28歲吳若希宣布陀仔 湊夠一個好字
撰文、圖片：東方新地
28歲吳若希宣布陀仔湊夠一個好字
昨晚（10日）兩公婆同步在 IG公布喜訊，Jinny上載全家福並寫上：「一家‧四口」承認懷孕，而Alex分享Jinny與囡囡嘅甜蜜合照並留言：「我問Giselle想要妹妹定弟弟？她說：妹妹！我問她如果弟弟怎麼辦？她說：我餵奶奶比弟弟。好吧！那爸爸就給你一個弟弟，因為我怕妹妹你唔餵佢飲奶奶爸爸我會很忙。老婆～又要辛苦你了，I Love you」從留言可見Alex間接公佈老婆陀仔，成功湊夠一個好字 。
吳若希囡囡為弟弟改名Krisoff
吳若希上月突傳出懷胎三個月，當事人一直未有正面回應。吳若希同老公同步公布喜訊，立即得到不少圈中人恭賀，亦有網民留言：「睇嚟你老公鍾意打機之餘都會做其他事。」吳若希秒回：「疫情期間日對夜對，都真係好悶既。」自爆同老公係疫情期間密密做人所以搞出人命，何生真係要多謝呢個疫情囉﹗
吳若希之前一直未有正面回應再度懷孕消息，上月廿三日28歲生日時更貼出跟初生貓咪合照指家中的確有新成員，原來當時吳若希確實陀住在BB，當時亦透露貓咪性別係男，並由囡囡淼淼改叫Krisoff，相信當時想跟大家分享喜訊但未夠三個月未能公布，故借初生貓咪來回應陀仔報道。
窒完老公又甜蜜放閃 網民質疑吳若希：大肚婆情緒化？
傳出又有身孕的吳若希仍然密密出Post，日前就Po出一張身穿民族長裙的造型照，留言間有暗串老公意味：「尋晚何兆鴻（吳若希老公）令我體會到一樣嘢，無所謂既「應唔應份」，只係睇你「樂唔樂意」。你唔樂意，就無嘢係應份。」隔一日就甜曬同老公慶祝生日嘅照片，仲話：「昨晚過得好滿足～」令網民不禁懷疑吳若希再有身孕的傳聞屬實，情緒似乎波動。
吳若希突然停工為安胎傳陀B仔三個月
一向看重事業的吳若希，被爆近來連推兩部重頭劇，大好機會都放棄即惹來懷孕揣測，而她早前便在instagram呻增磅不少：「我今天量體重，54kg比平時重了3kg，但看到自己的腿和手臂還那麼細，就跟自己說了句，今晚可以放心吃消夜…」愛keep fit突然增磅又被拍到孕味濃微胖照，有指吳若希因為剛懷孕滿三個月，所以未向外報訊，但家人十分緊張，吳媽媽為此更每日到女兒家貼家照顧，而近期除了宣傳新歌〈有位蠢才〉外，連主持的節目《姊妹淘》都被停播了，吳若希可以有更多時間好好安胎，不過對於事件，吳若希就禮貌表示唔回應了，未有否認陀B消息。
吳若希「疫」市派歌有成績 廿四孝老公幫手Plug歌
早於去年暑期飛去台灣錄新歌、拍MV，可惜人算不如天算，吳若希新歌新碟計劃一推再推，今個月終於「疫」市發放〈有位蠢才〉，可幸旋律洗腦啷啷上口，時勢影響亦多了觀眾樂迷留家聽歌睇電視，成績可謂十分亮眼。人人疫市停工居家，吳若希就為宣傳連日出入各大電台和電視城做訪問及錄影節目。記者發現Jinny勤Plug歌，老公Alex比她更勤力，連日現身電視城做柴可夫司機，有時連下午茶、晚餐都在電視城飯堂解決，熟路到當正自己地頭！
唔再用十哥座駕 新車終於有自己名
出道十年，吳若希言行比食神更難估計。福建出生家境清貧，卻在短短兩年間從400呎公屋搬入何文田豪宅、座架換得密更升級快，架架登記都在頂級富豪名下；與老公Alex 17年高調拍拖高調分手，分手後又失驚無神懷孕復合再結埋婚；與澳門Alex結婚兩年、囡囡Giselle月尾就滿三歲，去年底卻驚爆依然與富豪十哥關係密切，對方親自驅車到電視城接收工搬行李，吳若希面上的興奮笑容更十足懷春少女急不及待甜到漏。
那邊廂被爆婚後密友接收工，呢邊廂愛晒恩愛的Jinny都明顯少了放閃，婚姻生活現危機。老婆交遊廣闊又難捉摸，好彩Alex死心塌地未肯認輸，據知情人士透露，去年報道一出Alex即時勤出招收復失地：「一家人生活重心本來以經商Alex為主，一家三口一直居於澳門，後來Jinny為咗囡囡升學先搬番香港，而Alex為生意故兩邊走，但呢幾個月因為大環境影響生意，Alex聽晒老婆話搬咗大本營番香港。結婚咁多年被人踢爆仲用緊十哥名下車，Alex嗱嗱聲買車，仲要揀七人車，方便老婆開工用，架車登記係Alex公司名，而間公司係Alex同Jinny持有，變相咪就係送新車畀老婆囉，Jinny點會唔冧先？」
重拾恩愛 吳若希轉口風肯追多個
搬屋送車再做埋跟得老公日日管接管送，吳若希接受電台訪問，表面上話對多咗老公對到厭，實情態度與半年前都180度徹底轉變。近來在個人IG做直播、次次梗有老公在左近糖黐豆一樣；日前做Live話嫌棄老公掛住打機，曲線勞役Alex下廚煮宵夜，又突然自爆閨房秘密話老公寧願打機都唔願打X機，其實都係暗示兩公婆閨房趣事多又美滿，另一半根本無此需求。
連被記者問幾時追多個，吳若希都從生完Giselle怨聲載道嫌一孕蠢三年、又推卻無計劃無需求，到日前去電台錄節目推新歌，轉口風話順其自然又嫌老公唔勤力：「其實都有諗過，都有計劃，囡囡都想要個妹妹，但呢啲可遇不可求，所以順其自然。(係兩公婆努力緊？)唔知係唔係算努力啦，總之係正常生活囉！」言下之意即是夫妻感情大進、房事頻率正常，睇怕好快有機會再報喜！Alex成功化解婚姻危機可記一功！
