中年好聲音2︱第二回合海選8位參賽者起底！李嘉欣同屆港姐、鄧兆尊細佬參賽
1. 蔡美蘭 ︱52歲艷星亞姐跳唱走曬音
今年52歲艷星亞姐出身嘅蔡美蘭於《中年好聲音2》第二輪海選又唱又跳《漫步人生路》，雖然唱得非常投入，但奈何唱到走曬音，拍子又甩曬，搞到曾志偉都聽到苦笑，連評判之一嘅張佳添都話：「呢個我唔係好識評，交畀你啦肥媽。」
蔡美蘭選亞姐入行 曾與李嘉欣選港姐
蔡美蘭曾經參加過1993年《亞洲小姐競選》，因為身材姣好加上外貌甜美，一度被視為大熱門，不過最後都三甲不入，只獲得「最上鏡小姐」。不過原來早在1988年時，她已經參選過港姐，仲同大美人李嘉欣同屆，不過最後就連決賽都未能成功打入。
2. 鄧兆榮︱鄧兆尊細佬眼濕濕懷念祥嫂
鄧兆尊細佬鄧兆榮以譚詠麟《孩兒》參賽，雖然唱得好有感情，但就被張佳添嫌唔夠氣。鄧兆榮一出場就被問到為何參加比賽，鄧兆榮就表示：「因為想起早幾年媽媽過身，想有機會有幸可以喺舞台上獻呢首歌俾父親同母親。」之後仲眼濕濕咁多謝父母：「希望有機會感激父母，因為到中年有好多感受同回憶，希望有機會鼓勵吓自己兩個仔，要對父母感恩。」
曾因爭產頻現身與祥嫂和好做孝子
鄧兆榮早年在爸爸新馬師曾（鄧永祥）離世時，曾與其餘三兄弟姐妹因爭產而同媽媽祥嫂（洪金梅）鬧翻，更多次同家姐鄧小艾上庭作證。不過最後一家都和好如初，四兄弟姐妹喺祥嫂過身時候都有出心出力為母親辦喪事。
3. 方俊︱張偉文經理人表現獲肥媽大讚
張偉文經理人方俊今日以譚詠麟《愛的根源》一曲參賽，一出場肥媽就認得佢係張偉文經理人，仲同張偉文開過多場演唱會。雖然今日方俊有少許走音，但肥媽同張佳添都開口大讚他唱得好。
張偉文百病纏身 方俊有情有義承諾照顧一生
張偉文自2015年開始已經出現健康問題，受腰患、糖尿病、腳痛等病痛纏身，更曾經先後動過兩次大手術，體重一度由260磅跌至160磅。不過當方俊知道張偉文有事之後，他都義不容辭咁去幫佢，仲承諾會照顧張偉文到最後一日。
4. 孫耀威妹妹參賽 稱哥哥搞到自己冇得出道
孫耀威妹妹Miranda Suen特意喺瑞士飛到香港參加《中年好聲音2》海選，挑戰高難度選唱孫燕姿《天黑黑》。Miranda表示自己自細已經好鐘意唱歌，但因為哥哥做咗歌星，所以自己冇機會唱歌。哥哥孫耀威今次亦知道自己參加比賽，哥哥一開始問：「你有份工做緊，點參加？」直到她買了機票，哥哥就叫她抱着平常心參賽，肥媽笑言：「叫哥哥幫你練歌，呢個免費㗎！」
6.姜珈欣參加完《全民造星3》過檔TVB
曾經以姜嘉欣參加過ViuTV《全民造星3》嘅姜珈欣，今次再以《夜機》一曲再戰《中年好聲音2》。一唱完肥媽就即刻開口批評：「而家好多人唱歌嗰口都係唔開嘅，要用個鐵筆撐開先得嘅。你個口唔打開，你啲歌詞係入唔到咪，就算幾有感情都係冇用。」
7. ViuTV前主持羅沛琪（Pinky）
現年37歲的ViuTV前主持羅沛琪（Pinky）一出場即刻惹來網民熱議，Pinky直言自己好鐘意唱歌，但入行後就一直對自己唱歌無信心，睇完《中年好聲音》之後先激勵到自己再挑戰唱歌。Pinky以衛蘭《霎眼嬌》參加海選，睇嚟一班評判都好滿意Pinky嘅表現，畀佢唱曬全首歌！
8. 亞視《超級巨星1》陳鴻碩脹爆再參賽
曾經參加過TVB《超級巨星1》嘅陳鴻碩，今日脹爆現身海選現場，大唱張敬軒《只是太愛你》。陳鴻碩今日嘅表現深得評判歡心，更獲肥媽等人大讚。不過網民就話陳鴻碩發福不少，差啲唔認得佢，仲笑指陳鴻碩係「中年好發福」。
