38歲唐寧分享與「二哥」黃家駒絕密合照 凍齡人母拒絕教出一對港孩

原文刊於：東方新地｜圖片：新傳媒資料庫

唐寧分享與「二哥」黃家駒絕密合照

6月30日是樂隊Beyond主音黃家駒逝世27周年，唐寧突然在個人社交媒體貼出她和家駒的合照，並附上caption「二哥…」表達思念。原來在1991年，唐寧曾拍攝電影《Beyond日記之莫欺少年窮》，戲內角色是做家駒的妹妹，唐寧憶述當年家駒對她有如親生妹妹，非常照顧，拍攝結束後更鼓起勇氣，人生首次問異性拿電話。後來得知家駒逝世，唐寧看完新聞要去學校上堂，傷心到一邊上學一邊哭，後來更寫信燒給他，表達對這位二哥的不捨。

延伸閱讀：唐寧：離婚後給孩子的愛沒有缺失

凍齡人母拒絕教出一對港孩

凍齡唐寧嘅秘密，其實同日常生活態度息息相關。雖然失婚、獨立湊大一對仔女，不過唐寧從來面對生活態度積極正面，又親力親為帶住仔女一齊玩一齊笑一齊成長，見佢一家三口經常笑容滿面，不時在家中開心彈結他、打鼓夾band，再加上喜歡自家種植，飲食有營仲食埋素，又唔追求物質家中簡約又溫馨，真真正正內心富足享受生活，又點會愁眉苦臉變黃面苦瓜乾呢？

公園、遊樂場代替Playgroup

兒子俊俊以前一直沒上playgroup，由父母親自教育，唐寧最常帶他到公園及室內遊樂場，接觸其他小朋友學習人際關係，「我最鍾意帶佢去將軍澳坑口嘅兒童遊戲室，喺市政大樓入面，好大間、有樓梯走上走落。可能近西貢，有好多唔同類型嘅人，包括外國家庭，仲有大大小小嘅小朋友，俊俊會同佢哋傾偈、一齊玩，返playgroup接觸嘅小朋友仲冇咁多元化㖭。」

名校唔重要最緊要開心

當年為兒子選幼稚園時，唐寧指：「名校唔重要，我自己都唔係名校出身，讀名校壓力一定大。我同家人諗法好接近，希望搵間活動教學同環境優美嘅學校，有一間我好鍾意，有沙池、大草地，著重小朋友探索。我自己住新界區，好鍾意大自然，小朋友除咗喺課室接受教育，都要接觸世界。」如今囝囝俊俊已經小學，對於選校，她依舊堅持自己的原則，不會盲目跟隨主流思想，最緊要係囝囝讀得開心。

不反對兒子做童星但不刻意鋪路

唐寧與前夫鄧偉傑渾身演戲細胞，大有可能遺傳給俊俊，有次唐寧在刨《警界線》劇本，見俊俊充滿好奇，便演繹幾場戲給他看，「我抽咗場警匪搏鬥場面做，佢係咁笑，可能見到我好用力演，哈哈！劇本白紙黑字佢未有太大興趣睇，鍾意睇我做戲多啲！」她坦言不介意俊俊步她後塵做童星。講故事氹孩子，每個家長都會做， 唐寧演繹故事，「我會為唔同角色扮晒聲，自己都覺得好好玩！佢最鍾意我創作嘅生活化故事，加入咗好多佢鍾意嘅元素，例如佢好鍾意搭車，我會講 『今日俊俊起身後，我帶佢搭巴士，點知冇巴士喎，要過去等小巴⋯』故事中佢不斷聽到自己鍾意嘅嘢，就好有興趣聽落去。」