新四十二章｜「小琳」葉凱茵婚紗日離奇墮樓 前港姐演出感人曾經歷傷痛

小琳試婚紗當日離奇墮樓45歲葉凱茵演出獲讚

《新四十二章》第16集劇情可謂遊走甜蜜天堂與傷心地獄，一算（鄭子誠飾）欲與小琳（葉凱茵飾）拉埋天窗，小琳更暗中自掏三十萬幫補一算，情節感人。一算雖然周身無蚊，但為氹小琳開心仍聯同「炒股12成員」、租客們、章經（陳豪）及柯仔（周嘉洛飾）等，上演浪漫求婚大龍鳳；眾人以不同造型又唱又跳，畫面繽紛開心。正當以為一算與小琳大團圓，小琳在試婚紗當日離奇墮樓，送院後情況危殆。為幫小琳打氣，一算強忍傷心在家中舉行狂歡派對，生性孤寒的他更一反常態賣大包益街坊，令Mon姐（江嘉敏飾）等更為擔心……

求婚戲感動葉凱茵： 老公要反省一下

而在場口中感動落淚的葉凱茵，事後笑言流的都是真眼淚，她一再感激監製Joe之餘，更打趣著老公「反省吓」：「呢場戲超級感動，我老公冇咁做過，佢睇到真係要反省吓。好多謝監製寫場咁好嘅戲畀我留念。」曾有「秘書王」之稱的葉凱茵，2002年透過參選港姐入行，至今參與劇集作品超過140部，升呢人母後近年多飾演媽咪。

「小琳」是其近年最喜愛角色

凱茵受訪時指「小琳」是其近年最喜愛角色，並笑言鄭子誠是其母親偶像：「好多謝監製，今次角色唔單止有發揮，仲可以扮吓靚，又有感情線，我真係好耐未做過呢類角色。現實中我媽咪好鍾意音樂情人鄭子誠，所以可以同到音樂情人拍拖我好開心。」

天台談情戲老公都讚 感激劇組賜予「顏值巔峰」

凱茵又開心指與子誠的天台談情戲，其顏值贏盡親友好評：「同事啦、我老公仲有我個仔都讚，所有嘢都好配合，個妝啦、陽光啦、衫啦，簡直係我顏值嘅巔峰，真係好開心。我要多謝梳化服同埋攝影師，仲有導演監製。」其實昨晚求婚一幕，同樣有不少網民大讚小琳靚女兼擁有修長美腿，力讚港姐出身的她是靚靚綠葉。

2002港姐8號葉凱茵

2002年25歲的葉凱茵，參選港姐並晉身決賽12 強，同年佳麗有 (1號)關伊彤、 (2號)楊康寧、 (5號)保采芬、 (7號)余詩韻、 (8號)葉凱茵、 (11號)林敏俐、 (12號)鐘子淇、 (13號)蔡潔雯、 (15號)胡家惠、 (16號)李珮瑜、 (19號)左慧琪、 (20號)嘉碧儀。最後林敏俐得到冠軍但並無在香港娛樂圈發展，亞軍左慧琪不諳廣東話一年後解約， 季軍胡家惠卸任後離開娛樂圈投考空姐。反而是葉凱茵簽約至今，參與劇集作品超過140部！

妊娠毒血致胎死腹中 兒子老公助葉凱茵走出小產陰霾

成為「TVB秘書王」後，葉凱茵也是一位有很多經歷的媽媽。她於2016年年初，遇到了失去致親的悲傷經歷。那時懷孕9個月的她，突然患上突發性妊娠毒血症，最終不幸流產。當時，她一心準備迎接細仔，在產前兩、三星期，收到讓她絕望的消息。她憶述事發前一晚，她仍然感受到BB的心跳，怎料翌日早上起床，感到不適，之後發現下體流血。當時，老公已立即以15分鐘左右送葉凱茵去醫院，結果發現BB已無心跳。

