JFFT床哥社工實習風波獲港專力撐！校長主動開記招交代3大重點

床哥主持網台節目多年 27歲重投校園fulltime讀社工有助人初心

涉事網紅「床哥」原名陳鈺麟，逢星期一晚開直播《床哥心事台》，多年來為無數聽眾度過人生唔如意嘅時刻，在致電節目中提供情緒輔導。同時，床哥亦自感不足，2019年決定以27歲高齡重投校園，報讀港專社工課程，希望透過專業知識可以幫助更多人，在處理來電時可以有更大進步。校方在記招上，亦有特別提起「床哥」報讀課程的初心，希望局外人評論時亦要了解這背景。

最新更新！辦學團體發聲明 否認事件

在港專記招過後，涉事中學所屬的辦學團體亦發表聲，明否認向港專發出聯署，信件內容指過去數年一直與大專院校合作，提供實習機會。對於今次的事件經過調查後，辦學團體表示該校老師並無聯署致函港專，但聲明並無否認校內對該網紅的處理手法，辦學團體強調現時已「啟動危險處理小組」，與教育局、港專聯繫，港專表示已重新安排實習。辦學團體強調今次係個別事件，絕對不會不提供社工實習機會給大專院校。

曾被JFFT成員睇死讀3星期就放棄 床哥堅持：唔想畀人印象係玩玩吓

2019年床哥決定重返校園，曾被網台另一位成員「米爺」笑指「讀3個星期就會放棄」，現在已成功讀到Final Year的床哥分享讀書心路歷程：「其實最開頭year1係好想放棄，因為始終隔太耐冇讀書，個腦已經係機械式工作，唔係好頂得順新知識⋯⋯當我出咗嚟做嘢6-7年，再重投校園係好困難，但慢慢收到好多觀眾DM，因為我而去讀返書，鼓勵到觀眾，聽到之後，我就覺得如果我咁快放棄，就做咗好壞嘅榜樣，我唔想畀人一個印象係玩玩吓。」

床哥回應教壞細路批評：「我其實有個女、今年九歲品學兼優」

事件過去之後，床哥在家中沉澱心情，並於IG分享了個人的心情，直接回應了近日網民對他的批評：

「可能會有人話，你YouTube拍片直播，「意識不良、教壞細路」，我開心事台今年係第7年，咩題材我都會講，好低俗會講、好虐心會講、體育、時事、學習、愛情⋯⋯只要你諗到，我都會講——而家會講、之後我都會繼續講！」

感慨無辦法阻止大家片面的定義

「七年直播自問幫助過、陪伴過唔少觀眾，經過一個又一個寂寞、需要人嘅晚上，內容足以製作成一本字典厚度，如果堅持要用其中一、兩頁去定義我，我都無辦法阻止，因為你根本唔認識我，亦無打算認識我，我都無謂同你詳談⋯⋯」

公開早為人父身份 為女兒自豪、鼓勵同路人

「至於教壞細路方面，小朋友、青少年本來模仿嘅對象，最大係來自於自己父母，社工稱呼呢樣嘢做『Modeling』，你哋可能唔認識我，但我其實有個女，今年9歲，全級考第二、品學兼優。希望每一位嘅子女都可以生生性性，好到唔需要社工嘅存在就最好。」

「時代變緊、模式變緊，我自己都喺到不斷嘗試緊，創新緊搵一個新出路，給每一位仍在努力嘅同路人！」

港專記招交代3大重點

重點1｜港專：支持佢！已經安排另一間機構完成實習

床哥對於被「聯署」要求撤職，他事後開Live形容「今日係我人生中受到最不公義對待的一天」。對此，香港專業進修學校（港專）召開記者會，回應社會工作（榮譽）社會科學學士課程四年級學生陳鈺麟被終止實習的事件。港專校長陳卓禧教授及港專社會科學院院長兼系主任崔日雄教授在記者會上表示，關於大家關心問題，日內收到許多查詢，一名四年級同學在實習期間出現事情，對於事件細節，因為發生比較急，仍在全方位了解細節，期望與「床哥」再進一步見面同傾談。陳卓禧教授表示，將全力支持同學探索，陪伴同學同行「支持佢，關心同學，給予盡可能的支援，對於同學情況，已經安排另一間機構，完成實習要求。」

重點2｜同學用新穎方法展開社會工作 值得支持

陳卓禧教授稱，形容床哥係潮流網紅，認為床哥使用新方法、新的領域，是值得探索，而面對新轉變，只要新的手法最終能夠帶出一個正確價值觀就可以，對於該校方，指出該機構係非常支持社工實習，比咗4個實習位，培育新的社會，只係因為一個領域總有唔同的意見，有一部人是開放接受的，但有部分可能未必：「如果初心係用新手法去接觸對象，帶嚟正能量，校方同意帶嚟新做法，嗰個機構係支持同學實習但香港係多元化社會，唔同人有唔同意見同學要關顧受眾感受，要學識點令人接納，所以換個環境等佢順利學習。」

