余德丞聲討香港生活媒體看圖作文漠視真相 不忿曲解Do姐對話指鹿為馬
余德丞與已婚女同事行街被偷拍「慘食死貓」
日前商台DJ呂珮琳(Elsie)在限時動態發布了一張照片,相片中她與一名男子在街上睇落十分親密,更疑似拖手過馬路。照片亦引起Elsie妹妹懷疑,仲即刻向當事人求證。Elsie隨後發文表示:「當你同男友人出街,連你細妹都以為你出軌嘅時候…how come you don’t trust me!?!?」
![佘德丞 elsie 涉事某香港生活媒體以「余德丞疑偷食人妻同事拖手斷正?」以及「Do姐抽水:趷起條尾都知你想點」為題進行報導,雖然加上疑問標點企圖扮作持平,但曲解事實意圖明顯,令余德丞不忿被砌生豬肉嬲爆出聲明。(圖片來源:新聞截圖)](https://imgs.orientalsunday.hk/wp-content/uploads/2024/07/photo_2024-07-12_11-32-17_18710224616690b63a57664.jpg)
Elsie隨後po埋放大的合照,並留言:「一張非常奇怪的合照,但引起誤會實在太搞笑。」原來該名男子竟是余德丞,而Dickson亦都轉發圖片兼tag埋Elsie老公Agent L及以阿正,兼表示:「#真係無拖手。」原來相中企喺2人身後戴帽同口罩的女子,正是黃正宜(阿正),而阿正亦笑稱自己係電燈膽。
![佘德丞 elsie Elsie隨後po出放大版的照片,仲配文稱「一張非常奇怪的合照,但引起誤會實在太搞笑」。而照片中站於2人身後打扮十分低調的黃正宜(阿正),亦轉發限時動態兼hashtag搞笑表示自己係電燈膽。(圖片來源:IG@903ahjeng)](https://imgs.orientalsunday.hk/wp-content/uploads/2024/07/-2024-07-12-11.57.28_2485001746690b24e09f88.png)
余德丞電台節目澄清
在昨日(11日)《口水多過浪花》中,余德丞就謠言進行澄清。余德丞表示:「當晚我同Elsie、阿正3個錄完音,跟住去攞車,等過馬路…好衰唔衰,我有180cm高,咁阿正生得矮又企我後面,所以我遮住咗佢得番四分一面,佢又戴帽戴口罩,冇人知嗰個係阿正!咁當時喺彌敦道有啲嘈,我應該係想聽Elsie講咩,所以哄埋啲,我哋係同事兼朋友,我絕對冇介入人哋婚事!」余德丞仲表示自己同Agent L其實好friend,並透露2人最近一齊飛去德國睇歐國盃,因此唔存在誤會發生。而Do姐仲抽埋吳若希水,搞笑話:「人哋老公會寫『你趷起條尾都知你想點』。」
![佘德丞 elsie Elsie與Agent L於今年1月拉埋天窗,而余德丞亦於節目中透露自己早前仲孖住Agent L飛去德國睇歐國盃,表示2人之間唔存在誤會,而自己亦唔會插足別人的婚姻。(圖片來源:IG@elsie_lui)](https://imgs.orientalsunday.hk/wp-content/uploads/2024/07/image-4471881_15044141216690b2919010a.jpeg)
余德丞IG嚴正聲明狠批指鹿為馬
余德丞昨日於電台澄清後,今日(12日)再度於社交平台發出嚴正聲明,嬲爆直斥該網媒「既然標題引用鄭裕玲小姐於商業電台『口水多過浪花』節目內對話,足以證明撰文者並非單純看圖說故事,而是已經收聽有關內容。」,稱其係指鹿為馬同誤導讀者。余德丞隨後再於限時動態po出1張鹿的圖片,並配文「這隻是馬」,再次暗串被該網媒故意誣蔑。
不少網民都留言力撐余德丞:「信你眼光同你為人,完全係匪夷所思嘅新聞嚟」、「撐你!直斥其非」、「嗰份嘢不嬲都冇乜好寫㗎啦……」、「新聞真的過分,嘩眾取寵,支持你」,更有網民直接tag埋涉事網媒,為余德丞抱不平。