83歲余慕蓮ICU留醫 一生不嫁因童年… 熱心慈善不惜捐身家助人

撰文：東方新地｜圖片：新傳媒圖片庫、電視截圖、Facebook

83歲余慕蓮傳短訊向好友「道別」

有指魚毛姐仍在插喉，但目前是清醒的，她曾傳語音短訊給好友，以平靜語氣作預先「道別」，指未知自己情況，將來能否醒來，若然不能醒來，便下世再見。魚毛姐余慕蓮將人生奉獻俾演藝事業，而最為人熟悉相信都離唔開醜角或「垃圾婆」，但魚毛姐好鍾意表演，認為咩角色都要有人做，所以佢一啲都唔介意。

余慕蓮喺香港影圏足足70年，演出超過二百套電影及電視劇，但從來唔奢望爭做女主角，反而淡薄名利，本住入行就係為娛樂大家嘅心，演出所有角色。

余慕蓮一生不嫁因童年…

魚毛姐小時候經歷父母離婚，童年缺乏家庭溫暖長大下，令佢一直唔敢相信愛情。1995年，魚毛姐與「銀幕探長」曹達華爆出戀情，但佢一直堅決否認指：「我不會給人機會，亦不給機會自己。小時候做戲院帶位的時候都有追求者的，我又不會對他們有好感，做朋友就無所謂。我怕投入了一段感情之後，變成一個容易受傷的女人。」

然而，余慕蓮過住獨居生活人緣卻相當好，身邊有很多朋友，閒時更會與友人到羅湖唱粵曲，有時又會去游水，更經常做慈善工作，幫助有需要嘅人。

余慕蓮不惜捐出身家

10幾年前，魚毛姐已將電視台頒贈嘅一筆約20幾萬長期服務金，部分捐去內地貴州興建一間小學，只望山區小朋友唔使再每日長途跋涉上課讀書！加上，自己冇結婚及冇下一代，所以更加希望能幫助有需要嘅小朋友，令佢哋有更好將來！

余慕蓮離開咗TVB多年，半退休後的生活，主力接散工，例如上內地拍網劇、接騷等。曾拍ViuTV劇集《詭探前傳》，劇中魚毛姐飾演嘅「媽姐」有別於以往只做啲行行企企角色，但就表示自己年事已高，已經唔會捱更抵夜拍劇。

較重視心靈上快樂嘅魚毛姐曾向好友透露最好就係於睡覺中安樂咁離世，並將自己所有財產捐俾慈善機構，難怪人人都話余慕蓮一啲唔醜，皆因心美。