大劉記者招待會｜劉鑾雄記招7大重點 字字珠璣暗指呂麗君係「納米型賊仔」
大劉記招重點1. 暗示後悔幫過呂麗君
大劉一出場，就解釋突然開記招的原因：「因為我再唔出聲呢，有啲人會愈做愈離譜！」他一開波就講自己好後悔「成年前去幫一個賤人」，雖然沒有指名道姓，但字裡行間都暗示出他講的就是前女友呂麗君：
「首先我想講好後悔，好後悔無幾耐之前幫個賤人，（去年年尾）應該由得佢破產，當日幫佢係唔想啲仔女有個阿媽破產，影響佢心情，但我睇番轉頭，真係由得佢破產好過。」
大劉記招重點2. 大劉回應遺產風波強調甘比冇蝕錢
相反，對於太太甘比（陳凱韻）大劉則是每一句都愛護着對方，有報道指出，大劉將財產轉給兒子，而甘比會被踼出局，他即斬釘截鐵否認：「又話全部財產轉畀個仔，甘比踢出局，點解要咁講呀，自己開心囉，講就有人信，我重申陳凱韻我老婆從來冇同我損失過任何錢，唔好話200億，佢同我賺超過200億嘅藝術品投資就有！如果有損失，私人來講，都係我自己的事。完全唔關佢事，佢冇同我損失過錢。『800億落空』，呢啲好似真嘅一樣都係假嘅；仲話我將啲財產畀個仔，完全都係冇嘅。」
他續指，甘比曾勸他不要開記者會，因擔心會影響一對子女，不過他認為被人造謠「等於有人要殺佢屋企人」，因此他堅決表示要出來反擊，更稱「即係如果要入屋殺我屋企人，我跛咗癱癱咗，我都垂死掙扎，垂死嘅反抗啦！」
大劉記招重點3. 反駁內地假新聞 大劉笑言就被激死
大劉在開記者會之前，講明要就幾篇內地的新聞報道作澄清，記者會上更印了相關報道出來讓傳媒影相。他表示失實文章是今日同事給他看的，看完之後非常生氣，更強調報道完全失實。他表示得知「賤人」有一隊由「忽然一周」前總編輯帶領的「特攻隊」負責在網上做「打手」製造謠言，更笑言自己就被激死：「講到佢（甘比）幫我損失百幾億，又話個仔乜乜，仲話我就嚟死。我早幾日約朋友食飯，話出面傳我身體好差就嚟死，你睇我而家個似唔似就嚟死？可能被人激死就有，但我自己身體係冇嘢。如果我再唔出嚟，可能傳我死咗。」
大劉記招重點4. 火力全開鬧爆「賤人」老屈
他又火力全開怒轟「賤人」方招搖撞騙，老屈自己：「呢個賤人最近去新加玻，冇人識佢㗎，自己招搖撞騙，人哋見到佢都驚咗佢。我夠可以喺電視同拜登合照、P圖話佢企喺我隔嚟啦！以前台灣有套電影叫《養鴨人家》，你知唔知鴨同鵝分別，鴨只係做女人生意，鵝就男又做女又做。呢啲係佢嘅私生活佢嘅事，唔關我事，我點解咁講呢？你睇吓呢叠嘢，完全0.001事實都冇，夾硬作出嚟老屈，我再唔出幫即係默認。我老婆陳凱韻使乜理佢吖，佢自我陶醉之嘛，等於咁，有一日有人要殺我屋企人，唔好講我係咪跛，我係跛係殘廢啊，我都要保護屋企人！」
大劉記招重點5. 大劉打算再改遺囑 斥有人「牙膏claim三次」、「納米型賊仔」
有記者問大劉最近一個月有否改過遺囑，他表示自己一早已經分了遺囑，不過現時打算再改，又指有人係「納米型賊仔」：「我早排一早分咗，我而家要再改，都要老婆執行我嘅意思，你聽唔聽得明啊？我而家自己乜嘢都冇！但係我相信我呢個老婆陳凱韻，叫我做乜我都會做。」
他坦言，會計部check單check得非常嚴謹，不開名狠批某人會執單亂claim數，專門搜刮細數目，係「納米型賊仔」：「佢（指前女友）唔止牙膏claim三次，喺超級市場地下啲單，佢都執嚟claim，你估我唔知咩？」
大劉又指有人轉賣手袋圖利：「佢最擅長係點呢？買咗個名牌袋之後，平價賣返出街。我記得40幾年前去夜總會，啲舞女最鍾意搵老襯。5千蚊買日本時裝，我就收返4千蚊現金，時裝舖就剩袋1千，40年前好興呢啲嘢㗎。」被問到看好哪個兒子日後掌管公司，大劉僅表示：「能者居之」，不便回應。
大劉記招重點6.大劉絕對不會分身家給「賤人」
有記者問大劉，是否「一定唔會分俾某啲人，某啲賤人」，他即講得非常激動：「賤人梗係唔會啦！你呢個問題都有少少問題啦！我長命一萬歲都冇機會啦！佢實破產㗎！貪到死，乜嘢都要借，你睇佢買嗰個晉環，畀10% deposit，畀15%政府！你夠薑嘅，你畀晒現金啦！我見啲有錢佬老婆畀現金，收租唔駛驚個payment吖嘛，但畀10%deposit，畀15%政府，你話係咪傻㗎？問題都唔係問題嚟嘅，你話係咪傻傻哋吖。」他續稱，由幾歲𡃁仔瞓地下到今日，從未見過如此壞的人：「我見壞人都見唔少，但咁X賤咁X壞嘅人，都係第一次見！」
