新聞女王 | 譚俊彥再現強演技 頂「狄龍之子」之名憑實力做視帝

回憶揭露譚俊彥與佘詩曼關係

劇情提到文慧心（Man姐）得以在電視台繼續留任，喜極而醉，來到了修車行，找到前同事兼前男友陳子傑慶祝，二人熱吻。

Man姐回憶當年帶著陳子傑計劃拍攝搶劫畫面，原是SNK News的攝影師的子傑，在離開香港到美國工作前，偶然下和文慧心拍攝到「賊王」的犯案過程。子傑被流彈擊中腿部受傷，被迫放棄離港甚至離開新聞界，轉行做汽車維修，和慧心的關係亦由情人變成朋友，從此改變了一生。

譚俊彥「車房佬」造型參考自呢齣電影

即使於《新聞女王》內的戲份不多，但譚俊彥於每一幕都發揮視帝級演技，其中「車房佬」造型，亦被網民發現有狄龍在《英雄本色》宋子豪「豪哥」的影子。他坦言拍攝時沒想過故意還原父親的經典角色，最緊要是觀眾「睇得過癮就足夠」！

入行22年 憑實力上位做視帝

提起譚俊彥，大家都會加上「狄龍個仔」這四個字。貴為星二代、現年41歲的譚俊彥入行22年，03年起轉戰大陸，打拼多年，到近年簽約TVB做親生仔，套套劇都孭重飛。不過，譚俊彥直言曾聽到不少冷言冷語，例如他在《包青天之再起風雲》飾演包青天，有人認為他演技不好，沒有實力擔正做男主角，被指靠父蔭上位。例如他在《法證先鋒IV》飾演多口的高級督察King sir，連爸爸都是彈多過讚。

狄龍曾於全港人面前教仔

直到2021年，譚俊彥終在《萬千星輝頒獎典禮》奪得「馬來西亞最喜愛TVB男主角」及「最佳男主角」，成為雙料視帝！譚俊彥父母狄龍及陶敏明親身到場見證兒子攞獎，陶敏明直言開心過自己及龍哥攞獎。

譚俊彥獲獎一刻，母親陶敏明興奮在觀眾席上站起拍手，譚俊彥含淚話：「媽咪對唔住，呢幾年我少咗打電話畀你，唔係我唔愛你，係姓譚習慣將愛放喺心，我好愛你﹗我要多謝太太，你係我嘅全部，冇你我唔會拎到呢個獎，love you，我唔會忘記初心﹗」譚俊彥頒獎禮後接受娛樂新聞台訪問時依然激動，哽咽話：「我事前冇準備講乜，原來上到台係會唔記得晒講咩，我仲有好多人要多謝，要多謝戴耀明、經理人…」

此時父親狄龍突然硬入教訓兒子，一臉嚴肅對住譚俊彥話：

「 我知道我個仔因為我做呢行，唔想衰畀我睇，呢樣我都贊成﹗我鍾意用理性，多過感情角度去睇件事﹗我想話你知，你要感激過去、努力當下、放眼未來，你有幾大嘅能力就有幾大嘅責任，當然要用行為用工作去報答支持你嘅人，今日你好幸運，但同你一齊競爭嘅人嘅技巧，唔一定輸過你，只不過輸咗個運氣畀你﹗」

狄龍大潑兒子冷水：你要了解點解失敗

接續狄龍再說：「如果你有你嘅初心，你要對你屋企人，對你嘅小朋友，對太太對媽咪努力﹗因為時間係有限， 我哋七十幾歲人，唔知睇得幾多時間，但我好感激你，為咗你嘅工作唔使令我難過，而付出咁大嘅努力，去追求你嘅成功，但你要知道你付出咗好多，我都付出咗好多﹗」一直在旁細心聆聽父親教誨的譚俊彥即和應：「當然啦」。

狄龍繼續講：「但我唔想睇你難過，我唔想睇到你失敗後嘅失落，我認為人生應該仲有一樣嘢，你要了解點解失敗，失敗喺邊？」譚俊彥好不容易插嘴：「老竇，所以我咪唔敢叫你嚟囉﹗」狄龍冇理個仔繼續話：「點解我圈你呢？我驚你過度咗，但媽咪呢就係衷心支持你，我都係衷心支持你，OK？你以後要謙虛啲，（譚俊彥受教不停點頭），你煮啲嘢係好食嘅﹗ 」

