中年好聲音2｜ 陳俞霏爆喊自認「人生失敗」肥媽出言教誨低分晉級

18強「故事之歌」繼續淚水泛濫，18強演出歌單及分數如下：

經過一輪激戰，黃劍文和譚輝智同樣奪得87分，成為昨晚一集最高分兩位，上集獲得95分的安雅希則獲頒MVP，至於周碧嘉和袁思樂同樣獲得77分被淘汰。

陳俞霏唱 《沒結果》灑淚談單親經歷「覺得人生係好失敗」

陳俞霏以All Black造型亮相獻唱《沒結果》，曾經兩奪5星的她坦言，這首歌《沒結果》是她人生的寫照，陳俞霏分享嘅故事就令大家相當嘩然，原來性格樂觀嘅佢，曾經經歷婚姻失敗，仲因為嚴重抑鬱症而令婚姻破裂，佢亦公開同媽咪嘅關係唔係太好，相信同原生家庭有關，陳俞霏話：「因為我好細個爸爸就過咗身，媽咪一個人獨力湊大我，但媽咪係第一次做媽咪，呢個好多單親家庭嘅孩子都會明白，佢哋(父母)唔係好識愛，但佢哋會畀到好多物質上嘅嘢我。」

陳俞霏又指其實自己只係想一家人一齊食餐飯，佢又指自己咁多年嚟都冇同屋企人過個一次生日。 陳俞霏接受訪問時，表示自己係落咗好大勇氣先夠膽揀呢首歌去講述自己嘅故事，佢話自己唔太適合傳播情感，反而係更啱傳播快樂，自己更加鍾意唱快歌，所以今次對佢嚟講係一個好大嘅突破呀！

肥媽勸勉陳俞霏：唔識教唔代表唔愛你

人生閱歷豐富的肥媽聞言後語重心長對陳俞霏說：

「你覺得冇同屋企人食過一餐生日飯係好慘嘅事，你係錯嘅，你家人錫唔錫你佢永遠都係家人，同埋我哋嗰代讀得幾多書啫，其實你哋依家大個咗，應該知道我哋嗰代做嘢都好辛苦，我哋係用把口嚟教，我六年班都未畢業，點教我啲小朋友，咪日日鬧囉，但係出嚟都OK，我哋唔識教呀，唔代表我哋唔愛你，你知唔知呀？」

陳俞霏上回合唱 《失戀無罪》自爆失婚變獨身

無受關注的陳俞霏今次自爆單親，其實在上一回合也曾披露自己失婚變獨身，以全黑西裝上陣的俞霏獻唱《失戀無罪》，她透露唱這首歌的原因：

「前嗰排經歷咗好多事，導致婚姻失敗等等一系列嘅事，覺得揀呢首《失戀無罪》幾好，其實就算一個人獨身都可以好快樂，希望不負呢個舞台同埋自己。」

陳俞霏上回合對戰安雅希坦言要「打定輸數」，因此唔再唱拿手的快歌，決定「回應網民要求」唱慢歌。選A-Lin的《失戀無罪》，雖然單對單敗陣但最後都能晉級。

顏米羔賽前兩日失聲搵車婉婉打救　伍仲衡竟然話病病地有着數？

愈唱愈強的顏米羔獻唱《時代曲》，他說：「第一次聽呢首歌係放學睇《都市閒情》，聽到之後覺得，點解機會人人有，但我冇呢？」米羔獻唱完畢後，婉婉說：「其實佢2日前失咗聲，佢喺社交平台問我有冇神醫幫佢醫番好把聲！」周國豐說：「好鍾意你演繹呢首歌嘅態度，呢首歌係講個大時代嘅小人物，其實係有啲憤怒，你失咗聲之後都唱成咁，值得鼓勵。」伍仲衡則說：「我想講一樣嘢，你成日都好爆，有爆炸力冇問題，但唔識收，你今日識收，係咪因為病病哋？你病病地有着數喎！」

