下流上車族大結局︱林敏驄分享7分半鐘「一鏡版」爆喊證演技 NG爆笑大放送
下流上車族大結局焦點：林敏驄江美儀派洋蔥
今晚大結局最大睇頭，當然係陷入離婚邊緣嘅車氏夫婦如何大團圓結局，林敏驄更會大拋感人Bite：
「我哋加埋幾多歲喇？唔通仲可以有轟轟烈烈嘅愛情？我只希望呢個家齊齊整整，可以同你細水長流，我唔知仲可以睇佢哋幾耐，我只係知道前面嘅路，我要同你一齊喊，好唔好呀老婆，對唔住。」
林敏驄同江美儀再度聯手大派洋蔥！林敏驄更在結局播放後出了7分半鐘「一鏡版」，兩公婆復合對戲對白1 take過，驄哥自己都留言話無人敢嗌Cut！
下流上車族NG合輯
NG笑場之外，其實好多時仲會夾雜住一堆真心話……同好多亂噏嘅無謂嘢：
芊芊高榮復合有喜大團圓
另邊廂高榮（丁子朗飾）不堪外母雯慧嘅高壓政策，忍唔住搵志明訴苦，豈料被芊芊無意聽到，芊芊為咗媽媽忍痛與高榮分開，令新婚嘅二人陷入離婚邊緣！
芊芊不忍高榮左右做人難忍痛提分開
雯慧（江美儀飾）誤以為芊芊（郭柏妍飾）有孕，看完醫生後後來發現只是腸胃炎，兩人空歡喜一場。晚上芊芊和高榮在家，芊芊含淚質問：「你想唔想我有bb？」面對高榮遲疑的表情，芊芊失望表示知道高榮下午和父親的對話，高榮對志明訴苦受不了岳母雯慧的高壓政策。對此芊芊表示高榮應該愛屋及烏，芊芊心痛高榮的身份夾在中間左右做人難。芊芊為了母親，只好忍痛與高榮提及分開。
雯慧志明解開誤會相擁而哭
看着女兒芊芊和女婿高榮之間的痛苦，令志明不禁反思與妻子雯慧的婚姻關係。最後他決定好好面對雯慧，並正視兩人的誤會。志明向雯慧澄清外遇一事只是誤會，雯慧不信志明的話，表示蔓蔓不是三歲小孩更質問「冇嘢會喊的咁犀利？」，雯慧悲傷表示自己有許多不好的地方，更質問志明：「你搞到我傷心就算啦，點解要搞到兩個女都咁傷心啊？」，志明誠懇表示：「我好珍惜呢個家。」，更崩潰稱：「我哋加埋幾多歲喇？唔通仲可以有轟轟烈烈嘅愛情？只希望呢個家齊齊整整，可以同你細水長流。我只希望前面有路可以同你一齊行。」後來夫妻之間終於敞開心扉，相擁而哭。
林敏驄獨家分享「一鏡版」畫面 ——「邊個咁夠膽嗌Cut？！」
高榮險被車撞 車家解開心結
芊芊想暫時離開傷心地，收拾行李前往機場到他處散心，高榮頓失方寸，打算走到機場阻止芊芊離開，情急下衝出馬路。芊芊誤以為高榮被車撞到，趕回家後一家聚在一起，車家各自坦承自己感受，後來解開心結，和好如初。結局芊芊與高榮宣佈將榮升父母，車家感動相擁，謝毓霞（鮑起靜飾）更表示提供首期讓志明夫婦買樓，場面溫馨感人，結尾車家一起睇樓。
羅毓儀喊到面都紅晒
噚晚一集羅毓儀拍這場喊戲表現相當投入，激動到面都紅晒，羅毓儀受訪時透露事前原來向影后鮑起靜請教：「因為冇經歷過呢樣嘢，所以拿捏唔到個情緒應該去到邊，鮑姐幫我分析話蔓蔓比較小朋友，遇到呢種情況會感受比較大，喊得比較勁，聽完鮑姐講再加埋自己想像，就代入到個角色。」
羅毓儀：特別感激「媽咪」江美儀
羅毓儀話呢場戲前後拍咗兩Take，並特別感激「媽咪」江美儀信任：「第一Take其實都喊到，但媽咪睇完Playback後覺得我可以喊得再入肉啲，之後叫導演畀多次機會我。其實本身自己睇完都覺得爭啲，但始終自己係新人唔夠膽要求嚟多Take，唔敢保證會唔會做得更好，好多謝美儀姐相信我做得到，覺得好感動。」
林敏驄睇全家福爆喊
來到劇集尾聲，林敏驄再度攻陷觀眾「淚點」！劇情講到受盡傷害嘅雯慧（江美儀飾）向志明提出離婚，志明遂陷入後悔輪迴，一邊睇一家人嘅相片一邊爆喊；失去家人嘅志明更幻想一家四口重聚的畫面，四人相擁而泣，煞是感人，但鏡頭一轉只剩下志明獨自躺喺梳化落淚，突顯出志明嘅孤獨。
林敏驄提議加喊戲
林敏驄受訪時透露呢場戲係自己提議加呢一場：「本來場戲係得我一個喊，之後我覺得兩個女啲演技開始成熟，可以喊得出喇喎，加上大家相處咗幾個月，有咗感情基礎，所以搵埋佢哋同美儀姐一齊演，大家拍呢場時都喊晒，美儀都喊到收唔到聲，感覺非常好。」
林敏驄喺社交網上載當日花絮照，透露試Take時已淚如雨下，四人更相擁喊足8分鐘，佢留言：「1sttake已經是相當滿意達標，稍作休息，看看playback，閒話家常，說說笑，大伙吃著美儀煮來的雞翼，休息十分鐘，再來一take，一揮而就，工作本來就應該是這樣。」
曾志偉現身支持笑談收視約定
日前《下流上車族》一眾演員相約看劇集播出，期間曾志偉更現身支持劇組，該劇收視不俗曾志偉被問到和林敏聰的收視約定時，他笑言：「裸跑媽，我依家去街市買緊隻『螺』。」引起全場大笑，林敏聰表示一早預計曾志偉「唔認數」，更反問：「你第一日識佢咩？」
