6位媽媽分享真實經歷：接種新冠疫苗防重症好重要！

幼童接種新冠疫苗指引

懷孕的媽媽接種疫苗，不但能減少重症，還可以把抗體傳送予胎兒。餵母乳的媽媽接種後，初生嬰兒更可以透過母乳得到抗體的保護。不過就算媽媽已經接種新冠疫苗，抗體經寶寶新陳代謝之後亦會隨時間消失，所以由2022年8 月開始，本地專家建議滿 6個月的幼兒盡早接種新冠疫苗，以減少重症、降低死亡率，以及康復後出現「長新冠」及多系統發炎綜合症等的風險。

新手媽媽齊心呼籲 盡早帶小朋友接種新冠疫苗

相信不少父母對新冠疫苗並不陌生，但要安排小朋友、甚至初生寶寶接種都會有所憂慮。今次邀請了6位新手媽媽現身說法，分別是康復者的媽媽、已為小朋友接種疫苗的媽媽及餵母乳的媽媽，分享小朋友確診以及接種新冠疫苗的真實經歷。

康復者媽媽 Kristy：16個月囡囡確診危殆 後悔無預早接種疫苗！

從來都無諗過「危殆」兩個字會發生在自己囡囡身上。Kaylie 由一位兒科醫生及一個兒科護士跟救護車由港安醫院轉去瑪嘉烈嘅 PICU 病房，眼見自己小朋友全身四肢插滿喉，每條喉都是用來打仗的救命藥，心痛到完全無辦法形容！

正正因為親身經歷過，更加令到作為父母的我們反思過去一直對為幼兒接種新冠疫苗抱住懷疑的觀念，認為第一次中都只是輕微病徵，單純發燒，連少少咳都無，就覺得就算再中都應該會好似第一次屬於輕症，但估唔到第二次會是重症！作為父母可以做的就是對自己的子女負責，不希望再有任何人好似我們，小朋友中 Covid19 情況危殆的時候先後悔，點解之前無帶小朋友預早接種疫苗。康復過後，我們都打算按醫生建議的時間帶 Kaylie 去接種新冠疫苗。

康復者媽媽 Vicky：慶幸小朋友有打齊疫苗 病徵唔算嚴重！

我們一家四口在去年九月確診，幸好當初決定幫兩個小朋友接種新冠疫苗，病徵唔算嚴重。兩個小朋友都是輕微發燒及咳，有胃口食飯，沒有喉嚨痛，仲有精神玩玩具同四圍跑，好好休息幾日就好轉，照顧他們唔算好吃力。

康復者媽媽 Annie：囡囡未打齊針 但情況都唔算嚴重！

還記得早前疫情較嚴重時，囡囡和我先後確診，好彩我們已經接種疫苗。雖然囡囡未打齊針，

但情況都唔算嚴重，有輕微發燒同喉嚨痛，過幾日就漸漸康復。慶幸當初有接種新冠疫苗，我和囡囡染疫後情況都算輕微。守護自己和家人的健康，盡快為小朋友接種新冠疫苗啦！

已為小朋友接種疫苗的媽媽 April：小朋友打完針無特別唔舒服 休息一兩日已可如常外出去玩！

雖然很多人都已經當新冠肺炎是風土病，不過始終都有一定風險，尤其是小朋友，所以作為家長真係會好擔心！疫情期間，除了注意個人衞生及清潔，我們全家都已經打齊針！

打針前其實都有不少顧慮，擔心疫苗的安全性及所帶來的副作用，而醫生就解釋疫苗已經通過嚴格測試，是安全及有效的，所以鼓勵無論大人定小朋友都要打齊針保護自己。慶幸兩兄妹打完針都無特別唔舒服或者出現副作用，休息一兩日已經可以如常外出去玩。

為了讓小朋友得到最好的保護，減低感染後患重症的風險，建議盡早完成新冠疫苗接種！

已為小朋友接種疫苗的媽媽 Yan：小朋友打針後無出現副作用 休息一日可以如常返學

之前一直都有顧慮，擔心打針引起副作用，或者會發生罕見嘅異常反應，但又考慮到如果感染新冠有機會引致重症，最嚴重甚至會引致死亡，就會擔心發生在小朋友身上。在我們咨詢家庭醫生的建議後，帶了月月去香港兒童醫院接種疫苗。環境很適合小朋友，護士們都很有經驗，識分散小朋友注意力，盡量令小朋友放鬆。慶幸打針後無出現副作用，休息一日就可以如常返學。為免屋企人冒險，最有效的方法就是安排小朋友盡早完成新冠疫苗接種！

餵母乳的媽媽 Yoyo：餵母乳期間接種疫苗 BB 得到抗體保護！

上年在哺乳期間接種疫苗都有好多考慮，都擔心有併發症/副作用，怕影響肥髀。不過醫生建議最好接種，因為餵母乳嘅媽媽接種後，初生嬰兒就可以透過母乳得到抗體，萬一感染，自己和 BB 都會有更好保護，減少重症的機會，所以最後都有接種。

上年十月我們一家都受感染，病情不算嚴重，我甚至一直一條線，肥髀雖然十四日兩線，但他病徵算輕微，好快好返！為屋企人的健康着想，帶埋小朋友接種疫苗啦！

提提各位家長，小朋友康復之後，抗體會隨時間減退，如果未完成接種足夠劑量，一定要聽從醫生建議帶小朋友打齊新冠疫苗，預防再次感染引致的急性併發症及中長期後遺症。別再猶豫，守護一家人的健康，記得要帶小朋友打齊疫苗！

了解更多疫苗資訊: https://www.covidvaccine.gov.hk/zh-HK/ChildrenAdolescents

預約接種: https://booking.covidvaccine.gov.hk/forms/index_tc.jsp

(Presented by 衞生署)