60歲吳岱融榮升半億隱形樓王投資買磚頭寫老婆名

Feb 5 2020

60歲無綫藝人吳岱融喺2016年憑《巨輪II》大奸角「高天鷲」一角人氣急升，奸到出汁嘅表現非常亮眼，當年更獲網友盛讚「一個高天鷲救起成套劇」，在本周一（20號）出街的《大醬園》繼續做大老爺，無論正邪角色都難佢唔到。吳岱融默默做賺錢，夫婦二人幾乎所有的物業，保守估計手揸半億，都寫在鍾淑慧名下。日前，記者直擊岱融前往九龍城睇樓，大客仔駕到，地產經紀當然落足嘴頭，據知今次吳岱融睇了多個該區新建的豪宅樓盤，其中一個更是6千多萬的複式單位，吳岱融笑言自己有鋪睇樓癮，不過扑槌就交老婆話事，愛妻號吳岱融以行動證明錫老婆真係會發達㗎！

撰文、圖片：東方新地| 編輯：Sunday Kiss

吳岱融愈撈愈掂榮升半億隱形樓王

60歲的吳岱融一頭灰白髮已成為個人標記，愈老愈型的他鏡頭前擅演一手遮天的有錢佬角色，現實生活中原來都是隱形富豪。過去幾年吳岱融愈撈愈掂，拍劇又拍電影，商演亦不絕，而其太太鍾淑慧（Lily）更是人如其名，是個不可多得，賢淑又聰慧的老婆，早年她走遍國內登台搵人仔，夫婦二人獨具慧眼，早年已投資買磚頭，之前鍾淑慧見時機成熟，把國內五個物業套現逾千萬，而他們現在仍持有的物業亦分布東南亞各地。

據知情者透露：「岱融同Lily好多年前已經洞悉先機，佢哋鍾意喺外地生活，加上早年喺大陸搵到錢，所以物業都集中喺大陸同東南亞，不過近年岱融主要喺香港拍劇，留港時間多咗，呢幾年佢一直都係租屋住，見最近樓市好似有啲回落，所以有機會都想吼吓香港樓，不過佢哋喺大馬住慣幾千呎大屋，幾百呎唔會睇得上眼，如果買香港樓都要揀啲大單位，或者獨立屋。」在港忙於拍電影的吳岱融，日前與助手現身九龍城，本刊記者見他在地產舖前駐足近十分鐘，指住櫥窗內的樓盤招紙，與助手研究了一輪，有大明星駕臨，當然機不可失，店內兩名經紀即行出店外搭訕，未幾眾人即起行到附近的豪宅睇樓。

踢拖睇中複式豪宅全權交老婆話事

本刊記者見吳岱融上了一個低層單位，單位望九龍城寨公園景，他跟隨經紀走出露台望景，不過望了兩望就返入屋，看來這個單位並非吳岱融杯茶，之後未見他即時離開，未知是否繼續睇其他單位。約45分鐘左右，吳岱融徐徐步出，邊行邊興高采烈地與助手討論，莫非已經睇啱心水豪宅？

對於有意在港買磚頭，本刊記者致電吳岱融，他笑言老婆鍾淑慧不在港，絕對不敢輕舉妄動，「我唔係買樓，係睇樓咋！有時間咪睇吓囉，我不嬲有鋪睇樓癮，周圍睇，唔同地區都睇吓，時機啱同價錢啱先會入貨，不過咁大件事始終都要睇老婆頭，佢呢排唔喺香港，要等佢喺香港先再同我一齊去睇，我話唔到事㗎！」原來吳岱融當日還睇了一個叫價6千幾萬的複式單位，問他是否滿意，都係嗰句：「我滿意冇用，都要我太太鍾意啱佢心水。」