重點3｜不認為床哥違反專業守則

陳卓禧校長進一步表示，該名學生之前已經參與過實習，並且沒有出現任何問題。崔日雄院長兼系主任則表示，他與該名學生有接觸了近4年的時間，相信他在專業社工方面有出色的表現。他也知道該名學生參與了 YouTube 的活動，但並不認為這違反了專業守則。而且亦強調不會因為今次的事件而判斷學生唔適合做社工，現階段的焦點應該係安排係更好的學習環境俾學生，同埋令床哥如何成功完成實習獲得經驗與成長。

床哥回應校方記招：相信一定可以同時容納兩者身份嘅地方

事後，床哥亦在IG story轉發相當報道並表示：

「從教育我四年嘅教授口中聽到符合專業水平呢個認可，感覺四年來嘅努力係真係有人睇到。四年來由床哥冇咩人識，去到開始受歡迎，陳鈺麟嘅身份慢慢變得渺小，的確好難去分割兩個身份，但我相信一定可以同時容納兩者身份嘅地方。」

網友大讚校長：講真，算公道

記者會完結後，不少網友大讚港專真係處理得幾好，教授同校長都好開通，公關好好，仲懷疑2人都睇開JFFT：「校長真係似會接受新事物既人」、「教授好公道」、「講真，算公道」、「建議請校長上JFFlive俾手足多謝一波先」、「老老實實 依個校長好得體 會吸引到人入讀」、「​懷疑校長是手足」「​公關部大部長」「​準備報讀港專」「校長有 feel」「​校長幾時call in上心事台」「校長好叻，佢話支持但要做好啲！」

床哥勁有心曾組Youtuber育成小組 親自援教

人氣Youtube Channel JFFT成員床哥於去年7月11日直播中提及，佢現正舉辦一項活動「YouTuber育成小組計劃」，正式招募成員參加。此計劃適合對Youtube職業充滿好奇的年青人，希望透過計劃引導、發掘他們自己的潛能，增強青少年的自信心，透過體驗活動讓小組組員間的合作和共同成長從而增強自我的認識和認同感，更嘗試去刻服尷尬。計劃最後需要共同拍攝出作品，不過床哥強調：「即使最後拍片的作品是否順利完成也不重要，活動的過程才是重點。」

「我敢肯定，參加完呢個班嘅手足，經過呢六堂，經過呢九小時，你將會對你嘅人生，揭開全新、亮麗嘅一頁！我唔能夠透露太多，有興趣嘅手足歡迎IG DM我報名⋯⋯ 睇相佬呃你十年八年，床哥係呃你一世嘅！」

大批藝人網友、YouTuber 留言打氣

影片一出，短短一日已收到逾3千個留言，大批藝人網友留言為床哥打氣！當中包括吳肇軒、「聲大哥」張建聲、保錡、Alma郭爾君、試當真游學修與多名校花校草、小薯茄眾成員、100毛-盤菜、三叔公園、歡樂馬介休等等，就連曾與JFFT合作過的Ikea，都以小編身份隔空撐「床」！

100毛-盤菜：

如果我係啲學生，我一定會覺得好絕望，自己學校居然因為嚟實習嘅社工私人時間做一啲唔犯法嘅事情趕走嚟實習嘅社工同學。

即使YouTuber唔係一種傳統職業，但相信而家好多學生想成為YouTuber、有喜歡嘅YouTuber，甚至都有拍片上網，當佢哋見到床哥，一個人生近乎於勵志嘅YouTuber 都得到咁嘅待遇時佢哋都可能會好打擊。

有時個世界真係好落後好虛偽，最希望你係一個清白乾淨唔好俾人查到任何背景嘅人，對學校嚟講就最有利用價值，但大家都知道床哥你最強大嘅嘢就係因為你係一路走來嘅床哥。

頂住 加油

小薯茄-程人富：

陳Sir 呢間中學嘅學生真係慘

Alma 郭爾君：

我撐床哥，我唔認為YouTuber嘅身份會令到床哥唔能夠做一個好嘅社工，至少私底下嘅相處，就當我拍攝嘅時候床哥作為娜姐爸爸嘅身份或者係佢本人作為演員嘅時候，任何事情佢都係一個好好嘅人，我只係希望呢個世界唔好，因為一啲表面嘅外在因素去否定一個床哥作為社工嘅資格。

「聲大哥」張建聲：

唔L駛講，你已經喺現實救左好多人，幫佢哋渡過左一些難關，你冇浪費時間讀社工，因為依家嘅你先喺年青人嘅真．社工。#Repect陳sir