以催生針產死胎 不敢看BB最後一面

這次突如其來的妊娠毒血症，令她不斷問：「係咪我食錯嘢累到BB咁呀？我做錯咗乜嘢呀？我一直都好健康，最多傷風感冒，點解突然間咁樣？」那時護士為她打催生針，期間一直安撫其情緒，但她既要忍受順產的陣痛，更要承受失去BB的傷痛，根本冷靜不下。生完之後，護士問她想見BB最後一面嗎？她想一會，拒絕了，不想這個畫面留在腦海。

產後葉凱茵出現多種後遺症

這次患上突發性妊娠毒血症，帶走了BB的性命，也差點帶走葉凱茵的性命。毒血症的噩夢仍未完結，連日來雙手插滿針，24小時量血壓、吊防止抽筋針，「醫生話我唔夠血，啲血有事，輸完三包血後好番啲，又到個腎有事，仲因為高血壓見頭痛頭暈，每次姑娘嚟量血壓，我都好似考試咁，次次都高到部機發出嘟嘟聲，連姑娘都問點解血壓仲咁高㗎？我自己都好驚！」產後凱茵的身體虛弱，妊娠毒血症的後遺症亦接踵而來，持續高血壓、頭痛、右眼視力有閃光，情緒也出現好大問題。

高血壓致視力問題

住院六日終於出院，但一出院即發現視力有問題，右眼像有閃光般，望人時好似有filter暗掉了，嚇到她立刻看專科，經檢查後證實無問題。「喺醫院都覺得隻眼怪怪哋，嗰陣電視播緊《鐵馬戰車》，夜晚自己一間房覺得好唔開心，一靜落嚟就喊，惟有睇《鐵馬》紓解吓情緒，但望一陣電視已經覺得隻右眼好痛，望白色牆又有啲黑黑哋圓圈，嗰陣以為只係喊得多。人哋話坐月唔好喊，我同坐月冇分別，仲更差，身體入面好傷，但我邊有可能唔喊？」

兩個多月後，血壓回落，眼部才逐漸回復正常，「依家日頭睇嘢仲有『飛蚊』，眨眼仲有少少黑色。」她估計因產後身體機能太差，而且「坐月」期間因高血壓不能進補，復元速度慢，「降血壓藥都要試第二隻先有效，依家冇事喇，之前行步路都喘氣。」

沒有成因 不明不白

產房外，其實更多的恐懼由老公承受，知道有機會大小不保，又不能刺激老婆，他默默承受最黑暗的五小時。「醫生冇直接同我講，只係慢慢滲啲講，血有事，腎有事，吓？肝都要check？後來老公講番，其實我仲有機會中風同抽筋，我先知道自己咁嚴重，真係死裏逃生。」

凱茵多次詢問醫生妊娠毒血症的成因，也未能得到答案，「佢話我係好突發、好嚴重，都唔知原因，總之唔關食錯嘢事，唯一可能因素係高齡懷孕。其實唔少孕婦都有呢個病，但多數有跡象，例如水腫、體重急升、蛋白尿、血壓高咗，有朋友個朋友都有呢個病，懷孕五個月時check到，要喺醫院住到生為止。」

回想懷孕九個月的經歷，比第一胎辛苦得多，又暈又嘔六個月，「唔好話返工，我落街都落唔到，當時拍緊《愛情食物鏈》覺得好暈拍唔到，拍《公公出宮》我都上唔到大陸。雖然係咁，但我一路產檢都正常，公院私立我都有check，上年12月仲check咗兩次，全部都冇事。出事後我打俾私家產檢講番我情況，醫生都好愕然，話我執番條命都算好彩。」

妊娠毒血症8個徵狀

輕微的妊娠毒血症一般沒有徵狀，許多患者都在例行產檢時發現，所以孕婦必須按時產檢，以便定期量度血壓和驗尿。隨着妊娠毒血症惡化，患者會開始呈現病徵如下：
– 頭痛（通常是前額部位）
– 視力問題，例如閃光及視力模糊
– 腹痛（通常是肋骨對下位置）
– 作嘔或嘔吐
– 感覺困惑
– 感覺渾身不舒服
– 氣促
– 手、面或足部突然腫大
孕婦如出現以上徵狀，應立即求醫。

