69歲吳孟達開工心臟突感不適 向工作人員話⋯⋯
文：東方新地｜圖：電影花絮片截圖、東星圖片及新傳媒圖片庫
吳孟達：歇十分鐘沒用
吳孟達有份參演的電影《少林寺之得寶傳奇》日前發布花絮片段，片中吳孟達為拍攝電影宣傳海報而正落力擺Pose，但下一秒他卻突然感到心臟不適，表情痛苦地用手搓揉胸口，但他拒絕了工作人員叫他休息的提議，只是一邊致歉一邊說：「歇兩分鐘、十分鐘沒用的，就不要停了。」
工作人員一度將達哥扶到一旁休息。
吳孟達先是向工作人員笑住講了兩句「對不起、對不起」。
之後又話「歇兩分鐘、十分鐘沒用的」，忍痛堅持繼續海報的拍攝。
臨走時，吳孟達又向在場人士深鞠一躬，再次表達自己的歉意，表現敬業。
歷史重溫：2014年心臟發炎險死 吳孟達立定遺囑
吳孟達近年長駐内地搵食，爲了照顧現任妻子和一對仍在求學子女，加上仍要供養兩任前妻及三個女，達哥一人孭起三頭家，擔子極重，在2014年4月中，他疑因操勞過度，導致心臟發炎，期間病情惡化被送入ICU，一度誤傳死訊，幸好最後搶救成功，達哥形容死過翻生，除了戒煙戒酒保命，更立定遺囑求安心。
孭起三頭家
吳孟達曾經是周星馳的禦用拍檔，有傳二人因合作電影《功夫》不成反目收場，近年達哥主力在内地拍劇搵人仔，現任馬來西亞籍妻子和一對子女則在大馬定居，達哥之前經曆兩段婚姻失敗，據知現時仍要供養兩位前妻，以及和前妻所生的三名女兒，加上在大馬和北京的物業供款，每月至少四十萬開支，養家育兒和供樓，真是百上加斤！知情人士透露：「達哥年紀唔細，對仔女仲讀緊書，佢想老婆仔女生活好啲，梗係想搵得幾多得幾多啦！」
一度傳出死訊
2014年4月達哥於中港兩地拍劇及爲電影配音、宣傳，在石家莊拍攝内地劇《神醫傳奇》期間感染風寒，延遲診治導致病情惡化，返港後入院，情況危殆，一度傳出死訊，經醫生搶救後逃過鬼門關。達哥現任妻子侯珊燕立刻飛來香港照顧丈夫，來港兩星期，待達哥病情穩定才飛返大馬照顧兒女，4月28日，達哥親送太太到機場，入閘前，依依不舍，相擁良久。
臨别依依
達嫂專程飛來港照顧達哥，又要飛返大馬照顧一對子女，達嫂一直愁眉苦臉，一度低頭抹淚，相信是擔心達哥的健康。
急送ICU搶救
大病初愈的達哥，瘦了接近三十磅，腰圍縮了兩個圈，臉頰凹陷，聲音沙啞接受本刊記者訪問，大談今次徘徊在死亡邊緣的經歷。
記 = 東方新地記者｜達 = 吳孟達
記：因爲心臟有事入咗醫院？
達：細菌感染令到心臟發炎，入咗浸會醫院，留咗ICU八日，有兩個專科研究，要我大量去水、打去水針呀各樣，去完水舒服晒，之前心跳好急，最高一分鐘二百幾下，好危險，因爲心臟脹大，要食藥半年至九個月。
記：留院期間好辛苦？
達：好辛苦呀﹗瞓唔到覺，乜都唔想食。
記：最初點發現有事？
達：一路喺大陸拍嘢，求其當傷風感冒去醫咪瀨嘢囉！醫生見流鼻涕打乞嗤就當你傷風感冒，嗰陣喺石家莊係比較凍，空氣差，可能又攝親，啱啱嗰時要返嚟宣傳《香港仔》，都無即時去睇，拖咗幾日朋友帶我去睇相熟中醫，佢一把脈話︰「唔得喇！達哥，快啲去醫院！」話我心跳急促，再咁落去好危險﹗我先去醫院﹗
記：依家康復中？
達：依家每朝起身都度心跳血壓，食藥同去水丸，要去覆診，我水分多，排唔到水影響心臟，醫生限我每日只可飲三杯、即900毫升水，水呀、茶呀、湯呀、水果都計埋，但水分唔夠呢又去唔到廁所，醫生要我食纖維丸。
記：你瘦咗好多，磅數同之前差幾多？
達：入院前78公斤，出院時得番65公斤，廿幾三十磅。
停工養病損失大
記：係咪要全面停工？
達：拍唔到劇住，推晒，又推咗部話劇同電影，醫生叫戒煙戒酒，唔好操勞，唔好勞氣，所以話點解唔拍得戲呢，因爲激情大動作都唔做得。
記：損失好多？有無影響收入？
達：至少七位數啦，惟有靠其他收入，剪吓彩拍吓廣告做吓評審嗰啲。
記：有冇諗過立平安紙？
達：會呀，經過今次會搞喇！真係執番條命﹗
記：星爺有冇打畀你？
達：星仔吓嘩？唔知呢，啲電話老婆聽晒！
記：近年有冇聯絡星爺？
達：好耐冇見喇！
