處女黨鍾嘉欣失守、4大視帝均「先上車後補票」！13對奉子成婚幸福藝人

撰文、圖片：東方新地

陳奕迅 徐濠縈

陳奕迅同徐濠縈嘅獨生女陳康堤上月剛剛過完sweet sixteen16歲生日，眨吓眼就大個女亭亭玉立！原則上96年拍拖、97年同居、04年生女、06年結婚，陳奕迅同徐濠縈屬於「先上車後補票」，因為生咗女而索性令呢段關係更名正言順乾脆結個婚。

謝安琪 張繼聰

05年謝安琪與同期音樂人張繼聰撻著，年半後發現懷孕才籌備婚禮。07年陀住五個月肚嘅 Kay喺機場酒店下嫁年輕兩年嘅張繼聰。婚後 Kay 憑一首〈 囍帖街 〉已經紅到發紫躋身天后行列，二人現育有一子一女。

鍾嘉欣

身為處女黨創會功臣，鍾嘉欣17年2月突然傳出與脊醫Jeremy 會喺加拿大結婚，事前時間地點極度保密，一眾處女黨姊妹亦神秘封口，盛傳因為嘉欣未婚先有喜。結果二人2月成婚、囡 囡Kelly八月出世，事實勝於雄辯。

陳展鵬 單文柔

17年剛剛參選港姐入行未夠一年嘅單文柔，被爆與一線小生陳展鵬喺山頂開餐而戀情曝光。18年10月結婚時已經盛傳新娘有意無意護肚疑似有喜。卒之二人於11月宣布有喜、婚後半年囡囡「小豬比」已經報到。

吳若希

16年最當紅時期嘅吳若希同澳門闊少何兆鴻（Alex）認愛，拍拖半年高調放閃、高調分手再高調復合，同年11月宣布懷孕。翌年囡囡Giselle半歲大時才簽字結婚。如今吳若希懷有第二胎並陀仔，堅持高調作風，不時搵老公出氣。

錢嘉樂 湯盈盈

2012年6月，錢嘉樂喺泰國蘇梅向拍拖五年嘅湯盈盈求婚成功，籌備11月婚禮期間，其實湯盈盈已知有喜，二人先喺海洋公園熊貓館簽紙，然後移師洲際酒店筵開50席，當時新娘已經陀住五個月大肚。

陳豪 陳茵媺

陳茵媺同全台最搶手筍盤陳豪因為拍攝電視劇《心戰》相戀，拍拖兩年順理成章極速完婚。二人於13年照計劃5月喺香港秘密簽紙、6月飛到巴黎會合家人行禮，其時懷孕三個月嘅陳茵媺已經有孕味隱約見肚。

鄭嘉穎 陳凱琳

15年因為拍劇與年長22歲嘅鄭嘉穎譜出父女戀，18年8月舉行婚禮時，外界一直有傳陳凱琳已經有餡，不過一概被當事人否認。睇番時間表，8月結婚、11月宣布有孕、翌年2月14日情人節長子鄭承悅出世，事實證明都係奉子成婚。

王浩信 陳自瑤

拍拖三年、分分合合，11年底王浩信成功箍煲與陳自瑤復合，同時亦突然宣布已經定下大喜日子於一個月後就會註冊擺酒，結得咁急擺明有嘢唔等得，雖然當事人否認有喜，不過女方推劇又護肚，傳聞滿天飛，最終擺酒五個月後女兒出世。

朱茵

萬人迷女神朱茵當年因為同Rock 友黃貫中份屬鄰居，日見夜見近水樓台結果成為戀人。2012年，41歲嘅朱茵為黃貫中誕下女兒黃鶯後兩日，才完成簡單而隆重嘅註冊手續結為夫妻，而二人嘅婚宴亦係囡囡百日宴時順手搞埋，一次過招呼親朋戚友。

林芊妤

因為殘廁gathering而聲名大噪後，Coffee林芊妤反而因此變得更我行我素敢作敢當。18年公告與拍拖三年嘅圈外男友翟志榮入紙註冊，同時宣布已經懷有四個月身孕。10月誕下囝囝翟德彥後，Coffee同老公飛去馬來西亞補擺婚禮，仲抱住囝囝一齊行禮㖭！

胡諾言 陳琪

結婚11年、誕下兩女一子，胡諾言與陳琪呢一對模範夫妻兼模範父母於09年4月結婚時，亦一早有傳陳琪已有身孕，直到6月，胡諾言才公開太太已經懷孕七個月，兩公婆亦一早告知無綫高層。

張致恒

生仔先定結婚先，其實全屬個人意願，旁人從來管不著。不過19年7月，張致恒公布即將結婚、未婚妻雯雯為自己誕下兒子仲已經擺完百日宴時，原來仲未同正印女友梁皓恩分手，又原來唔止正印不知情，同時仲有第四、第五者都蒙在鼓裡。