《新四十二章》海報被指抄襲大陸劇 兩台同捲「好相似」設計陋習
《新四十二章》初版海報神似內地劇 設計配色十足十
內地劇《一路繁花相送》講述都市愛情，改編自青衫落拓同名小說，由鍾漢良、江疏影、炎亞綸、李晟等主演，喺2018年播出，早過《新四十二章》好多。睇返兩套劇嘅海報，發現《新四十二章》都巧妙地撞足《一路繁花相送》，眼利的網友寫道：「兩款海報都係主角排排坐」、「部分角色同樣翹腳chok樣」、「海報背景都係淺色主調」、「劇名字眼都同樣由紫色漸變至藍色」。為咗驗證兩套劇嘅海報有幾神似，有網民曾經用Google影像搜尋功能，上傳《一路繁花相送》海報，結果竟同時驚現《新四十二章》初版海報，睇嚟就連Google都認唔出兩者分別。
《新四十二章》再更換海報 竟似足某荷里活大片
後來無綫再換《新四十二章》宣傳海報，依然無辦法洗脫「抄襲」罪名。有網民發現《新四十二章》正式播放版海報同荷里活大片《復仇者聯盟3: 無限之戰》極似，他們留言寫道：「背景同樣太空銀河系為主」、「主要角色列陣排位接近一樣」，但無綫《新四十二章》版本，顯著設計無咁精緻，用色較為粗糙。
ViuTV《大誠實家》抄襲《青春不要臉》
其實除了無線劇集海報有「參考、致敬」之嫌，ViuTV現正播放中的《大誠實家》海報亦被指與去年播出的《青春不要臉》80年代風格海報有相似之處：
《新四十二章》監製曾被插抄襲 事後唔肯認數
由黎耀祥、陳豪主演嘅劇集《殺手》，同樣由陳維冠監製，2020年開播時以搞笑劇情同獨特角色成功吸引一眾煲劇迷，但唔少網民睇過《殺手》後，覺得故事設定跟香港本地作家孤泣於2014年創作小說《殺手世界》非常相似。唔少《殺手世界》粉絲替孤泣抱不平，孤泣本人亦喺社交網站回應：「我沒把《殺手世界》的IP賣給他們，至於是不是『抄襲』我也不知道，因為我不會看，也不想看。雖然明白讀者的心情，不過自己對「撞橋」一事毫無感覺，因為香港只有一套『原創』的《殺手世界》」。
陳維冠：孤泣嘅《殺手世界》，Sorry，我冇睇過
《殺手》監製陳維冠喺製作特輯《殺手 絕．殺．手冊》中，曾經承認創作概念係來自其他影視作品：「呢個係我多年嘅想法，源於26年前嘅一部電影叫做《這個殺手不太冷》（Leon: The Professional），我好鍾意裏面個角色叫Leon，佢用咗自己性命去換取另一個好悲慘嘅少女嘅性命，我好希望嗰個理念變成電視劇，《這個殺手不太冷》外亦有參考其他唔同嘅殺手電影，至於孤泣嘅《殺手世界》，Sorry，我冇睇過」
無綫海報抄襲疑雲停不了 舊年已有套被指抄美劇
2022年由何廣沛及江嘉敏主演嘅《食腦喪B》，被網民指喪抄2015年美劇《iZombie》！當時網民列出3大要點，力證《食腦喪B》同《iZombie》似足九成：「何廣沛變成喪屍後靠食腦充饑；而《iZombie》中，女主角變成喪屍後同樣要靠食腦維生」、「劇中何廣沛進食人腦後，會擁有他人記憶同技能；而《iZombie》女主角食用人腦後，都能短暫繼承大腦主人記憶習性」、「《食腦喪B》中郭子豪飾演嘅古德明喺法醫實習生；《iZombie》中女主角本身就係法醫，所以兩位主角先不愁人腦來源」。
香港設計界陋習？Anson Lo 自家品牌都係抄網民：LOGO幾乎一樣
說到抄襲事件，MIRROR成員盧瀚霆Anson Lo（教主）早前宣布開創自家服裝品牌「ALLOVER」，Chapter 1系列的14件單品，同樣被眼利網民發現「ALLOVER」的品牌LOGO與某韓國潮牌十分相似，令人不禁懷疑有抄襲的成份！
盧瀚霆「ALLOVER」LOGO疑抄韓國潮牌
當產品照片正式推出後，有人稱讚衣服很具設計美感，但也有眼利的網民發現「ALLOVER」品牌的LOGO十分神似韓國2020年初潮流品牌「SATUR」，同樣以鏡像翻轉設計，兩個品牌的LOGO都有相似之處，遠看更是難以分辨，於是令網民質疑AL的全新品牌有「抄襲」之嫌。
有網民更直斥是「抄襲食物鏈」、「Logo轉個字母就可以呃一筆，發達」；不過同時亦有網民反指很多牌子的LOGO都是由4個英文字反射而設計，例如「GIVENCHY」、「CHANEL」、「GUCCI」等等，未必涉及抄襲的成份。
