張致恆妻雯雯被癌症病人控証呃錢後頹爆呻「想離開」 網民反應兩極
自稱患癌網民指控雯雯欠錢不還 「諗住報《東張》」
近日有網民在雯雯YouTube頻道最新影片下留言，指雯雯欠下自己萬六蚊，但雯雯一蚊都冇還過：
「雯雯，我係Cat，你想點呀？比咗幾個月時間你，爭我嗰萬六蚊一蚊都收唔到，包多春魚都收唔到，之前免費送咁多嘢畀你哋，你哋咁對我？！你好快啲還錢，最多比你分兩期，分兩個月每次還$8,000」。
該網民更表示諗住報東張西望：「所有Payme過數記錄同埋WhatsApp我都有keep，唔好迫我公開哂。我真係諗住搵東張西望，標題係：『寧願呃癌症病人錢，都唔願意出去打工嘅前偶像夫妻。』」
雯雯正面回應網民指控 其後刪留言
該網民更表示預咗會畀比雯雯del留言加Block，不過雯雯今次就無Del任何留言，更回覆指自己依家未鬆動可以去還錢：「首先，我好多謝你當初主動出現幫我哋。我從來無諗過呃你，只係我依家未有鬆動可以還到畀你，就算其他人我同樣都係未還，當初你主動企出黎幫我哋嘅時候，我都有同你溝通我無咁快有能力可以還到錢，你亦話你明白，至於你兩包多春魚，我冇左你地址，你block咗我，我根本聯絡唔到。」
雯雯續指，就算對方公開都會尊重：「當中亦可以證明到我有講清楚我無咁快還到畀你，所以不存在呃你錢。最後希望你unblock我，比返你地址我寄比你。亦祝你健健康康。」
惹網民熱議：個底咁花都借
就網民借錢予雯雯一事，唔少人都反問點解仲有人肯借錢畀佢哋： 「真係會有人畀錢呢對老千夫婦」、 「兩個嗰朵臭晒，仲幫佢哋真係冇得救，人哋周圍借錢開心使錢，結果仲有人施捨」、 「呢兩公婆呃錢都唔知得罪幾多人，遲啲俾人斬都唔意外」、 「個底咁花都借」、 「根本係乞兒呃錢仲呃埋人哋同情心，勸各位有心香港人，唔好再理呢2公婆啦」。
雯雯突然頹爆IG呻「想離開」
明明日前先正面回覆完網民的指控，但雯雯今日（18日）傍晚就突然在IG發文：「既然世界不容納，倒不如離開」，令不少網民都擔心雯雯是否想不開，擔心她會做傻事；不過亦有網民認為雯雯只是講晦氣說話，隔一排又會冇事：「今次真係大件事」、「有邊次唔係咁講」、「個個都明佢想點」等。
