吳浩康自爆出軌矛盾心情 認知衰兼「唔信有男人冇滾過」
廣告
41歲吳浩康（Deep）2022年與郭思琳結婚，並於同年誕下兒子「撑撑」，化身愛家好男人。吳浩康去年宣布約滿離開經紀公司，近年仲轉行做地盤養家，努力洗甩渣男形象兼獲封「職安真漢子」。早前吳浩康就現身由田蕊妮、蝦頭（楊詩敏）以及貝依霖主持嘅《港女又萬歲》，除咗剖白當年出軌嘅矛盾心情，更大方談及男人會唔會「滾」嘅話題……
曾經連環追6女被封「渣男」
吳浩康於2014年時曾與鍾舒漫到談婚論嫁嘅關係，不過後來被爆出連環追6女，兼在街頭擁吻女伴，隨後鍾舒漫即宣布甩拖吳浩康，而佢亦從此被冠上「渣男」嘅名字。
吳浩康剖白出軌矛盾心情
對於當年出軌一事，吳浩康就罕有剖白矛盾心情：「係好矛盾嘅嘢，你明知係錯係出賣」隨後田蕊妮就追問為何仍選擇出軌，吳浩康就稱：「另一邊又會覺得做嗰樣嘢有個誘惑喺到，出軌有出軌嘅刺激」更透露自己嘅諗法：「好幼稚地覺得好多人鍾意我，好似覺得自己好X勁咁」
吳浩康感謝仔仔畀自己洗底
田蕊妮在節目中連環讚吳浩康現時係好爸爸同好老公，不過吳浩康就謙虛表示：「一班地鐵入面有幾多個咁樣嘅男人，我做咗兩年啫最多，我唔好意思認，做得耐過我嘅大有人在。」但就直言感謝仔仔畀自己展示膊頭：「以前我都有養我老竇，人哋唔會覺得係點，都係等做明星嘅一條『契弟』，咁其實我都有做其他嘢，有做吓保險。但係我個仔出世之後，好似畀咗個機會外面嘅人認知，所以好多謝我個仔。」
吳浩康唔信有男人冇滾過
田蕊妮隨後就問到「係唔係逢男人，真係9個都去滾，淨返嗰個仲諗緊㗎？」吳浩康就表示：「唔滾嘅會有，但係冇滾過嘅我就唔信」更直言：「點樣都一次半次，點都試過，有啲人試完可能覺得唔啱㗎嘛。」
網民回應：自己鍾意就算、唔好拉埋所有男人落水
不過吳浩康嘅發言就被網民狠批：「佢鍾意滾就滾啦，唔好拉埋所有啲男人落水」、「自己做錯嘢，將件事合理化」、「男人唔去滾， 皆因手頭緊！」、「睇完之後發現吳浩康未係真改，遲早再衰過，放長雙眼」、「未有錢同賺到錢嘅分別」
