周奕瑋入行16年主持台慶獲讚極速上位 陪曾志偉出埠「興奮到瞓唔著」

周奕瑋夥陳嘉慧陪曾志偉出埠　試搭首航：興奮到瞓唔著！

日前因主持《萬千星輝頒獎典禮2022》獲大讚並極速上位的周奕瑋，昨日就陪同TVB總經理兼主持人曾志偉及另一主持人陳嘉慧（Erica）一早現身機場，準備乘搭大灣區航空東京首航到日本出差進行拍攝工作，3位皆表示於因疫情影響久未踏足日本，心情極為興奮，「興奮到瞓唔著」！

曾志偉更大爆起行前的小插曲：「我尋日無瞓唔係因為我興奮，係因為太耐無出國，太耐無去旅行，根本唔就得要執啲乜嘢，我又好怕執漏」，「尋日執喼都唔記得要執啲乜嘢，所以尋日好似揦手唔成勢咁，搞吓搞吓又拉返拉鍊，一記得又打返開執啲嘢。又唔記得日本用咩插頭，究竟係兩個窿定三個窿呢？」一旁的周奕瑋即時大表認同：「我都搵插頭搵咗好耐！」

曾志偉、周奕瑋預告2大新旅遊節目

周奕瑋及Erica到達日本後將會拍攝一個以短途旅行為主題的日本旅遊節目，十分適合愛玩到盡的香港人的旅遊節奏。而曾志偉到日本會與2人分開行動，與福島政府會面及接洽，指對方希望可拍攝福島大地震11年後的福島面貌，並將會於3月帶隊到當地拍攝。

頒獎禮獨擔大旗 周奕瑋出po講感受

周奕瑋日前主持台慶頒獎禮獲得好評後，於社交媒體出帖，大談感受，當他知道要擔任如此重任第一個反應是：「唔係啩？我憑咩？」之後立即翻睇所有劇集，務求了解每個入圍者的作品寫稿，周奕瑋說：

「很多朋友問稿子難不難背？稿子不難背，只是難寫。因為很想要傳遞好那份溫度和重量。」

點名感謝娛樂新聞台

他除指自己經驗不足令到表達未足以用「剛剛好的力度和溫度去詮繹」外，又感謝所有幫過他的人，特別點名感謝娛樂新聞台。

Erica同樣上位 台慶演趣劇狂嗌自己名

至於Erica陳嘉慧，於今年的台慶頒獎禮只是陪座角色，她今年憑《回歸》及《法證先鋒V》等演出，只是殺入飛躍進步女藝員十強位置，但明顯受到力捧；月前於《萬千星輝賀台慶》獲欽點孭飛演出趣劇，跟笑匠阿Bob、胡楓等同台演出，演出時更予她機會在鏡頭前一而再講出自己的姓名「陳嘉慧」！