狄龍叫譚俊彥退居幕後

無綫娛樂台主持好不容易搵到位發言，就問狄龍，會否為有譚俊彥呢個兒子感到驕傲？狄龍就答：

「我覺得佢如果有能力，可以諗吓退居幕後，例如做一個製作人、導演（譚俊彥嚇到O嘴），做到嗰啲位，你可以提拔到後輩，可以喺社會有正面嘅影響，可以影響人心，你見到志偉咁成功係因為佢可以影響人心，佢嘅成就同能力使人好開心，使人開心好難，悲劇容易啲，喜劇好難㗎﹗如果將來你能散播多啲歡樂，我會更加開心囉﹗」

譚俊彥望住爸爸狄龍回應：「我今日最開心就係你喺度﹗」狄龍聽完兒子的感動說話，突然轉話題：

「你揸車返去要放慢啲，慢慢揸呀﹗」

譚俊彥答完好就請狄龍翌日去探孫兒﹗

譚俊彥母親陶敏明接受訪問時直言好開心興奮：「真係好開心，冇諗過會咁開心，以前都見過人攞過唔少獎啦，龍哥都攞好多啦，都唔夠今日開心﹗」即向旁邊的狄龍話：「龍哥你唔介意呵？」她又指一定要好好慶祝：「我仲要同晒所有朋友慶祝﹗」表現冷靜的狄龍就大讚新抱好識教小朋友，令兒子有個好好嘅家庭：「家庭嘅支持好重要﹗」

兒時被狄龍罰困狗籠

譚俊彥否認靠父蔭，他曾在訪問中表示爸爸從無插手他的個人事業發展。錄影TVB節目《爸爸的告白》時，他更透露年幼時，因太頑皮，曾經被爸爸把他與惡犬共囚狗籠半小時做懲罰，令他驚到發燒。經過多年，狄龍深感內疚，指這件事是他心中一道疤痕，更向譚俊彥道歉謂︰「係爸爸唔啱！其實我後來都了解到用呢類壓力式方法去改變一個人，只會令佢驚，但唔會令佢了解到事情嘅真相。」兩父子終冰釋前嫌。

3招寵妻大法 零緋聞「愛妻號」

譚俊彥與內地舞台劇演員任祉妍當年在內地拍劇相識，任祉妍是南洋藝術學院最佳畢業生，於15年結婚，婚後任祉妍息影陪譚俊彥來港。

結婚多年，他都零緋聞，與朱晨麗拍親熱戲都沒有過電，與老婆還是這麼恩愛，二人背後仲有疑似定情紋身。

他曾接受訪問分享3大維繫婚姻之道：

第一，他絕不會戲假情真：「一隻手掌拍不響，演員可以愛上角色，但不能愛上演呢個角色嘅人。」

第二，他會主動道歉：「每次爭吵我都會向太太低頭，唔係怕老婆，係為咗家庭。」

第三，他去哪裡都會拖實老婆，他認為帶老婆出來會不會引起不必要的誤會：「咁多年來大家鬧我演得幾唔好，都唔係話我同邊個一齊。」最後他很感激老婆把家庭照顧妥當，讓他減輕壓力：「太太為家庭放棄舞台劇夢想，想小朋友穩定成長。」

寧花時間享家庭樂 拒北上及應酬

譚俊彥與老婆育有一女一仔，譚晴Renee 和 譚杺Rex。他曾指父母在他小時候忙於工作、少見、少溝通，成家立室後立志不會缺席仔女成長。然而女兒出生不久他就去工作，他覺得自己虧欠女兒很多，而且他也渴求穩定，所以不想再頻撲拍劇，寧願花時間陪伴仔女，所以在16年突然放棄事業回港發展，他說：「以前貪玩，有咗家庭少啲應酬，好享受每日收工回家見小朋友，攰啲都冇所謂。錢夠使咪得…我係香港人，想用廣東話拍戲，希望小朋友喺香港長大。」

每年他又會帶埋父母一家六口外遊旅行，盡量彌補家庭時光。他曾被記者影到放假那幾日幾乎謝絕所有應酬，除了在寓所附近練跑之外，天天黐實老婆仔女，他抱緊老婆、老婆抱緊女兒。兩公婆外出用膳，女兒全程黐實爸爸，他無不耐煩之餘亦樂於讓老婆安心用餐。

但他自言是個怪獸家長，不會對仔女過度縱容，在教養上親力親為。女兒四歲時，他已買七歲教材給她做︰「好彩我有個好太太，每日10點似幼稚園上堂咁安排學習，我尋日同太太買教材，個女數學有天份，我買七歲數學練習畀佢。」