沈宗賢與一生最愛分手後不敢再愛　

來自馬來西亞的沈宗賢獻唱《曲終人散》，他坦言上一段戀情對他傷害很深，他說：「佢係我好喜歡嘅一個女仔，佢為咗我同屋企人嘈交甚至反面，我當時係以唱歌維生，收入唔穩定，依家諗番起係辜負佢好多，分手嗰刻係好絕望，佢要出埠做嘢，但我嗰時仲喺度考慮，唔想放棄音樂，到我掙扎咗成年之後，有一日夜晚，佢同我講不如分開啦，當時我已經辭咗職放棄唱歌，但佢話已經太遲，叫我唔使放棄、繼續追尋我嘅夢想。」

張佳添嗌無言：我單身咗8年，但我永不孤單！

感性的宗賢獻唱前先來一個獨白：「可能這輩子我們注定只可做朋友，是我沒用，去找你的幸福吧。」唱到尾聲更忍不住爆喊，張家誠說：「我覺得你個人幾浪漫，好勇敢地唱番自己嘅故事，好Touch到我，覺得咁嘅男人幾浪漫，應該幾多女仔鍾意。」婉婉即踢爆宗賢分手後未有再拍拖，張家誠笑言：「吓，咁呢啲唔係浪漫，係傻仔，唔好意思！」伍仲衡搞笑踩多腳：「我真係要送你兩個字，戇居。」張佳添更笑言：「我真係無言，成個森林喺出面，我單身咗8年，但我永不孤單！」場面搞笑。

身世可憐！黃劍文26歲生日母親自殺亡　感恩來得及說我愛你

獻唱《愛很簡單》的黃劍文身世相當可憐，沒有見過親生父親的他年幼時與母親關係生疏，一直由公公、婆婆和阿姨照顧長大，劍文說：「喺幾歲時阿媽再嫁，但後父唔想我嗌阿媽做阿媽，要嗌阿媽做阿姨，曾經因為嗌阿媽做阿媽，咁就做錯咗，從此我冇再喺呢個家庭出現，冇得再一齊去旅行。」劍文年幼時為了可以和媽媽親近一點，更試過淋雨令自己生病，他說：「因為病嘅時候就可以見到佢，有一段時間成日好想自己病。」劍文長大後與媽媽感情變好，他笑言：「放工之後會陪佢飲酒，嗰時係好Enjoy。」可惜好景不常，劍文26歲生日時媽媽卻自殺身亡，他說：

「26歲生日時，生日前一日打電話同佢講，話多謝你咁多年照顧，同埋講我愛你，我就逼佢同我講番我愛你，當時佢都話我都愛你，但我好感恩有個咁嘅機會，之後喺我生日過咗第五日，佢就離開咗，我覺得我做咗，所以冇咗個遺憾，起碼同媽媽講咗一次我愛你。」

媽媽離開之後，劍文曾有一段時間好失落，之後決定離開香港流浪4年，他說：「好感謝有音樂去醫治到我嘅難過。」黃劍文的真摯演出最終獲得87分，伍仲衡說：「今日係我搵番我以前認識嘅黃劍文，其實你咁樣咪好囉。」

譚輝智《深深深》唱出Magic　張佳添：你成功令我對呢首歌改觀

獻唱《深深深》的譚輝智透露年輕時外地讀寄宿學校，他說：「呢首12歲嗰時成日聽，喺宿舍會聽到喊，去到當地唔識講英文，變咗我就成日聽歌，呢首係其中一首最深刻嘅。」

輝智深情演出最終獲得87分，張家誠說：「你唱我好穩定，但就冇驚喜，我覺得同原裝冇咩分別，呢個係一個優點，亦都係一個缺點，呢個階段你用呢個方法去比賽係冇問題，但你想贏就要諗多少少。」

張佳添則給出19分高分：

「你成功令我對呢首歌改觀，本來對呢首歌個旋律唔係太有感覺，但係聽完你唱之後，我開始鍾意呢首歌，呢樣嘢簡直係Magic嚟，畀到一種新鮮感我。」

至於MVP獎項落在上集獲得95分的安雅希手上，這次是她第二度獲得MVP，負責頒獎的張家誠說：「我都做咗音樂廿年喇，喺我手上可以拎到滿分嘅參賽者係極之少，今次好好彩又遇到，滿分對我嚟講係好大意義，唔止代表咗佢唱到歌，佢仲可以感動到人，同埋有自己（特色）同音樂感，今日呢位MVP全部都做到。」