森之愛情｜吳日言爆16年前濕身拍劇騷錢極低！9字回應森美被指「計漏數」
廣告
近日TVB於周六日晚深夜重播2007年的劇集《森之愛情》，這部由森美原創的都市戀愛故事劇全輯10集，每集都有不同女星同男主角森美談戀愛，其中第4集就搵來吳日言擔任女主角，但吳日言近日就自爆當年原來只收好少騷錢，引來森美親自留言回應！
吳日言：有錢收已經算係咁
現年39歲的吳日言日前在社交網表示：「上個星期收到好多人通知，話電視見到我。HaHa 原來播返2007《森之愛情》。嘩！我真係好耐無上電視，依家唔識唱歌、演戲、做主持，淨係識煮飯、湊仔、接放學…」又續指：
「#我唔使收月費 #無意中發現當年人工 #有錢收已經算係咁 #放心我有儲起佢」
向森美自薦搲撈：我好抵用
重點是吳日言在帖文中分享了一張16年前的糧單，上面寫著一系列工作，包括參加工展會、酒吧演唱、萬聖節活動等，但都被她遮著收入銀碼，只得「《森之愛情》拍攝」一項，可以見到酬金為500港元，隨即引起網民熱議，連森美都親自留言笑指：「500，幸福幸福！」吳日言亦有回應並自薦：「大哥繼續用我，好抵用。」
森美和吳日言扮演一對情侶
森美和吳日言扮演一對情侶，劇情講述他們會結婚生仔，他們其中一場戲在泳池邊談情，森美潛入池底取出戒指向阿Yan求婚，場面浪漫。首次扮大肚婆的阿Yan，裝著假肚時更充份體驗到孕婦的不便。
網民狠批吳日言：嫌錢少可以唔拍
不過有心水清的網民就指出該張糧單是由吳日言的舊東家Silly Thing所出，所以並非TVB片酬只得500元，而是吳日言計漏了被Silly Thing抽佣的金額！亦有不少網民狠批吳日言：「當時應該冇乜人識佢，憑咩攞高人工？」、「呢啲嘢你情我願，嫌錢少可以唔拍。以佢嘅知名度，TVB畀佢做個單元女主角仲想點」、「只係收你500蚊就可以上TVB，抵咗你啦」等等。
森之愛情劇情｜第4集 〈不如重新開始〉女主角：吳日言
程朗與宣芷是一對青梅竹馬的好朋友，其後二人順理成章結婚及產子，不過在他們人生的樂章中，仍循環不息向對方提出分手復合、復合再分手的要求，因為宣芷發現程朗對朋友的態度，相對於自己更加好，再一次忍無可忍之下向程朗提出離婚，兩口子最後點收科？
