒照住，幾凍都唔怕啦！」

參考資料：衛生處網頁