微辣新年開騷多個環節被轟Hea做 老闆出文道歉火上加油忠粉都唔Buy

忠粉列4大點狠批微辣新年騷Hea做

微辣在新年期間舉行了一連兩場的魔術舞台劇《一年之計搞乜春》，卻引來不少入場支持的觀眾們不滿。有忠粉在社交平台發文狠批今次新年騷同幼稚園畢業表演冇分別，列出4大問題逐點鬧，最後更揚言之後不會再​​畀錢入場睇騷添！

狠批1：整個表演毫無主旨重點 多個環節欠準備

該名網民一開始就狠批今次微辣新年騷毫無主題重點，整場表演同幼稚園畢業表演冇分別：「無一個主旨貫穿整個表演；僅此『一年之計搞乜春』真係唔知佢搞乜春。成個表演拼拼湊湊，感覺上有啲乜嘢小小才藝就擺上枱，似幼稚園畢業表演。」而且，多位成員的表現亦強差人意，令該名網民睇到眼火爆：「做乜無啦啦叫嘉盈彈琴？佢彈錯嗰下我哋以為佢搞gag，點知原來佢真係彈錯，我表妹都彈得得好過去。Yelow段獨腳戲又唔知喺度做乜，劇本又唔好效果又無。」

狠批2：大綱場刊都冇 Coupon冇誠意

該名網民批評大會連大綱場刊都沒有準備，會場內又收唔到Data，令自己和同行朋友都未能夠查閱新年騷的大綱。該網民亦批評大會所準備的Coupon毫無誠意：「派出嚟嘅coupon又冇誠意，350蚊憑30蚊嘅微辣大排檔現金券？我張票尾個discount都開得多過佢。」

狠批3：互動大細超 無視平飛觀眾

之後，網民亦批評以一個只有3,000名觀眾的演出來講，今次微辣新年騷的互動少得可憐。不但後排觀眾根本看不清楚舞台之外，有網民更批評微辣成員們只與買$680貴票的3層觀眾互動，無視5樓的觀眾：「5樓都有觀眾但完全無理會，所有觀眾互動全部只有3樓，派贊助商禮物又只派3樓。唔派贊助商禮物都係其次，又唔係貪啲禮物，但無同5樓觀眾互動點都講唔通，搞到5樓觀眾好似現場睇緊YouTube咁，大家都係有俾錢入場支持，雖然係無3樓甘多，但都係真金白銀入場支持。」

狠批4：魔術效果停留喺10年前

網民最後就狠批今次新年騷的魔術效果停留在10年前，將3分鐘玩完的魔術拉長到15分鐘：「魔術效果停留喺10年前，我大學時期玩嘅魔術都好睇過去；冇火花冇白鴿冇任何肉眼可見嘅舞台效果，最頂唔順嘅係六毫子最後出嚟嘅泡泡魔術；嗰個真係算係魔術嚟？好唔好意思咁表達出嚟？」

網民痛心指斥：衰過小薯茄同試當真

網友說出重點後，再強調自己並唔係hater：「 如果我咁講都當haters嘅話 ，fine 咁我只會真係當微辣變咗 ，我一路覺得要養住咁多班人 ，搵錢我覺得啱嘅，但都唔係咁嘅質素呀！人哋小薯茄同試當真做show有心好多， 真係睇得出嫁！」

微辣老闆六毫子千字文道歉回應

新年騷結束之後，負評如山倒，微辣老闆六毫子都馬上出來發千字文道歉。六毫子表示今次團隊亦感覺到有很多不足的地方，一班演員亦有漏夜探討問題，接下來必定會好好改善，希望下次能夠讓觀眾們看到微辣團隊的進步和誠意。

六毫子道歉全文：

首先，我想代表團隊感謝大家！
我哋第一場表演完咗，收到好多觀眾對表演作出好多
建設性嘅評價和意見，我哋衷心感謝每一位。

我哋做完第一場，團隊也感覺到很多不足的地方，演員們漏夜檢討左好多問題，今次show既監製、編劇及創意總監、導演對場地問題丶魔術問題、劇本問題、演出問題、編排問題、節奏問題、時間問題、氣氛問題、定位問題等等等等討論了很多。第二場演出之前，
做了很多修改，希望盡力補救，可以將最好嘅一面比到大家。

我承認呢個表演有很多改善空間，經驗和專業仍末達標，未必係一場好完美、好精彩嘅表演，但絕對係我
哋台前幕後用心一起努力付出嘅成果，結果不如預期，我哋必定會好好反思。
我哋未必可以一帆風順，但至少能夠同舟共濟。我總相信一個人可以行得好快，一班人先可以走得好遠。
有你哋嘅意見同鼓勵先可以令我哋走得更加遠。
接下來必定會好好修煉，希望下次有機會見到大家，你們看到的是我哋團隊的進步和誠意。
新年快樂，感謝你們的支持！

老細致歉未能平息怒火 忠粉依然唔收貨

雖然六毫子出動到千字文，但依然未能平息怒火，一班忠粉依然唔收貨繼續鬧，當中不乏真金白銀入場嘅觀眾。不少忠粉都認為微辣今次未做好準備就上台表演，是對觀眾們的不尊重；亦認為六毫子經常以「夢想」感情勒索粉絲，令粉絲們都開始覺得厭倦。

「如果未準備好，時間忙沒時間夾都格硬開show，對得住俾錢嘅觀眾？」

「我嘅夢想就係繼續搵水魚買580 睇mon，680睇分開5 part嘅表演，跟住聽你講未準備好」

「打篇千字文就想過骨？」
「不如下次憑票尾俾個5折啦。」

「我唔係忠實嘅辣粉，唔係課金嘅會員，大概睇咗5,6年微辣，今次係第一次真金白銀入場欣賞。我都係前兩日先入辣粉團，原因係睇完個show，我有一種”我睇咗啲咩”嘅感覺，真係覺得無下次，想同你地反映吓。我覺得唔係能力嘅問題，而係態度問題，我相信以微辣嘅能力，at least唔會搞到個show咁”煱”。成個show都好似dum波鐘咁，我一路睇show一路睇幾點，呢啲所有都係我真實反應。」

「咩都未達標就唔好學人收錢😂下次直接3個鐘fans見面會咪算囉，幾百蚊都一定有人去，又唔洗準備，啱哂你地💪」

ViuTV亦有直擊開騷場面，睇睇現場互動實況。