仰扶起兒子：弟弟上天堂

現在的凱茵能堅強站起來，全靠老公和囝囝Orson的陪伴，湊一個小朋友已能大大分散注意力。「我唔可以唔向好方面諗，情緒管理一定要好，如果我頹落去點照顧個仔？」媽媽需靠兒子扶持，兒子亦需媽媽輔導，以平復失去弟弟的心情，凱茵說：「佢同爸爸都信天主教，Orson幼稚園校長老師好有愛心，好彩真係有信仰。」

媽媽入院期間，Orson正返下午班，還以為媽媽生得，興奮高呼：「細佬出嚟喇！」出事兩日後，Orson往探望媽媽時，竟退後一步，表現驚慌不作聲。媽媽回家後他才敢問：「係咪本來有細佬㗎？」凱茵以宗教角度向他解釋道：「係呀，因為細佬上咗天堂搵聖母瑪利亞，佢就『吓……』始終佢仲細，介乎懂事與唔懂事之間，佢都有性，但未至於好唔開心，依家隔耐咗先夠膽講番因為媽媽有病，所以細佬唔舒服上去搵聖母瑪利亞，有時佢提起好掛住細佬，我話我都好掛住。」

親人逐一離開 愛要及時

這幾年間，一家人已面對多次死亡，2013年冬至日，葉爸爸突然在街上心臟病發死亡，毫無先兆，「12月20日我媽媽生日，嗰幾日仲成日見面，講得笑得行得瞓得，點知做冬日突然走咗。」這次經歷傷透凱茵的心，花了長時間撫平心情。2014年到姨媽癌病去世；2015年葉媽媽發現身體有病；輪到細仔胎死腹中，之後老公的嫲嫲亦過身。一個一個地離開，Orson全都有經歷：「細佬、公公、太嫲一齊喺天堂喇。」

凱茵今次能迅速走出陰霾，亦因看透生死，連自己也曾踏進鬼門關，在最後一刻被意志拉回來，「我冇得唔化，生命可以突然咁走……經過今次之後，我更珍惜時間，細個愛情大過天，工作隨遇而安，依家我學識咗『及時』，enjoy生命，出事後有時自己喺屋企，好靜好孤單，依家返工見到同事一齊傾偈，我好開心。最好彩係我有個仔，為咗佢我一定會堅強。」

願做一世秘書王

人稱「TVB秘書王」的葉凱茵，自2002年參選港姐後入行，拍攝過百部電視劇，大多演秘書或行政人員角色，總之要着suit就起用她。凱茵做秘書入型入格，原來她入行前真的當過幾年秘書，更畢業於嘉諾撒聖心商學書院秘書課程，「現實中做秘書梗係悶好多啦，所以先去選港姐。」服務過眾多「老細」之中，她對《樓奴》的商天娥印象最深刻，「佢教我好多嘢，人又nice，佢同我住同一區，成日車我返屋企。」

另一「好老細」是《真相》的黃浩然，拍攝時正懷有Orson，「嗰時未夠三個月唔講得，佢睇到我啲細節估到我有咗，有睇住我。」同類角色做了多年，她不覺得悶，更謂想包起所有秘書角色，「起碼我有一條路線，人哋一諗『秘書王』，就諗起『葉凱茵』。」

葉凱茵亦指曾萌生想再生多個的想法：「雖然我曾講過我一定唔會再生，但呢個想法最近起咗變化，醫生同我講如果我想再要生要小心，因為好大機會再有呢個病。」她續指：「因為我仔仔去咗紐西蘭讀書一年，同佢分隔兩地，係好掛住佢。有時見到街上小朋友，就諗可唔可以生多個，但因為醫生建議同年紀唔細，都唔敢冒呢個險。」而身處紐西蘭的兒子Orson，更拍片為媽媽送上窩心安慰，葉凱茵聽到後亦開心落淚。

參考資料：衛生處網頁