《學警出更》吳日言發聲明回應被爆「唔找尾數」 3大線索指控自認精神受困擾
設計師大爆「yan」字女藝人餐廳拖欠尾數$3,700
網民「19hkdesigner」表示：「女藝人要開新餐廳，朋友搵咗我做設計同印刷，後尾佢想加單印多啲，報完加單個價平唔過E Pxxxt，發脾氣直接走埋之前筆尾數，最後入咗小額錢債計埋其他數(如圖)，搞咗一年，法庭判我贏，但對方至今仍拒絕找數。」
事主提3大線索曲線爆身份拍過《學警出更》
第一線索是，在裁判書上打格仔，只顯示了一個「yan」字，該名設計師表示「佢個名應該個個都識，但真係唔係咁紅」、第二線索是「之前唱歌有拍過《學警出更》 」、第三線索是「佢間餐廳都仲喺香港做緊」。他又提到對方已婚，女藝人的丈夫原本打算找數，但最後冇咗件事。綜合以上描述讓不少人認為涉事女藝人可能是近年投身飲食業的吳日言，該設計師網民詳細列出了對方要求的十項報價，並表示因為對方是一張大單，所以報價相對便宜。
「跟住佢就係咁越cut越少，cut到6樣出單，仲不忘叫我出多一張報價單，數目寫大啲俾佢去呃正苦subsidy (支援香港品牌拓展海外市場) 」
設計師大爆女藝人至今仍拒絕找數
儘管法庭已判決勝訴，該設計師網民表示對方至今仍拒絕支付欠款。「真！傾咗係點就係點，見咗幾次官，傾和解果陣，女藝人老公仲話得果幾千蚊咁少，即找啦！之後應該俾老婆鬧，跟住走數。」他奉勸大家不要以為對方大單就報價平一點，客人未必會多謝你，還要寫明每樣原價幾錢，整張單一齊計埋才有幾多discount等等。「所以我今次瀨哂嘢，又計得好平又受哂氣，做譚仔阿姐仲好搵。」
吳日言嚴正聲明：毫無根據、不符事實
吳日言對設計師公開法庭文件表達強烈不滿：「針對該名設計師在網上發佈的虛假內容，這些指控是毫無根據及不符事實的。我們並未承認有任何責任或違約行為，但為避免浪費司法機構的資源，最終公司遵從小額錢債審裁處的判決進行了付款。此外，該設計師未經我們同意下，在網上披露法庭文件及雙方對話內容的行為是不當的，並且可能涉及法律責任。公司已徵詢法律顧問的意見，若此次事件對本人或公司造成任何損失，我和公司將保留追究法律責任的權利。作為公眾人物，我理解批評是不可避免的，我願意坦然面對。但作為母親，看到孩子們遭受不必要的人身攻擊，確實令我和家人受到極大的精神困擾。」
網民回應：買少件Chanel 都夠找啦
不少網民回應：「Google 吓 香港女藝人 yan 無乜幾個」、「上東張啦，女藝人用返電視台對付先有用家」、「我估係姓吳」、「報東張可能快過走流程」、「其實法庭判咗你贏，點解對方都可以唔找數！買少件Chanel 都夠找啦！」、「做人最cheap就係走數同爭人錢唔還」。
吳日言爆拍《森之愛情》騷錢極低！
TVB於2023年周六日晚深夜重播2007年的劇集《森之愛情》，這部由森美原創的都市戀愛故事劇全輯10集，每集都有不同女星同男主角森美談戀愛，其中第4集就搵來吳日言擔任女主角，但吳日言就自爆當年原來只收好少騷錢，引來森美親自留言回應！
吳日言：有錢收已經算係咁
現年40歲的吳日言早前在社交網表示：「上個星期收到好多人通知，話電視見到我。HaHa 原來播返2007《森之愛情》。嘩！我真係好耐無上電視，依家唔識唱歌、演戲、做主持，淨係識煮飯、湊仔、接放學…」又續指：「#我唔使收月費 #無意中發現當年人工 #有錢收已經算係咁 #放心我有儲起佢」
向森美自薦搲撈：我好抵用
重點是吳日言在帖文中分享了一張16年前的糧單，上面寫著一系列工作，包括參加工展會、酒吧演唱、萬聖節活動等，但都被她遮著收入銀碼，只得「《森之愛情》拍攝」一項，可以見到酬金為500港元，隨即引起網民熱議，連森美都親自留言笑指：「500，幸福幸福！」吳日言亦有回應並自薦：「大哥繼續用我，好抵用。」
網民狠批吳日言：嫌錢少可以唔拍
不過有心水清的網民就指出該張糧單是由吳日言的舊東家Silly Thing所出，所以並非TVB片酬只得500元，而是吳日言計漏了被Silly Thing抽佣的金額！亦有不少網民狠批吳日言：「當時應該冇乜人識佢，憑咩攞高人工？」、「呢啲嘢你情我願，嫌錢少可以唔拍。以佢嘅知名度，TVB畀佢做個單元女主角仲想點」、「只係收你500蚊就可以上TVB，抵咗你啦」等等。