大劉記招重點7. 年初以出手買入呂麗君灣仔壹環單位
大劉強調「賤人」無腦，又形容對方是鴕鳥：「以後再唔會救佢，再無關係。我打畀仔女時，佢就搭嗲，你估我會唔會聽佢電話？我出院時，佢見我未死得就扮Close，我即刻同陳凱韻結婚，點知要分身家先有保障。我開記者會之後一星期，我同律師講寧願分錯都唔願畀佢得益。可能我斗零都唔分，可能留畀我老婆同佢三個仔女決定，怕俾佢撻埋。」
翻查資料，呂麗君於2021年豪斥逾1.4億元買入4伙黃竹坑站晉環單位，惟其中一伙疑似撻訂，其餘3伙亦未完成交易。今年初大劉以首置名義﹑斥資4000萬元向呂麗君買入灣仔壹環的特色戶，報道又指出大劉及甘比接收呂麗君位於金鐘遠東金融中心價值1億元的半層寫字樓，而同日呂麗君還清了市值3億元的跑馬地獨立屋按揭。
資料重溫：大劉呂麗君情斷8年後首度同行原來有內情
去年聖誕節前，網上流出一條富豪劉鑾雄（大劉）在皇室堡發火鬧途人的影片，同時被揭與情斷8年的呂麗君（現名呂姵霖）同行，畫面爆出引來不少揣測，於是大劉罕有展開記招澄清二人關係！
正當外界以為大劉和呂麗君關係破冰，點知大劉發聲明，強調與呂麗君再見不是朋友，為免惹來復合的誤會，及有人乘機招搖撞騙，他才逼不得已出此聲明，聲明內容如下：
澄清聲明
對於近日有媒體明示或暗示，意指我與呂麗君(現改名為呂姵霖）復合一事，並非屬實，為免引起大家的誤會，本人 劉鑾雄認為必須要作出以下澄清，以正視聽：
1. 最近因呂小姐有困難，有事相求，本人為免小朋友受到影響的關係，遂與呂小姐達成商業協議。當日呂小姐只是在本人位於皇室堡的寫字樓簽署相關商業交易文件，然後在沒有相約之下一同乘搭電梯離去，並不是呂小姐與本人相約逛商場，在此之前，本人與呂小姐已多年沒有見面。
2. 上述有關交易純屬商業性質，並不構成本人對呂小姐任何財政照顧或支持。
3. 對於近日媒體出現網路打手，故意散佈謠言，不僅誤導公眾，亦對本人及本人家人造成滋擾，本人覺得有必要作出澄清。
4. 本人於2016年與陳凱韻結婚，亦早已將絕大部份名下財產作出處理，以防日後他人作出任何無理訴訟，所作一切無非為保障陳凱韻及家人，避免日後有人為一己私利，興風作浪。
5. 本人重申，本人與呂小姐除了作為小朋友的父母親外，並無任何關係，亦絕對不想有任何關係，請大家不要誤信網路打手不實傳聞，作出無謂的聯想或揣測。
6. 本人自2014年與呂小姐分手後，不相往來，是次作出此聲明，實屬逼不得已，為免他人乘機招搖撞騙。
大劉2016年娶甘比 登報與呂麗君撇清關係
劉鑾雄2016年11月在各大報章頭條發聲明，正式澄清與呂麗君在2014年已分手，強調兩人已斷絕關係，與此同時大劉與另一紅顏知己甘比則在同年11月18日入紙，正式註冊結婚！
大劉發聲明會負責子女生活開支
大劉在2016年的聲明中，澄清與呂麗君在2014年時已分手，二人已斷絕關係，僅僅是一對子女的父母而已。而大劉作為父親，會繼續負責子女的生活、教育及其他開支，包括現時居住的大宅、車輛及私人飛機等。其次大劉稱與呂麗君分手前，一直照顧對方的起居飲食，並有大量現金、首飾的餽贈，總值超過港幣$20億！
另外大劉又指責呂麗君「貪得無厭」，指就算給予呂麗君100億，對方一樣會為一蚊而出賣自己。另外大劉亦擔心自己離世後，呂麗君會因爭產而與甘比及子女們對簿公堂，故已預留逾100億港元現金給甘比及長子劉鳴煒打官司，揚言絕不退讓。
甘比2016年榮升劉太
而大劉在發出聲明後，原來與甘比已在2016年11月18日入紙，正式註冊結婚！甘比透過短訊回覆傳媒：「多謝！這是一件人生中最開心事！」至於大劉接受訪問時，則稱幾年前已經計劃與甘比結婚，這個決定與近日發的聲明無關。另外大劉亦大讚甘比不貪錢、為人單純，不是壞女人，一直都好照顧自己及一眾子女。
呂麗君回復單身 成為「超級富婆」
呂麗君在與大劉分手之前，曾為對方育有一對子女，雖然兩人高調分手，但大劉表示自己依然會履行父親的責任，照顧呂麗君所生一對子女的額所有教育和生活開支。除此之外，大劉表示自己過往已經餽贈大量禮物包括現金、首飾、豪宅給予呂麗君，總值超過港幣20億，直指女方「已是超級富婆，無需要我任何經濟支持，也可過着富裕的生活。」
回復單身的呂麗君也一直住在山頂白加道獨立屋，近年改名為呂姵霖，以此名字成立基金，推廣教育及藝術發展。閒時又會去跑步、攀石、做瑜伽等等，過著「超級富婆」的單身生活。
