小心重口味 認清隱形高鈉零食
杯麵
鈉量：2,325毫克（每100克）
即食麵和杯麵一樣，其實麵餅本來鈉質不高，資深營養師黃榮俊表示只有100毫克鈉，而高鈉的只是其味精湯粉，如果食時省去湯粉就可以大大減鈉，John 建議吃時不要把湯飲用，否則一碗湯麵已超出全日限額，亦可以選擇落半包湯粉減鈉；而杯麵食用分量少一些，不夠100克，所以鈉量也相對少一些，但在於其湯粉早已在滲麵餅內，如要減鈉，做法只可以沖水後倒半再加熱水。
紫菜
鈉量：1,723毫克（每100克）
表面上，若果單從數據去看，其每100克含鈉量已差不多比起高鈉標準，足足多出1,000多毫克，再加上質地薄，易入口，很容易令人食唔停，就以上種種理由，亦好理所當然被認定係高鈉食物。而John指，雖然以每100克去計的鈉量的確驚人，但實際上要食百幾包紫菜先得。如果跟包裝所示的「食用分量」去睇，一次過食5包左右，也只是65毫克而已， 不算高， 所以「食用分量」也是一個影響因素。
魷魚絲
鈉量：1,690毫克（每100克）
魷魚本身無味，但在製作過程中加入各式醬油及調味，令到鈉量大增，每100克魷魚就有1,690毫克鈉，已近達標，雖然包裝輕盈分量少，但食幾包就已足夠全日限額，絕對係爆鈉零食！
梳打餅
鈉量：660毫克（每100克）
食物中的鹽分除了可保鮮外，在製作烘焙類的食物如包餅類等，同時可以調製發酵過程影響食物的質地。所以麵包和梳打餅等，雖然味道不太鹹，但其鈉量亦高。如這款梳打餅亦是高鈉食物，雖然比高鈉標準的600高出60毫克，而獨立包裝2塊約10克，其淨重200克，要足足吃半包才攝取到660毫克鈉，而John建議大家食用分量為4至6塊就足夠。
蜜糖味粟米片
鈉量：627毫克（每100克）
粟米片都鈉超標？大家可能會覺得，鈉同鹹劃上等號，而粟米片明明係甜，點解會可能高鈉？其實鈉量高不高，跟鹹味並沒有必然關係，唔鹹亦一樣爆鈉，這個陷阱常有人不知，今次例子就係最好代表。因蜜糖味已蓋過粟米片的鹹味，所以味道不代表一切，加上粟米片每次的食用分量大概為一杯左右（約50克）， 而用「每100克」去計也屬高鈉，吃多一杯就攝取了627毫克鈉， 幾乎是全日的四分一量。
消化餅
鈉量：600毫克（每100克）
消化餅都係唔覺好鹹，但一樣高鈉的食物。而呢款消化餅蠱惑地方在於其單位用了「克」去計，而不用常用的「毫克」。如果用「毫克」去計就啱啱好600，達到「高鈉」食物的標準，如果用「克」去表示就為0.6，驟眼睇就以為好細，其實一樣！而分量方面，100克大約6至7塊左右，加上消化餅亦係食唔停口的零食之一，所以唔經唔覺就好易食多咗鈉。
薯片
鈉量：529毫克（每100克）
薯片唔使講都知道鹹，雖然每100克未過600毫克， 但都有差唔多530，差唔得多，但今次要講嘅都係關於分量方面嘅問題。薯片惹味易入口，通常一人擦晒成包，如果中型至大型包裝的薯片，其分量絕對不止100克，極易超標，John 建議每次不要吃完一整包，可以先吃一半，再留下次再食。
番茄汁
鈉量：288毫克（每100毫升）
蔬果汁及番茄汁，本來是低糖健康的營養飲品，但想也想不到原來也是高鈉飲品。由於新鮮蔬果易變壞，所以要加入鹽作保鮮作用，除了水分外鹽就是最多的食材，加上罐頭食物的鈉一定比新鮮食物高。雖然以飲品專用的每100毫升去計， 其鈉質未達到高鈉的標準，但由於罐裝飲品一般都是一次性的食用，所以會用其罐裝分量作為食用分量，以上兩罐的鈉分量都接近全日的四分一量。
資深營養師
黃榮俊（John）
參考資料：衛生處網頁
