文頌嫻自拍晒47歲不老神顏 曾為女兒淡出幕前 嚴母教女: 磨練才會成功
攝影：Clay Lam （部分相片由受訪者提供）
《叠影狙擊》造型曝光 清爽短髮示人
文頌嫻曾復出拍攝2020年ViuTV劇集《打天下》，今年她再度復出，正在拍攝新劇《叠影狙擊》。近日她在Instagram大晒自拍，清爽短髮造型令她顯得更年輕。雖然她現年已經47歲，但相中的她和20年前的外表相差無幾，沒有一絲歲月痕跡，證明她保養得宜。帖文中的她表示因為疫情而需要停工七日，她搞笑地提到要為劇集保留一樣長度短髮的煩惱，向網友提問有沒有阻髮水，希望頭髮不要長得太快，以免她下次返回片場時，會看得出髮型跟之前有所分別。
女兒常黑面 9歲生日終罕有展笑顏
文頌嫻經常上載女兒Jamie相片，笑她沒有得罪女兒，但女兒卻一直黑面示人。
早前她為女兒大搞生日派對，邀請朋友為其女兒慶祝，女兒更罕有露出笑容，連她都留言：「有姿態又很chill，千金難買一笑。」很多網民指Jamie八字眉與眼睛超似爸爸。
文頌嫻昔日息影專心湊女
講起文頌嫻，最記得她於90年代加入亞洲電視，拍過多部戲飾演學生妹，後來過檔TVB，拍過劇集《天子尋龍》、《金裝四大才子》等，大部分古裝角色都好純品，令觀眾留下深刻印象。
05年，她一度到內地發展，至12年與拍拖三年的商人李梓慎奉女成婚後消失於幕前，一心一意做全職媽咪，將重心放在女兒身上，希望為「一張白紙」開好個頭，畫上一些軌道後，才慢慢放開。當了多年全職媽咪，上年她終於復出拍攝ViuTV劇集《打天下》，開拍前非常擔心女兒，安排好上課、課外活動時間。
她坦言自己演戲演了那麼多年，始終喜歡演戲，但又不捨得女兒，因為現階段要多顧及其情緒與脾氣，不是人人處理得到：「我想一手一腳湊佢，我想睇住佢成長，我覺得自己製造咗一樣嘢出嚟，如果我唔可以令呢樣嘢變得更好，反而衰喺人哋手上，成件事就唔靚。」她希望女兒能夠漂亮地成長，培養較好的性格，惟有自己湊才能給予女兒最好的培育：「小朋友係一張白紙，我好驚交畀工人姐姐或者奶奶湊，一定縱到爆，又唔會鬧，畀兩粒糖、開電視就打發佢。我喺度的話就可以糾正佢錯處，我唔需要討好佢，我係要教導佢，所以我覺得最少要三四年全心湊佢。」
曾被老公質疑 堅持做嚴母：別讓孩子恰你
文頌嫻外表嬌滴滴，但自小與哥哥弟弟一齊玩，性格男仔頭，在家擔當嚴母角色。曾經有次，文頌嫻惡到連女兒都忍不住問：「媽咪你好惡，點解成日鬧我？」她指自已經常要好長氣跟女兒講道理：「媽咪唔係鬧你，但同你講嘅時候你唔聽，你唔聽我就要惡少少㗎喇，你唔想激嬲媽咪就乖啲。點解頭先發脾氣？你咁樣搞到媽咪唔開心，我鬧你，你又唔開心，點解要咁做呢？」
她知道長輩個個寵愛她，特別老公平日上班很少見，一到女兒就冧晒，不捨得責罵。眼見現在的情人鬧前世的情人，老公當然好心痛，曾說過：「唔使咁惡嘅。」她解釋惟有自己做衰人，磨練一下女兒：「我唔惡點顯得佢純良呀？我永遠都係壞人角色，如果個個都做好人，小朋友就個個都恰，起碼依家佢知道我唔恰得。我只係做緊一件好普通嘅事，要經歷辛苦先會成功，有難度先有成功感。」她指父母亦教導嚴厲，會體罰，但她不會沿用上一代教法，會以講道理的方式教導。雖然媽媽好惡，但Jamie最親也是媽媽，因為媽媽與她相處最多，最了解她。
教女做個有規律的人
筆者由Jamie出生六個月、一歲、兩歲，都邀請過文頌嫻訪問，但她一直覺得未是時候：「因為Jamie唔易湊，佢幾個月大時，餵一支奶要餵成個鐘，真係餵到喊，佢唔係唔食，佢係歎奶，性格嚟㗎，有啲人話佢唔食就算啦，下餐先食，但我係一個有規律嘅人，每餐奶規定幾點食、幾點要瞓，我想佢習慣個模式，培養佢做個有規律嘅人，將來處事都會有規條。」以前女兒一日六餐奶，每次飲一小時，文頌嫻每日花上四分一時間餵奶，縱使吃力都要堅持：「其實佢食得晒，只係慢慢食，依家食嘢都好似high tea咁，連學校老師都話佢返學食茶點，食塊麵包都耐過人，好似啲阿太咁。」
戒抱睡要夠狠由得BB狂喊一周成功
在湊女經歷中，最值得文頌嫻驕傲是為女兒成功戒抱睡，全靠兩個字：狠心！「佢五個月大，我仲係晚晚唔夠瞓，佢雖然戒咗夜奶，但仲要抱住瞓，一擺低就喊，我嗰陣自問：點解會咁？咁點算？啲人又話瞓到六個鐘？後來我上網搵方法，原來要狠心，我狠心咗五日定七日，就成功咗可以一覺瞓天光到依家！」
一開始BB無得抱睡喊到拆天，老公、工人姐姐見到好心痛，被文頌嫻一一阻止，為了有覺好瞓，必須不惜一切狠下心腸：「個理論係，BB未瞓着就要擺低佢，唔可以等佢瞓着先靜雞雞擺低，因為當佢醒一醒見到唔同晒，又喊，如果佢醒咗見到同一個環境，就唔會喊，呢個就係安全感。咁我擺低佢之後就同佢傾吓偈，畀啲瞓覺signal佢，播啲柔和音樂，上面放個旋轉吊飾，乖喇依家要瞓覺喇，跟住走人拜拜！唔好講太多嘢，佢會唔捨得你。」
第一日，Jamie喊足個半鐘，喊到九彩，文頌嫻教大家狠心得來亦非完全漠視：「喊五分鐘後入番去安撫，『BB做咩事呀？唔好喊喇。』即使佢唔知你講乜，但都知道你係關心佢，講完幾句出番去，一定又喊㗎喇，之後隔15分鐘先再入去，愈來愈疏，佢就會覺得喊嚟都冇用，都係瞓覺好過喇。」
第二日已經初見成效，由喊個半鐘變45分鐘，第三日縮到半個鐘，愈縮愈短，卒之成功了！「嘩，我開心到呢！全家都為我鼓掌！好彩成功咋，唔得的話我塊面都唔知擺喺邊！」她把這個「狠心戒抱睡」方法推崇給所有姊妹，包括「七魔女」的湯盈盈、周家蔚等：「佢哋都成功嘅，但有啲唔忍心，驚BB喊壞身體，咁我無辦法啦！」
