新聞女王｜莫家淦被封「最神似體育王子」！《愛回家》王朝唱歌做生意瓣瓣掂
新聞女王｜莫家淦扮體育主播 獲網民大讚勁專業
現年41歲的莫家淦（Keith）近日於《新聞女王》中飾演體育主播「伍家豪」，雖然戲份不算多，但網民都大讚他表現好專業：「做得好傳神」、「仲以為真係借咗新聞部個體育主持過嚟幫手呀，真係報道得勁專業」、「戲裡你報得最真、最好」、「原來你以前都是主播，唔怪得做得咁好」等。
劇中莫家淦更有一句對白講到「波係圓嘅」，這句正是已故著名體育主播伍晃榮的金句，因此有網民以為他的角色「伍家豪」是影射伍晃榮，但其實他的角色是影射伍晃榮的徒弟伍家謙，而劇中他亦有提到這句金句是引述前輩所講的說話。
新聞女王｜莫家淦曾任12年娛樂新聞主播 過檔無綫由低做起底薪$3,000
角色受到網民關注後，莫家淦亦有在社交網介紹自己曾做主播的經歷：「無錯，我入行時的崗位正是一名娛樂新聞主播，做了差不多12年才轉戰劇集，演的都是配角的角色。每次雖然戲份不多，但都會盡心盡力去演好每一個角色，希望得到大家的喜愛。」
原來莫家淦出道已有19年，2004年他大學畢業後，即加入有線任職娛樂新聞主播，到2013年過檔TVB，得到更多機會發展。他接受傳媒訪問時透露，當年每月底薪只有$3,000，唯有靠勤力做兼職，幫補收入。他甚至試過只容許自己每天用$100，慳住使，盡量少支出，減少購物或者外遊。
新聞女王｜莫家淦創立潮牌做老闆紅星都支持 撈埋樂壇出新歌
直到2011年，莫家淦儲到一筆錢，以六位數字跟朋友一齊搞生意，成立自家潮流眼鏡的品牌，之後更連開多間手錶和眼鏡店，品牌也得到很多藝人支持，包括郭富城、陳慧琳﹑容祖兒同陳奕迅等，都是這個品牌的捧場客。雖然莫家淦曾透露眼鏡生意因頂不住疫情已暫停，不過另外一門手錶生意仍然維持到。
2017年莫家淦開始轉型做演員，把重心放在戲劇拍攝上，先後在多部劇集演出閒角，最為人熟悉的是他在《愛回家》扮演接龍保安「王朝」一角，最近他仲推出新歌，自封「樂壇中年版新人」，非常勤力！
新聞女王｜莫家淦曾靠譚詠麟北上吸金首度擔正做男一
去年初莫家淦更簽約經理人公司藝能，獲安排北上發展，而藝能娛樂的老闆正正就是莫家淦在明星足球隊的「波友」譚詠麟。其實莫家淦已經加入明星足球隊多年，亦參加過多場足球比賽。為了該次北上吸金之旅，莫家淦仲問TVB請足4個月假，好有決心！
早前莫家淦就在內地短視頻劇《重啟2003》中，首嘗男一滋味。他接受傳媒訪問時，透露該劇班底大部分都係香港人，每一集1-2分鐘，有成100集，但要在5日內拍完，進度好趕，劇中他更有不少動作戲，而拍完之後劇組對他也十分滿意，相信之後會再有合作機會。
新聞女王｜莫家淦已婚育有兩子
感情方面，莫家淦早於2012年與圈外人Kenix成婚，二人育有兩子，莫家淦不時在網上晒全家幅，亦曾被影過撇甩兩個仔仔，與太太拍拖Shopping，十分恩愛。
莫家淦同老婆係國際認可嬰兒按摩導師
莫家淦太太黎慧盈（Kenix）的職業是國際認可嬰兒按摩導師，開班教家長們如何為BB做按摩，2015年初為人母，自己都可大派用場。嬰兒按摩在外國十分流行，在港亦逐漸普及，嬰兒按摩透過肌膚接觸，可刺激腦部及肌膚底下的神經發展，生理好處更多，「好似幫BB排走肚風、少啲便秘去廁所順暢啲、少啲因腸胃不適引起哭鬧、幫助佢哋大小肌肉發展等等。」如果父母親手替BB按摩，更有助增進親子關係，「父母可以好早同仔女有親密接觸，有時問番小朋友，幾耐冇攬過爹哋媽咪呢？原來好耐喇喎。」
她提點家長進行按摩時，必須要專注，切勿邊做邊玩手機睇電視，「做嘅時間可以多啲同小朋友傾偈，專注做一件事，效果都會好啲。有時同家長上堂，佢哋隔一陣已經忍唔住傾偈，一路捽個小朋友一路傾，明白係人之常情，但我一定要提番家長，返到屋企一定要喺寧靜舒服嘅環境下進行，令家長同小朋友都一齊放鬆。」她已教定老公按摩手法，將來可以幫幫手，但暫時仍是半桶水，「啲人對住老婆係學得冇咁認真。」
自家黑超奪青年創業金獎
Keith除了做幕前之外，還致力搞潮牌太陽眼鏡生意，去年贏得「滙豐青年創業大獎」金獎，連天王郭富城、古天樂、任達華、譚詠麟、容祖兒及楊怡都幫手做生招牌。Keith希望打造真正屬於香港的眼鏡品牌，野心勃勃，甚至比演藝事業更甚，但他不會放棄做幕前，希望利用幕前的人際網絡幫到生意，互惠互利！
